Read nande Yoane 10 Bible Online

Yoane 10 - nande bible

Yoane 10

¹Kwenene, kwenene ngababwira nyiti, Oyutelaba omo lũkyo lwʼobutsunga bwʼesyombũlĩ, nĩkwa akalaba handi, nĩ mũrahĩ nʼomũnyeyĩ.

²Nĩkwa omundu oyukalaba omo lũkyo nĩ mũlĩsya wʼesyombũlĩ.

³Neryo omũteya wʼolũkyo akamukingulira, nʼesyombũlĩ Sĩkowa omulenge wuwe, kandi akabirikira esyombũlĩ siwe omo mena wasyo, neryo akahũlũkĩraya syʼeyĩhya.

⁴Neryo amabĩhũlũkya esiwe syosĩ, akagenda embere wasyo, nʼesyombũlĩ sikamukwama kusangwa sĩnasĩ omulenge wuwe.

⁵Kandi sisyekwama owʼehandi, nĩkwa sikamusaga, kusangwa sĩsĩasĩ omulenge wuwe.

⁶Yesu mwatwĩrabo omũsyo oyũ, nĩkwa mobataminya nga ni myatsi yahi eyo abũga nabo.

⁷Neryo Yesu mwabũga nabo kandi, ati, Kwenene, kwenene ngabũga nenyũ, Ingye indi lũkyo lwʼesyombũlĩ.

⁸Abosĩ abasa embere syage nĩ barahĩ nʼabanyeyĩ, nĩkwa esyombũlĩ mosĩtowabo.

⁹Ĩngye indi lũkyo, omundu amingirira ũkwʼĩngye asyalamĩbwa; kandi asyingira nʼerihuluka, nʼeribana ebyʼerirya.

¹⁰Omũrahĩ akahĩka busana nʼerĩĩba lisa, nʼerĩĩta, nʼerĩherya. Ingye nasa babane engebe, kandi babane engebe nyingi eyĩtswagĩre.

¹¹Ĩngye indi mũlĩsya wowene. Omũlĩsya wowene akasiga engebe yiwe busana nʼesyombũlĩ.

¹²Omũhĩngĩ, oyute mũlĩsya isi mwenye esyombũlĩ, akasĩgasyo, iniatibita omugulu akalangira embwa yʼomolĩ ikasa, neryo embwa yʼomolĩ ĩkapũrasyo, nʼeripanzasyo.

¹³Omũhĩngĩ akatibita kusangwa nĩ mũhĩngĩ, isialitsomana esyombũlĩ.

¹⁴Ĩngye indi mũlĩsya wowene. Kandi nyasĩ esyombũlĩ syage, nʼesyombũlĩ syage nasyo Sĩnyasĩ.

¹⁵Ngoko Tata anyasĩ, nage nyasĩ Tata; kandi ngasiga engebe yage busana nʼesyombũlĩ.

¹⁶Kandi nyiwite esindi mbũlĩ, esite syʼomo butsunga obũ; litolere inaletasyo nibya, nasyo syasyowa omulenge wage; syasyabya ekihangulo kiguma haguma nʼomũlĩsya muguma.

¹⁷Busana nʼomwatsi oyũ, Tata wage anyanzĩre kusangwa ngasiga engebe yage inatoka erĩswĩmyayo.

¹⁸Sihali mundu oyukanyisagulayo, nĩkwa ngasigayo omo hamũlĩ yage. Nyiwite ehamũlĩ yʼerisigayo, kandi ngwite ehamũlĩ yʼerĩswĩmyayo. Tata wage abirinyihana ati nyikole nyitya.

¹⁹Kandi mohaswahuluka erigabana omo katĩkatĩ kʼAbayũda busana nʼebĩnywa ebĩ.

²⁰Abangi ba kubo mobabũga bati, Ali ko mbĩnga! Nĩ mũsĩre! Busana nakĩ mũkamowa kwehĩ!

²¹Abandi bati, Oyuli kwʼembĩnga sĩalĩbũga atya. Embĩnga yangatoka erĩrĩbũla ameso wʼendĩmatĩme, kwehĩ?

²²Oko ndambĩ eyo Ebiro Bikulu byʼErihigula mobyabya eYerũsalema.

²³Kandi omugulu oyo abya wʼeritsuku, neryo Yesu abya iniakalendera omo Hekalũ omo baraza ya Solomono.

²⁴Neryo Abayũda mobamũtĩmbako bakamũbũlya bati, Esaa yingaha ũkatũganga-gangaya kwehĩ? Wamabya uli Kristo, utubwire ndeke-ndeke.

²⁵Yesu mwasũbĩryabo ati, Mongababwira, nenyũ simwetĩkĩrĩrya. Emĩbĩrĩ eyo ngakola omo lĩna lya Tata wage, ĩkatũlago busana nage.

²⁶Nĩkwa sĩmũlĩkĩrĩraya, kusangwa Simuli mbũlĩ syage.

²⁷Esyombũlĩ syage Sĩkowa omulenge wage; kandi nyasĩsyo, nasyo sikanyikwama.

²⁸Nage ngahasyo engebe yʼerikota, kandi nasyo sisyendisyahera na kera, kandi sihali oyo wangatoka erĩpũrasyo omo byala byage.

²⁹Tata wage oyo wambasyo, ni mukulu oko bosĩ, kandi sihali wangatoka erĩpũrasyo omo byala bya Tata.

³⁰Ĩngye na Tata tuli muguma.

³¹Abayũda mobaswatola amabwe kandi erimugusa goko.

³²Yesu mwabwirabo ati, Nabĩrĩbakangya emĩbĩrĩ mingi yowene eyo Tata amba nyikoleyo; busana nʼomũbĩrĩ wahi mukanyigusa kwʼamabwe kwehĩ?

³³Abayũda mobamũsũbĩrya bati, Sĩtwekũswĩraya amabwe busana nʼomũbĩrĩ owene, nĩkwa busana nʼeritsuma Nyamuhanga! Kusangwa uwe mundu buyira, ukayiyira mo Nyamuhanga!

³⁴Yesu mwasũbĩryabo ati, Sĩkĩsakĩre omo Migambo yenyũ kwehĩ, iti, Nyamuhanga mwabũga ati, Muli esyonyamuhanga?

³⁵Tũnasĩ kwʼAmasako sialiketawa, neryo Nyamuhanga abiribirikirabo mo syonyamuhanga abo ekĩnywa kya Nyamuhanga kyahĩkako.

³⁶Nĩkwa ĩngye, Tata abirinyihigula nʼerinyituma omo kihugo. Neryo mukanyahula muti, Ukatsuma, kusangwa nabũga nyiti indi Mugala wa Nyamuhanga kwehĩ?

³⁷Namatindakola emĩbĩrĩ ya Tata wage, sĩmũnyĩkĩrĩraye.

³⁸Nĩkwa namakolayo, nomo mwangabya mũtanyĩkĩrĩrye, mwĩkĩrĩraye emĩbĩrĩ eyo, mutoke eriminya nʼerĩkĩrĩrya ngoko Tata amatikene ũkwʼĩngye, nage nyimatikene na Tata.

³⁹Kandi mobasonda-sonda erimutsimba, nĩkwa mwasunukala omo byala byabo.

⁴⁰Neryo Yesu mwaya kandi eyisirya wʼeYorodanĩ aho Yoane abatĩsĩraya erĩmbere, neryo mwĩkalayo.

⁴¹Kandi abandu bangi mobamũhĩkako, mobabũga bati, Yoane mwatakola ekitiko-tiko, nĩkwa emyatsi yosĩ ahula busana nʼomundu oyũ, yabya ya kwenene.

⁴²Kandi abandu bangi mobamwĩkĩrĩrya eyo.