Read nande Yoane 12 Bible Online

Yoane 12 - nande bible

Yoane 12

¹Neryo ebiro ndatu embere wʼEbiro Bikulu byʼErikiruka, Yesu mwahĩka eBetanĩa, aho Lazaro abya, oyo Yesu alũbũkaya oko baholĩ.

²Eyo mobamũhũkĩra ebyalya byʼobũgenĩ. Marata abya akahũkũla, nĩkwa Lazaro abya ukwʼabo babya oko mesa haguma na Yesu.

³Neryo Marĩa mwĩmya ekihande kyʼelĩtre kyʼamagũta wʼenardo awakakumba ndeke kutsibu awʼobũgũlĩ bunene, mwahakabya ebisando bya Yesu, kandi mwasangula ebisando biwe omo nzwiri siwe, nʼenyũmba yosĩ moyũsũla mwʼekikumbo kibuya kyʼamagũta ayo.

⁴Nĩkwa Yũda Ĩskarĩota, omuguma gʼoko biga buwe, oyo wahotera Yesu, mwabũga ati,

⁵Busana nakĩ amagũta aya sialitagũlĩbwa busana nʼesyofranka magana asatu, isyahabwa oko bera kwehĩ?

⁶Nĩkwa Yũda abũga atya butsira erĩbũga ati atsomene abera, nĩkwa kusangwa abya mũrahĩ. Yũda abya akaheka engunza ĩnĩakĩba esyahĩrawa muyo.

⁷Neryo Yesu mwabũga ati, Mumuleke! Abikego busana nʼekiro nasyatabwa!

⁸Kusangwa muli nʼabera haguma nenyũ ebiro byosĩ, nĩkwa ĩngye Sindi haguma nenyũ ebiro byosĩ.

⁹Neryo endeko nene yʼAbayũda mobowa Yesu kwʼali eBetanĩa. Neryo mobasa, butsira busana na Yesu ĩyowene, nĩkwa batoke erilangira Lazaro nibya, oyo Yesu alũbũkaya oko baholĩ.

¹⁰Nĩkwa abahererĩ bakulu mobaya embĩta yʼerĩĩta Lazaro nibya.

¹¹Kusangwa busana na Lazaro Abayũda bangi mobalũa kubo mobĩkĩrĩrya Yesu.

¹²Engyakya endeko nene eyahĩka oko Biro Bikulu ebyo, omugulu bowa ambu Yesu akandĩhĩka eYerũsalema,

¹³Mobatwa oko bisanza byʼamabondo, mobayahĩndana naye, nʼeribirikira bati, Nyamuhanga apipawe! Nyamuhanga atsumule oyukasa omo lĩna lyʼOmwami Mukulu, iye yo Mwami wa Ĩsraelĩ.

¹⁴Neryo Yesu mwabana ekyana kyʼepunda, mwĩkala kukyo, ngoko kĩsakĩre kiti,

¹⁵Uwe Mwali wʼeSĩonĩ, Sigubahe! Lebaya, omwami wawe akasa, Ĩnĩanĩkere oko kyana kyʼepunda.

¹⁶Abiga biwe mobataminya emyatsi eyĩ erĩmbere, nĩkwa omugulu Yesu ahabawa olukengerwa, mobibuka ngoko emyatsi eyĩ yasakawa busana naye, kandi ngoko bamukolera emyatsi eyĩ.

¹⁷Neryo endeko eyabya haguma na Yesu omugulu abirikira Lazaro omwʼisinda nʼerĩmũlũbũkya oko baholĩ, moyatũla omwatsi oyo busana naye.

¹⁸Kyaleka endeko eyo ĩyahĩndana na Yesu, kusangwa bowa kwʼakola ekitiko-tiko ekĩ.

¹⁹Neryo Abafarĩsayo mobabwirana bati, Mwamalangira, sitwetatokakĩ! Mũlebaye, ekihugo kyosĩ kyamamukwama!

²⁰Neryo habya Abagĩrĩkĩ omo katĩkatĩ kabo abahetukira eYerũsalema erĩyaramya omo Biro Bikulu ebyo.

²¹Aba mobahĩka uku Fĩlĩpo, oyo wabya wʼeBetesaĩda yʼeGalĩlaya. Mobamũbũlya bati, Mukama, twanzĩre erilola uku Yesu.

²²Fĩlĩpo mwayabwira Anderea, neryo Anderea na Fĩlĩpo mobabwira Yesu.

²³Neryo Yesu mwasũbĩryabo ati, Endambĩ yabĩrĩhĩka, Omugala wʼOmundu ahabawe olukengerwa.

²⁴Kwenene, kwenene ngababwira, embuto yʼengano yamatenditogera omo kitaka, nʼerihola, ikabyaho ĩyoyene; nĩkwa yamahola, ikaheta kwʼesyombuto nyingi.

²⁵Oyukanza engebe yiwe akatalayayo; nʼoyũkakwa engebe yiwe yʼobusu omo kihugo kino, asyabikayo oko ngebe yʼerikota.

²⁶Omundu amanyikolera, anyikwame, nʼaho nyiri ha nʼaho omugombe wage asyabya. Omundu amanyikolera, Tata asyamũsĩkya.

²⁷Na lino omutima wage amahũkahũka; neryo nyĩbũgekĩ kwehĩ? Nyiti, Tata ũnyĩlamaye oko ndambĩ eyĩ kwehĩ? Nĩkwa busana nʼomwatsi oyũ namahĩka oko ndambĩ eyĩ.

²⁸Uwe Tata, ulete olukengerwa oko lĩna lyawe! Neryo omulenge mwalũa elubula ati, Nabĩrĩhamyalyo, kandi nasyaswahamyalyo.

²⁹Neryo endeko eyabya ihangene hakũhĩ nʼerĩowa omulenge oyo, mobabũga bati, Bwamalũma! Abandi bati, Omũlaĩka amabũga naye!

³⁰Yesu mwasũbĩrya, ati, Omulenge oyũ Sĩalĩtabũga busana nage, nĩkwa busana nenyũ.

³¹Lino eritswera lyamahĩka oko kihugo kino; lino omũtabalĩ wʼekihugo kino asyaguswa eyĩhya.

³²Nage, namasumbirwa endata oko kihugo, nasyakurira abandu bosĩ bʼũkwʼĩngye.

³³Nĩkwa abũga ebĩ iniakahula omũsĩndo wʼoluholo olo asyahola.

³⁴Neryo endeko moyamũsũbĩrya iti, Twabĩrĩowa omo Migambo iti Kristo ayĩkala kera na kera. Neryo ũkabũga uti kwehĩ? Uti, Omugala wʼOmundu atolere iniasumbirwa endata. Omugala wʼOmundu oyũ nindi kwehĩ?

³⁵Neryo Yesu mwabwirabo ati, Ekyakakala kikine kandi omo katĩkatĩ kenyũ oko katambĩ kake. Mulendere omugulu mukine nʼekyakakala ekyo, omwĩrĩmya siabatange. Oyukalendera omo mwĩrĩmya sĩasĩ eyo akaya.

³⁶Omugulu muli nʼekyakakala mwĩkĩrĩraye ekyakakala, mutoke eribya bandu bʼekyakakala. Yesu abere abĩbũga emyatsi eyĩ, mwalũaho mwayĩbĩsa kubo.

³⁷Nĩkwa nomo anakola ebitiko-tiko bingi embere wabo, mobatamwĩkĩrĩrya.

³⁸Ekĩnywa kyʼomũmĩnyererĩ Ĩsaya ikyatoka eribererera ekyabũga kiti, Omwami Mukulu, nindi yo wabĩrĩkĩrĩrya erĩtũlago lyetu kwehĩ? Omwami Mukulu abirĩbĩsũlĩra amaka wuwe ukundi kwehĩ?

³⁹Busana nʼomwatsi oyũ, mobatatoka erĩkĩrĩrya, kusangwa Ĩsaya mwaswabũga ati,

⁴⁰Nyamuhanga abĩrĩrĩba ameso wabo, Abĩrĩkalya emitima yabo, Ameso wabo syalangire, Nʼemitima yabo siyiminye, Kandi sibabinduke, Nage, ngalamyabo.

⁴¹Ĩsaya mwabũga emyatsi eyĩ kusangwa mwalangira olukengerwa lwa Yesu, kandi mwamwahula.

⁴²Nĩkwa abatabalĩ bangi bʼAbayũda mobĩkĩrĩrya Yesu; nĩkwa busana nʼAbafarĩsayo mobatakangyalyo, bakasyahigwa omo nyũmba yʼerĩhĩndanamo.

⁴³Kusangwa mobanza erĩsĩmwa nʼabandu kwilaba erĩsĩmwa na Nyamuhanga.

⁴⁴Neryo Yesu mwabũga nʼomulenge munene ati, Oyũkanyĩkĩrĩraya, sĩalĩnyĩkĩrĩraya ĩngyowene, nĩkwa akĩkĩrĩraya oyo wanyituma.

⁴⁵Kandi oyukanyilolako, akalola ukwʼoyo wanyituma,

⁴⁶Nabĩrĩhĩka muna-kihugo ngʼekyakakala, neryo oyũkanyĩkĩrĩraya sĩasyĩkala omo mwĩrĩmya.

⁴⁷Kandi omundu amowa ebĩnywa byage, isialibikabyo, sindimutswera, kusangwa mondasa eritswera ekihugo, nĩkwa nasa erĩlamya ekihugo.

⁴⁸Oyukanyigana, isialilangira emyatsi yage, awite oyukamutswera; ekĩnywa ekyo nabũga kyo kyasyamutswera oko kiro kyʼenyũma-nyũma!

⁴⁹Kusangwa mondabũga omwʼiyihana lyage, nĩkwa Tata oyo wanyituma abirinyihana ebyo nangabũga nʼebyo nangatũla.

⁵⁰Kandi nyĩnasĩ erihana liwe ni ngebe yʼerikota. Neryo emyatsi eyo ngabũga, ngabũga ngoko Tata abirimbwira.