Read nande Yoane 16 Bible Online

Yoane 16 - nande bible

Yoane 16

¹Nabiribabwira emyatsi eyĩ, neryo simwangahũka-hũkya emitima yenyũ.

²Basyabahiga-hĩganĩa omo manyũmba wabo wʼerĩhĩndanamo. Kandi omugulu asyasa, neryo oyukabĩta asyaganĩrya ngʼakakola omũbĩrĩ wa Nyamuhanga.

³Basyakola emyatsi eyĩ, kusangwa sibetaminya Tata kutse ĩngye.

⁴Nĩkwa nabiribabwira emyatsi eyĩ, neryo omugulu endambĩ yabo yasyahĩka, imwatoka erĩyĩbũkyayo ngoko mababwira. Mondababwira emyatsi eyĩ erĩmbere kusangwa nabya haguma nenyũ.

⁵Nĩkwa lino ngaya ukwʼoyo wanyituma; kandi sihali mundu ũkwʼĩnywe oyũkambũlaya ati, Ukaya hahi kwehĩ?

⁶Nĩkwa kusangwa nabiribabwira emyatsi eyĩ, emitima yenyũ ĩkũsũla nʼobũlĩge.

⁷Ngababwira omwatsi wʼekwenene nyiti, Lyowene busana nenyũ inagenda, kusangwa namatendigenda, Omũwatĩkya isiendisyabahĩkako. Nĩkwa namagenda nasyabatumiraye.

⁸Naye asyabya asa, asyasĩnga ekihugo busana nʼebibi, kandi busana nʼomwatsi wʼebitunganene, kandi busana nʼomwatsi wʼeritswera lya Nyamuhanga.

⁹Asyasĩngabo omo mwatsi wʼebibi, kusangwa sĩbalĩnykĩrĩraya.

¹⁰Kandi asyasĩngakyo busana nʼeritunganene, kusangwa ngaya uku Tata, nenyũ imutaswanyilolako.

¹¹Kandi asyasĩngabo omo mwatsi wʼeritswera, kusangwa omũtabalĩ wʼekihugo kino abiritswerwa.

¹²Ĩngye nyiwite eyindi myatsi mingi yʼeribabwira, nĩkwa Simwangatoka erĩowayo lino.

¹³Nĩkwa omugulu Omũlĩmũ wʼomwatsi wʼekwenene asyasa, iye asyabasondola omo myatsi yosĩ yʼekwenene, kusangwa siendĩsyabũga omo hamũlĩ yiwe ĩyowene, nĩkwa asyababwira ebyo akowa, kandi asyabatũlĩra emyatsi eyo eyĩkandĩsyahĩka.

¹⁴Asyanyipipa, kusangwa asyimya emyatsi eyo ngabũga nʼerĩbatũlĩrayo.

¹⁵Emyatsi yosĩ eyo Tata awite ni yage; kyaleka ĩnabũga nyiti, Asyĩmya emyatsi eyo ngabũga, nʼerĩbatũlĩrayo.

¹⁶Hakĩsĩya katambĩ kake, neryo imutaswanyilolako; kandi enyũma wʼaho hake, imwasyanyilolako.

¹⁷Abandi bʼoko biga buwe mobabwirana bati, Ekĩ ni kyahi? Ekyo akatubwira ati, Hakĩsĩya katambĩ kake imutaswanyilolako; kandi enyũma wʼaho hake, imwaswanyilolako. Kandi ati, Kusangwa ngaya uku Tata.

¹⁸Neryo babya bakabũga bati, Ekĩ ni kyahi akabũga ati, Akatambĩ kake kwehĩ? Sĩtwasĩ ebyo akahula.

¹⁹Yesu mwaminya ko bakasonda erĩmũbũlya, neryo mwabwirabo ati, Mongabũga nyiti, Hakĩsĩya katambĩ kake, imutaswanyilolako, kandi enyũma wʼaho hake, imwasyanyilolako. Ebyo byo mũkabũlaya omo katĩkatĩ kenyũ kwehĩ?

²⁰Kwenene, kwenene ngabũga nenyũ nyiti, Mwasyalira nʼerilaka, nĩkwa ekihugo kyasyatsema. Mwasyabya nʼobũlĩge, nĩkwa obũlĩge bwenyũ bwasyahinduka mo butseme.

²¹Omũkalĩ omugulu akakunda ali nʼobũlĩge kusangwa endambĩ yiwe yabĩrĩhĩka; nĩkwa omugulu amabibuta omwana, sialisyibuka kandi eriagalwa liwe, nĩkwa akatsema ati, Omwana amabibutwa omo kihugo.

²²Neryo, nenyũ nibya muli nʼobũlĩge lino; nĩkwa nasyaswabalolako kandi, nʼemitima yenyũ yasyatsema, kandi sihali mundu oyo wasyabasagula obutseme bwenyũ.

²³Neryo oko kiro ekyo sĩmwendĩsyanyĩbũlyakĩ. Kwenene, kwenene ngababwira, Ekĩndũkĩ mwasyabũlya Tata, asyabahakyo kusangwa muli biga bage.

²⁴Erĩhĩka lino, sĩmwetabũlyakĩ omo lĩna lyage; mũbũlaye, neryo mwasyabanakyo, obutseme bwenyũ butoke erĩhĩkana.

²⁵Nabiribabwira emyatsi eyĩ omo mĩsyo. Omugulu asyasa neryo sindiendisyababwira umu mĩsyo, nĩkwa nasyababwira ndeke-ndeke emyatsi ya Tata.

²⁶Oko kiro ekyo, mwasyabũlya omo lĩna lyage; sĩndĩbũga nenyũ nyiti, Nasyabũlya Tata busana nenyũ;

²⁷kusangwa ye Tata abanzĩre. Abanzĩre kusangwa mũnyanzĩre, kandi kusangwa mwabĩrĩkĩrĩrya ko nalũa ewa Nyamuhanga.

²⁸Nalũa uku Tata, kandi monahĩka omo kihugo; neryo ngalũa omo kihugo nʼeriya uku Tata.

²⁹Neryo abiga buwe mobamubwira bati, Lero, ũkabũga netu ndeke-ndeke, sũlĩbũga omo mĩsyo.

³⁰Lino tũnasĩ ko wasĩ emyatsi yosĩ, kandi, suli nʼobwaga omundu akakũbũlya mwatsi. Ekĩ kikaleka ĩtwĩkĩrĩrya ko walũa uku Nyamuhanga.

³¹Yesu mwasũbĩryabo ati, Mwamĩkĩrĩrya lino kwehĩ?

³²Lebaya, endambĩ yasyasa, kandi endambĩ eyo yabĩrĩhĩka, omugulu mwasyapanza-panzirwa obuli mundu eka wuwe, mwasyanyĩsĩga ĩngyowene. Nĩkwa Sindi ĩngyowene, kusangwa Tata ali haguma nage.

³³Namababwira emyatsi eyĩ imwabana Obuholo busana nʼerimatikana nage. Omo kihugo mwasyabana erĩendererĩbwa. Nĩkwa muhande emitima! Nabĩrĩkĩnda ekihugo!