Read nande Yoane 11 Bible Online

Yoane 11 - nande bible

Yoane 11

¹Neryo omundu oyukahulawa mo Lazaro, oyo wabya ĩkere eBetanĩa, mwalwala. Nĩkwa eBetanĩa kabya kayĩ ka Marĩa na mwali wabo ye Marata.

²Marĩa oyo yo wahakabaya ebisando byʼomukama amagũta awakakumba ndeke, kandi mwasangula ebisando biwe omo nzwiri siwe. Mugala wabo ye Lazaro yo wabya alwere.

³Abali babo abo mobatumira uku Yesu bati, Mukama, lebaya, oyo wanzĩre alwere.

⁴Nĩkwa omugulu Yesu owa, mwabũga ati, Endwala eyĩ si yʼerĩholya, nĩkwa ni busana nʼeripipa Nyamuhanga, Omugala wa Nyamuhanga abane olukengerwa muyo.

⁵Nĩkwa Yesu abya anzĩre Marata, na mwali wabo, na Lazaro.

⁶Neryo abere owa Lazaro kwʼalwere, mwasiba eyo abya yo biro bibiri.

⁷Neryo enyũma wʼaho Yesu mwabwira abiga buwe ati, Tusube eYũdea kandi.

⁸Abiga mobamubwira bati, Mũkangĩrĩrya, Abayũda babya bakasonda-sonda erĩkwĩta omo mabwe, nawe ukasubayo kwehĩ?

⁹Yesu mwasũbĩryabo ati, Omusibo siawite saa ĩkũmĩ nʼĩbĩrĩ kwehĩ? Omundu amalendera omwʼitungi, syalĩtwĩkala kusangwa akalangira ekyakakala kyʼekihugo kino.

¹⁰Nĩkwa amalendera omo kiro, akatwĩkala, kusangwa ekyakakala sikiri omwisi wuwe.

¹¹Yesu mwabũga ebĩ, neryo enyũma wʼaho mwabũga ati, Omwĩra wetu abirigotsera; nĩkwa ngayayo ngayamũbũkaya omo tũgotserĩ.

¹²Abiga mobabwira Yesu bati, Mukama, amabya ayĩreto, asyalama.

¹³Nĩkwa Yesu abya akahula erihola liwe; nĩkwa mobaganĩrya bati ahula otũgotserĩ twʼomubiri.

¹⁴Neryo Yesu mwabwirabo ndeke ati, Lazaro abirihola.

¹⁵Nage namatsema busana nenyũ kusangwa sinabyayo, imwatoka erĩkĩrĩrya. Nĩkwa tuye eyo ali.

¹⁶Neryo Tomasĩ, oyukahulawa mo Muhasa, mwabwira abiga balĩkyabo ati, Netu tugende, nibya tuyahole haguma naye.

¹⁷Neryo Yesu abere ahĩkayo, mweya Lazaro iniabiribya omwʼisinda mo biro bini.

¹⁸Nĩkwa eBetanĩa yabya hakũhĩ nʼeYerũsalema nga bilometre bisatu.

¹⁹Kandi Abayũda bangi babya ĩbabĩrĩhĩka ewa Marata na Marĩa, erĩkĩranĩabo busana na mugala wabo.

²⁰Neryo Marata abere owa ko Yesu akahĩka, mwayahĩndana naye, nĩkwa Marĩa mwasĩgala ĩnĩanĩkere omo nyũmba.

²¹Neryo Marata mwabũga na Yesu ati, Mukama kumbe wabya hano, mugala wetu nga sialitahola!

²²Nĩkwa na lino nyĩnasĩ ekĩndũkĩ wasyabũlya Nyamuhanga, Nyamuhanga asyakuhakyo.

²³Yesu mwabũga naye ati, Mugala wenyũ asyalũbũka.

²⁴Marata mwabwira Yesu ati, Nyĩnasĩ kwʼasyalũbũka okwʼĩlũbũka lyʼekiro kyʼenyũma-nyũma.

²⁵Yesu mwamubwira ati, Ingye indi erĩlũbũka, nʼengebe. Oyũkanyĩkĩrĩraya nomo angahola asyabyaho.

²⁶Nʼabosĩ abaliho bamanyĩkĩrĩrya sibendisyahola na kera. Wamĩkĩrĩrya ebyo kwehĩ?

²⁷Naye mwamubwira ati, Ega Mukama! Nabĩrĩkĩrĩrya kʼuli Kristo, Omugala wa Nyamuhanga, oyukasa omo kihugo.

²⁸Marata abere abĩbũga atya, mwayabirikira mwali wabo ye Marĩa, iniakamubwira bũbĩso-bĩso ati, Omũkangĩrĩrya ane hano, akakubirikira.

²⁹Marĩa abere abĩowa ekĩ, mwahangana lũba, mwaya aho ali.

³⁰Nĩkwa Yesu ĩsĩalĩahĩka oko mũyĩ oyo, nĩkwa abya aho Marata amwegaya.

³¹Neryo ababya haguma na Marĩa omo nyũmba bakamũkĩranĩa, omugulu balangira Marĩa akahangana lũba nʼeriya eyĩhya, mobamukwama. Baganĩraya bati akayalirira okwʼisinda.

³²Omugulu Marĩa ahĩka aho Yesu ali, nʼerimulolako, mwawa ahisi oko bisando biwe. Neryo mwamubwira ati, Mukama, kumbe wabya hano, mugala wetu nga sialitahola!

³³Neryo Yesu abere alangira Marĩa akalira, nʼAbayũda abasa haguma naye bakalira, Yesu mwakwa obũlĩge bo kutsibu omo mutima wuwe, kandi mwakwa engitsi.

³⁴Neryo Yesu mwabũlyabo ati, Mwabirimuta hahi kwehĩ? Nabo mobamubwira bati, Mukama, wase Ũlebaye.

³⁵Yesu mwalira.

³⁶Neryo Abayũda mobabũga bati, Mũlebaye ngoko abya amwanzĩre.

³⁷Nĩkwa abandi ba kubo bati, Oyo walĩbũla ameso wʼendĩmatĩme, Sĩangalekĩre omundu oyũ akatendihola kwehĩ?

³⁸Neryo Yesu mwaswakwa obũlĩge bo kutsibu omo mutima wuwe, neryo mwahĩka okwʼisinda. Nĩkwa yabya mwangalũ nʼerĩbwe ryabya lĩkere kugo.

³⁹Neryo Yesu mwabũga ati, Mũlũsayeho erĩbwe. Marata, mwali wabo oyo wabya aholĩre mwabũga naye ati, Mukama, oko ndambĩ eno alimukumba. Hamatakya biro bini aholĩre.

⁴⁰Yesu mwamubwira ati, Mondetakubwira nyiti, Wamĩkĩrĩrya, wasyalola oko lukengerwa lwa Nyamuhanga kwehĩ?

⁴¹Neryo mobalũsyaho erĩbwe. Neryo Yesu mwasumba ameso wuwe ati, Tata, ngakuha ewasĩngya kusangwa wabya ũkanyowa.

⁴²Kandi nyasĩ kʼũkanyowa ebiro byosĩ, nĩkwa ngabũga busana nʼabandu abimene hano, ibatoka erĩkĩrĩrya ko wanyituma.

⁴³Neryo abere abĩbũga emyatsi eyĩ, mwabirikira nʼomulenge munene ati, Lazaro, huluka!

⁴⁴Neryo oyo wabya aholĩre mwahuluka inianasenga-sengĩre omo ngimba oko byala nʼoko bisando, nʼobũsũ buwe ĩbũsengĩre omo lukimba. Yesu mwabwirabo ati, Mumusengule, agende.

⁴⁵Neryo Abayũda bangi abahĩka ewa Marĩa, mobalangira ebyo Yesu akola, neryo mobamwĩkĩrĩrya.

⁴⁶Nĩkwa abandi ba kubo mobaya ewa Bafarĩsayo, mobabwirabo emyatsi eyo Yesu akola.

⁴⁷Neryo abahererĩ bakulu nʼAbafarĩsayo mobahĩndanĩa erĩbũgĩro, mobabũga bati, Tuyire tuti kwehĩ? Kusangwa omundu oyũ akakola ebitiko-tiko bingi.

⁴⁸Twamamuleka tutya, abandu bosĩ basyamwĩkĩrĩrya, nʼAbaroma basyasa ĩbalũsyaho eHekalũ nʼekihanda kyetu kyosĩ.

⁴⁹Nĩkwa omuguma wa kubo, ye Kayafa, oyo wabya Mũhererĩ Mukulu oko bahererĩ bosĩ oko mwaka oyo, mwabwirabo ati, Sĩmwasĩkĩ nʼahake!

⁵⁰Kandi sĩmweganĩraya ngoko lyowene busana nenyũ, omundu muguma iniahola busana nʼabandu, ekihanda kyosĩ isikyahera.

⁵¹Nĩkwa mwatabũga ebĩ omo hamũlĩ yiwe ĩyowene, nĩkwa kusangwa abya Mũhererĩ Mukulu oko bahererĩ bosĩ oko mwaka oyo, mwaminyerera ati, Yesu akandisyaholera ekihanda kyʼAbayũda.

⁵²Kandi si busana nʼekihanda ekyo kisa, nĩkwa atoke erĩhĩndanĩa haguma omo ndeko nguma abana ba Nyamuhanga abapanza-panzĩre ehosĩ.

⁵³Neryo erĩtsũka oko kiro ekyo, mobaya embĩta yʼerĩĩta Yesu.

⁵⁴Neryo Yesu mwataswalendera nʼeriminyikala omo katĩkatĩ kʼAbayũda, nĩkwa mwalũa eyo, mwaya omo kihugo ekyabya hakũhĩ nʼembwarara, oko mũyĩ owakahulawa mo Efũraĩmũ, neryo mwĩkalako nʼabiga.

⁵⁵Neryo Ebiro Bikulu byʼAbayũda byʼErikiruka byabya hakũhĩ, kandi, abandu bangi abalũa okolĩ mobahetukira eYerũsalema embere wʼEbiro Bikulu byʼErikiruka, bati bakwame emitsye yʼerĩyerya.

⁵⁶Neryo mobasonda-sonda Yesu, kandi omugulu babya bakimana omo Hekalũ, mobakanĩa omo katĩkatĩ kabo bati, Mũtĩkĩ? Muti anemwendiasa oko Biro Bikulu bino kwehĩ?

⁵⁷Neryo abahererĩ bakulu nʼAbafarĩsayo babya ibabiritegeka bati omundu amaminya ahali Yesu, atũlego, batoke erimutsimba.