Read nande Yoane 1 Bible Online

Yoane 1 - nande bible

Yoane 1

¹Okwʼĩtsũka lyʼerĩmbere Ekĩnywa kyabyaho, nʼEkĩnywa ekyo kyabya haguma na Nyamuhanga, kandi Ekĩnywa ekyo kyabya Nyamuhanga.

²Neryo Ekĩnywa ekyo kyabya haguma na Nyamuhanga okwʼĩtsũka lyʼerĩmbere.

³Kandi busana naye emyatsi yosĩ moyahuluka eribyaho, isihali kindu ekyahangikawa ekyo atahangika.

⁴Ekĩnywa ekyo kyabya nʼengebe, nʼengebe eyĩ moyabya kyakakala kyʼabandu.

⁵Kandi ekyakakala ekyo kĩkakoleraya omo mwĩrĩmya, nʼomwĩrĩmya mwatalĩmyakyo.

⁶Nyamuhanga mwatuma omundu, oyo wahulawa mo Yoane.

⁷Yoane mwahĩka erĩtũla omwatsi iniatoka erĩtũla omwatsi wʼekyakakala, abandu bosĩ batoke erĩkĩrĩrya.

⁸Yoane siabya ekyakakala ekyo, nĩkwa asa atoke erĩtũla omwatsi wʼekyakakala ekyo.

⁹Ekyo kyabya kyakakala kyʼekwenene ekĩkahĩka omo kihugo, nʼerĩkolerya obuli mundu.

¹⁰Ekĩnywa ekyo kyabya omo kihugo, kandi ni iye yo wabumba ekihugo, nĩkwa ekihugo mokitetamuminya.

¹¹Iye mwahĩka omo kihugo kiwe, nʼababya bandu buwe mobatetamũkokya.

¹²Nĩkwa abosĩ abamũkokaya, nʼerĩmwĩkĩrĩrya, mwahabo ehamũlĩ eribya bana ba Nyamuhanga.

¹³Nĩkwa mobatabutwa mo bana ba Nyamuhanga omo nzira yʼomubiri, kutse omwʼisonda lyʼomubiri, kutse omwʼisonda lyʼabandu, nĩkwa Nyamuhanga yo wabutabo.

¹⁴NʼEkĩnywa ekyo mokyabya mundu, naye mwĩkala omo katĩkatĩ ketu. Netu motwalangira olukengerwa luwe ĩloswĩre nʼolukogo nʼekwenene. Olukengerwa olũ lwabya olwa Mugala Ekyusa ekyabutawa na Tata.

¹⁵Yoane mwatũla omwatsi wa Yesu, mwabirikira ati, Oyũ yoyo nahula nyiti, Oyukasa enyũma syage ni mukulu kwĩngye, kusangwa anatula isindinabutwa.

¹⁶Omo lukogo luwe olũtswagĩre abiritutsumula, iniakatuha olukogo nʼolundi lukogo.

¹⁷Kusangwa Nyamuhanga mwaha Musa Emigambo, nĩkwa olukogo nʼekwenene, Yesu Kristo yo waletabyo.

¹⁸Sihali mundu wabilangira Nyamuhanga na kera; nina Nyamuhanga. Ekyusa, oyuli oko kĩkũba kya Tata, yo wabirimũmĩnyĩsya.

¹⁹Ebĩ byo Yoane akanaya, omugulu Abayũda bamutumira abahererĩ nʼAbalawĩ bakalũa eYerũsalema erĩmũbũlya bati, Uwendi kwehĩ?

²⁰Yoane mwatagana erĩtũlago, nĩkwa mwakangyabo ndeke ati, Sindi Kristo.

²¹Nabo mobamũbũlya bati, Uwendi? Uli Elĩa kwehĩ? Yoane mwasũbĩrya ati, Ĩngye si iye. Kandi mobabũlya bati, Uli mũmĩnyererĩ kwehĩ? Naye mwasũbĩrya ati, Iyihi.

²²Neryo mobamũbũlya bati, Uwendi kwehĩ? Itwatoka erĩsũbĩrya abaliatutuma. Ukayahula uti kwehĩ?

²³Yoane mwasũbĩryabo ati, Ĩngye indi mulenge wʼoyukabirikirira omo mbwarara, ngoko mũmĩnyererĩ Ĩsaya abũga ati, Mũtũngananaye embalu yʼomukama.

²⁴Neryo Abafarĩsayo bo batuma abakwenda abo.

²⁵Mobabũlya Yoane bati, Ũkabatĩsaya busana nakĩ wamabya isuli Kristo, kutse Elĩa, kutse mũmĩnyererĩ kwehĩ?

²⁶Yoane mwasũbĩryabo ati, Ngabatĩsaya omo magetsi, nĩkwa omo katĩkatĩ kenyũ hahangene omuguma oyo mũtasĩ.

²⁷Iye akasa enyũma wage, nĩkwa ĩngye sinyitolere erĩkũndũla omukoba wʼengendero yiwe.

²⁸Emyatsi eyĩ yakolawa eBetanĩa, eyisirya wʼeYorodanĩ, aho Yoane abatĩsĩraya.

²⁹Neryo engyakya Yoane mwalangira Yesu akasa aho ali, neryo mwabũga ati, Lebaya, Ekyana kyʼEmbũlĩ kya Nyamuhanga oyũkalũsaya ebibi byʼekihugo!

³⁰Oyũ yoyo nahula nyiti, Hali mundu oyukasa enyũma wage, oyuli mukulu kwĩngye, kusangwa anatula isindinabutwa.

³¹Nage mondamuminya, nĩkwa monasa erĩbatĩsya omo magetsi, erĩmũmĩnyĩkalya oko bandu ba Ĩsraelĩ.

³²Yoane mwatũla omwatsi oyũ ati, Monalangira Omũlĩmũ akandagala akalũa elubula ngʼakalĩkũkũ, nʼerimubyako.

³³Nage mondamuminya, nĩkwa Nyamuhanga oyo wanyituma erĩbatĩsya omo magetsi, mwambwira ati, Oyo wasyalangira Omũlĩmũ akamwandagalirako nʼerimubyako, yo yũkabatĩsaya omo Mũlĩmũ Abũyĩrĩre.

³⁴Nĩkwa nabirilangirakyo, kandi ngababwira nyiti, Oyũ ni Mugala wa Nyamuhanga.

³⁵Kandi engyakya Yoane abya imene haguma nʼabiga buwe babiri.

³⁶Neryo mwalangira Yesu akalaba, neryo mwabũga ati, Lebaya, Ekyana kyʼEmbũlĩ kya Nyamuhanga!

³⁷Nʼabiga babiri abo mobowa akabũga atya neryo mobakwama Yesu.

³⁸Yesu mwakeba, mwalangirabo bakamukwama, neryo mwabũga ati, Mukasondakĩ kwehĩ? Nabo mobabwira Yesu bati, Rabĩ, ekĩnywa ekĩ kiti Mũkangĩrĩrya, wĩkerehi kwehĩ?

³⁹Yesu mwabwirabo ati, Mwase, mũlebayeho. Neryo mobasa mobalangira aho ĩkere. Neryo mobasiba haguma naye ekiro ekyo, kusangwa yabya hakũhĩ na saa ĩkũmĩ.

⁴⁰Omuguma gʼoko babiri abowa Yoane akabũga nʼerigenda haguma na Yesu, abya Anderea, mugala wabo Sĩmonĩ Petero.

⁴¹Neryo Anderea mwatsũka eriyabana mugala wabo ye Sĩmonĩ, mwamubwira ati, Twabiribana Masĩya, (Ekĩnywa ekĩ kiti, Kristo).

⁴²Neryo Anderea mwaleta Sĩmonĩ uku Yesu. Yesu mwamutungerera mwabũga ati, Uli Sĩmonĩ, mugala wa Yoane. Wasyahulwa mo Kefa (Ekĩnywa ekĩ kiti, Petero).

⁴³Kandi engyakya Yesu mwasonda eriya eGalĩlaya. Neryo Yesu mweya Fĩlĩpo, mwamubwira ati, Unyikwame.

⁴⁴Nĩkwa Fĩlĩpo abya wʼomũyĩ wʼeBetesaĩda, omũyĩ wa Anderea na Petero.

⁴⁵Neryo Fĩlĩpo mwayabana Natanaelĩ, mwamubwira ati, Twabiribana oyo Musa asaka omo kitabu kyʼEmigambo, nʼabamĩnyererĩ nabo basaka busana naye. Ni Yesu wʼeNazaretĩ, mugala wa Yosefũ.

⁴⁶Neryo Natanaelĩ mwamũbũlya ati, Kwʼekindu kyowene kyanganalũa eNazaretĩ kwehĩ? Fĩlĩpo mwamubwira ati, Wase Ũlebaye.

⁴⁷Yesu mwalangira Natanaeli akasa ukwʼiye, neryo mwabũga busana naye ati, Lebaya, Omũĩsraelĩ kwenene, oyute mo matebo!

⁴⁸Natanaelĩ mwabwira Yesu ati, Ukanyiminya uti kwehĩ? Yesu mwamũsũbĩrya ati, Mongakulangira omugulu Ũlũe omo ndĩna yʼomuti wʼomũtĩnĩ, Fĩlĩpo ate akubirikira.

⁴⁹Natanaelĩ mwamũsũbĩrya ati, Mũkangĩrĩrya, uli Mugala wa Nyamuhanga! Uli Mwami wa Ĩsraelĩ!

⁵⁰Yesu mwamũsũbĩrya ati, Ukĩkĩrĩraya kusangwa nakubwira nyiti, Mongakulangira omo ndĩna yʼomuti wʼomũtĩnĩ kwehĩ? Wasyalangira emyatsi minene ũkwʼeyĩ

⁵¹Neryo Yesu mwabwirabo ati, Kũndũ-kũndũ, ngababwira nyiti, mwasyalangira olubula ilukingukere, nʼabamalaĩka ba Nyamuhanga ibakahetuka nʼeriandagalira oko Mugala wʼOmundu.