Read nande Yoane 17 Bible Online

Yoane 17 - nande bible

Yoane 17

¹Neryo Yesu mwabũga emyatsi, neryo mwalalamira elubula ati, Tata endambĩ yabĩrĩhĩka; uhe Omugala wawe olukengerwa, Omugala atoke erikuha olukengerwa.

²Kandi ngoko wabirimuha ehamũlĩ oko bandu bosĩ, iniatoka eriha engebe yʼerikota oko bosĩ wamuha.

³Neryo eyĩ ni ngebe yʼerikota, abandu bakuminye, uwe Nyamuhanga muguma wʼekwenene, nʼeriminya Yesu Kristo, oyo watuma.

⁴Monakũsĩkya omo kihugo; nabiribuga omũbĩrĩ ogo wamba erikola.

⁵Na lino, Tata, ũnyĩsĩkaye embere syawe, kandi omo lukengerwa olo nabya nalo haguma nawe ekihugo kite kyahangikwa,

⁶Monakũmĩnyĩkalya oko bandu wamba omo kihugo. Babya bawe kandi mowambabo. Kandi babirikenga ekĩnywa kyawe.

⁷Na lino, banasĩ kwʼemyatsi yosĩ eyo wamba ĩkalũa ukʼuwe.

⁸Kusangwa ebĩnywa ebyo wamba nabirihabyobo, kandi babiriangirirabyo, baririminya kwenene ko nalũa ewawe, kandi mobĩkĩrĩrya ko wanyituma.

⁹Ngasabirabo. Sindisabira ekihugo, nĩkwa ngasabira abo wamba, kusangwa ni bawe.

¹⁰Nʼemyatsi yosĩ ni yawe, nʼemyatsi yawe ni yage, kandi emyatsi eyo yabĩrĩnyĩsĩkya.

¹¹Neryo lino ngakũhĩkako, nage sinyikiri kandi omo kihugo, nĩkwa ibo bali omo kihugo. Tata Iwe Ũbũyĩrĩre! Ũtegayebo omo bũtokĩ bwʼerĩna lyawe, eryo wamba, babye muguma, ngoko tuli muguma.

¹²Omugulu nabya nabo, monateyabo omo bũtokĩ bwʼerĩna lyawe, eryo wamba. Monateyabo, kandi mohatahera mundu nʼomuguma, yo nʼowʼerihera, busana nʼerĩberererya Amasako.

¹³Neryo ngasa ukʼuwe, nʼemyatsi eyĩ ngabũgayo omo kihugo, ibatoka eribya nʼobutseme bwage obũhĩkene omo mitima yabo.

¹⁴Monahabo ekĩnywa kyawe, nʼekihugo mokyakwabo obusu, kusangwa si bʼekihugo, ngoko nyite wʼekihugo.

¹⁵Sĩndĩkũbũlaya nyiti, Ũlũsayebo omo kihugo, nĩkwa ngakũbũlaya nyiti, Ũtegayebo oko Mubi.

¹⁶Si bʼekihugo, ngoko nyite wʼekihugo.

¹⁷Uhigulebo omo mwatsi wʼekwenene. Ekĩnywa kyawe ni mwatsi wʼekwenene.

¹⁸Monatumabo omo kihugo, ngoko wanyituma omo kihugo.

¹⁹Kandi ngayiha ukʼuwe busana nabo, ibatoka eribya bawe kwenene.

²⁰Sindisaba busana nʼaba ĩbobene, nĩkwa busana nʼabakandisyanyĩkĩrĩrya busana nʼerĩtũlago lyabo.

²¹Ngasaba nyiti abosĩ babye muguma. Uwe Tata! Nyiti, bamatikane ũkwʼĩtwe, ngoko umatikene kwĩngye, kandi nage nyimatikene ukʼuwe, neryo ekihugo kĩkĩrĩraye kʼuli inina we wanyituma.

²²Nabirihabo olukengerwa olo wabirimba, babye muguma ngoko tuli muguma.

²³Ĩngye nyimatikene kubo, nawe umatikene ũkwʼĩngye, nabo bahĩkane omo buguma, neryo ekihugo kiminye kʼuli inina we wanyituma, kandi wabirianzabo, ngoko wabirinyanza.

²⁴Tata, ngasonda nyiti, abo wabirimba babye haguma nage, balangire olukengerwa lwage olo wabirimba; kusangwa wanyanza ekihugo isikiri kyahangikwa.

²⁵Uwe Tata uwe utunganene! Ekihugo nomo kitenetakuminya, nĩkwa nabirikuminya, kandi aba nabo babirikuminya kʼuli inina we wanyituma.

²⁶Kandi nabĩrĩkũmĩnyĩsya kubo neryo nasyaswakũmĩnyĩsya; neryo olwanzo olo wanyanzamo lubye omo mitima yabo, nage inamatikana nabo.