Read nande Yoane 18 Bible Online

Yoane 18 - nande bible

Yoane 18

¹Neryo Yesu abere abisaba ebĩnywa ebĩ, mwahongoka nʼabiga buwe, mwasoka omusya wʼeKĩdũronĩ. Neryo aho habya eririma, neryo Yesu nʼabiga buwe mobingira omwʼirima eryo.

²Nĩkwa Yũda nibya oyo wamuhotera, mwaminyaho, kusangwa Yesu abya ĩnĩakahĩndanaho nʼabiga buwe esyongendo nyingi.

³Neryo Yũda mwaya omwʼirima eryo nʼomulondo wʼekisambala kyʼAbaroma ekyo ahabawa, haguma nʼabateya abatumawa nʼabahererĩ bakulu nʼAbafarĩsayo. Kandi mobahĩka ĩbanahekĩre esyotala, nʼebisosomole, nʼebindu byʼamalwa.

⁴Neryo Yesu abya asĩ emyatsi yosĩ eyikandĩmũhĩkako, neryo mwahuluka mwabũlyabo ati, Mukasonda-sondandi kwehĩ?

⁵Mobamũsũbĩrya bati, Yesu Omũnazaretĩ. Neryo Yesu mwabwirabo ati, Nĩ ĩngye! Neryo Yũda oyo wamuhotera, abya iniahangeneho haguma nabo.

⁶Neryo Yesu abere abwirabo ati, Nĩ ĩngye, mobasuba enyũma mobawa oko kitaka.

⁷Kandi Yesu mwabũlyabo ati, Mukasondasondandi kwehĩ? Nabo bati, Yesu Omũnazaretĩ.

⁸Yesu mwasũbĩryabo ati, Nabiribabwira kwʼindi nĩ ĩngye. Mwamabya ĩnĩ ĩngye mukasonda-sonda, muleke aba bagende.

⁹Erĩberererya ekĩnywa ekyo Yesu abũga ati, ukwʼabo wamba sĩndĩtatalya nʼomuguma.

¹⁰Neryo Sĩmonĩ Petero abya nʼomũyalĩ omo lubo. Neryo mwakulago, mwabandago omugombe wʼomũhererĩ Mukulu oko bahererĩ bosĩ, mwatwa okũtũ kuwe kwʼamali. Erĩna lyʼomugombe oyo lyabya Malko.

¹¹Neryo Yesu mwabwira Petero ati, Hĩra omũyalĩ gʼomo lubo. Sindiendĩpũlya olũtehĩ lwʼamalĩge olo Tata abirimba kwehĩ?

¹²Neryo omulondo wʼekisambala kyʼAbaroma, nʼomukulu wabo nʼabateya bʼAbayũda, mobahamba Yesu mobamuboha.

¹³Neryo mobamutwala erĩmbere uku Ana, kusangwa abya ĩse-byala wa Kayafa, oyo wabya Mũhererĩ Mukulu oko bahererĩ bosĩ oko mwaka oyo.

¹⁴Nĩkwa Kayafa abya oyo wahana Abayũda ati, Lyowene omundu muguma iniahola busana nʼabandu bosĩ.

¹⁵Neryo Sĩmonĩ Petero, nʼogundi mwiga mobakwama Yesu. Neryo ogundi mwiga oyo abya asĩbwe nʼomũhererĩ Mukulu oko bahererĩ bosĩ, neryo mwingira haguma na Yesu omo kibuga kyʼomũhererĩ Mukulu oko bahererĩ bosĩ.

¹⁶Nĩkwa Petero mwimana oko lũkyo ahĩhya. Nĩkwa ogundi mwiga oyo wabya asĩbwe nʼomũhererĩ Mukulu oko bosĩ, mwahulukira eyĩhya, mwakanĩa nʼomũteya wʼolũyĩ, neryo mwĩngĩrya Petero.

¹⁷Neryo omwana-muto mugombe oyo wategaya olũkyo, mwabũga na Petero ati, Suli muguma gʼoko biga bʼomundu oyũ kwehĩ? Petero mwasũbĩrya ati, Sĩ ĩngye!

¹⁸Neryo habya eritsuku, nʼabagombe nʼabateya mobakya omuliro wʼamakala, neryo babya bimeneho bakota kugo. Petero naye mwayaho, mwimanaho, mota oko muliro.

¹⁹Neryo Omũhererĩ Mukulu oko bahererĩ bosĩ mwabũlya Yesu busana nʼabiga buwe, kandi mwamũbũlya busana nʼerikangĩrĩrya liwe.

²⁰Yesu mwamũsũbĩrya ati, Nabĩrĩbũga embere syʼabandu nʼeriminyikala ndeke. Ebiro byosĩ monakangĩrĩrya omo manyũmba wʼerĩhĩndanamo, nʼomo Hekalũ aho Abayũda bakahĩndana. Mondabũga kĩnywa kyʼobũbĩso-bĩso.

²¹Ukanyĩbũlaya busana nakĩ kwehĩ? Ũbũlaye abandu abahulikirira ebyo nabwirabo. Lebaya, aba banasĩ ebyo nabũga.

²²Neryo Yesu abere abibũga ebĩ, omuguma gʼoko balembya oyo wabya imeneho hakũhĩ, mwaswĩrya Yesu ekĩkũndĩ ati, Ũkasũbĩraya Omũhererĩ Mukulu oko bahererĩ bosĩ yʼutya uti kwehĩ?

²³Yesu mwamũsũbĩrya ati, Namabya ngabũga nabi, Wahule ebibi ebyo. Nĩkwa namabũga kwenene, ũkanyĩswĩrĩrayakĩ kwehĩ?

²⁴Neryo Ana mwatuma Yesu ĩnĩanabohĩre, uku Kayafa, Omũhererĩ Mukulu oko bahererĩ bosĩ.

²⁵Neryo Sĩmonĩ Petero abya imene akota oko muliro, Neryo abandi mobamubwira bati, Nawe suli muguma gʼoko biga buwe kwehĩ? Petero mwagana ati, Sĩ ĩngye.

²⁶Neryo omuguma gʼoko bagombe bʼomũhererĩ Mukulu oko bahererĩ bosĩ, ini wʼekĩtũnga kyʼoyo Petero atwa kwʼokũtũ, mwamũbũlya ati, Mondakulolako omwʼirima haguma naye kwehĩ?

²⁷Neryo Petero mwagana kandi. Neryoneryo engoko-lume moyabika.

²⁸Neryo mobalũsya Yesu ewa Kayafa, mobamutwala omo kikali kyʼomũtabalĩ Pilato. Nĩkwa bwabya ngyakyangyakya. Neryo Abayũda mobataya omo kikali kya Pilato bati sĩbahalaye omo Migambo, batoke erirya oko Biro Bikulu byʼErikiruka.

²⁹Neryo Pilato mwahulukirabo eyĩhya, mwabũlyabo ati, Omundu oyũ, mukamuhandikirira ũkũkĩ kwehĩ?

³⁰Mobamũsũbĩrya bati, Omundu oyũ atalwe mukola-nabi nga sitwetamuleta ukʼuwe.

³¹Pilato mwabwirabo ati, Mũmwĩmaye ĩmwebene, mumutswere omo migambo yenyũ. Abayũda mobamubwira bati, Situwite hamũlĩ yʼerĩĩta omundu nʼomuguma.

³²Mobyabya bitya erĩberererya ekinywa ekyo Yesu abũga akamĩnyĩsya omũsĩndo wʼoluholo akandisyahola.

³³Neryo Pilato mwasuba omo kikali kyʼomũtabalĩ, mwabirikira Yesu, mwamũbũlya ati, Uli mwami wʼAbayũda kwehĩ?

³⁴Yesu mwamũsũbĩrya ati, Ni iwe Ũkaganĩraya uwowene, kutse ni bandi bakubwira busana nage kwehĩ?

³⁵Pilato mwasũbĩrya ati, Ĩngye indi Mũyũda kwehĩ? Ekihanda kyawe nʼabahererĩ bakulu bo bakuleta ũkwʼĩngye; wamakolakĩ kwehĩ?

³⁶Yesu mwasũbĩrya ati, Obwami bwage si bwʼekihugo kino. Kumbe obwami bwage bũlwe bwʼekihugo kino, kumbe abagombe bage bangalwa isinangahoterwa nʼAbayũda. Nĩkwa obwami bwage si bwʼeno.

³⁷Neryo Pilato mwabũga ati, Uli mwami kwehĩ? Yesu mwamũsũbĩrya ati, Ũkabũga ko ndi mwami. Busana nʼekĩ nabutawa kandi nabĩrĩhĩka omo kihugo busana nʼekĩ, erĩtũla omwatsi wʼekwenene. Obuli mundu wʼomwatsi wʼekwenene akowa omulenge wage.

³⁸Pilato mwabũlya Yesu ati, Omwatsi wʼekwenene nĩkĩ kwehĩ? Pilato abere abũga atya, mwahulukira eyĩhya ahali Abayũda, mwabwirabo ati, Ĩngye sinditamubana ko musango.

³⁹Nĩkwa ĩnywe muwite omutsye wʼeribaboholerwa omundu muguma omo Biro Bikulu byʼErikiruka. Neryo mwanzĩre inababoholera Omwami wʼAbayũda kwehĩ?

⁴⁰Nabo mobabirikira kutsibu kandi bati, Butsira omundu oyũ, twanzĩre Baraba. Nĩkwa Baraba abya mũnyeyĩ.