Read nande Yoane 20 Bible Online

Yoane 20 - nande bible

Yoane 20

¹Neryo oko kiro kyʼerĩtsũka kyʼeYenga, omwĩrĩmya iniakineyo, Marĩa Magdalene mwasa okwʼisinda, neryo mwalangira erĩbwe ĩryabĩrĩlũsĩbwa okwʼisinda.

²Nĩkwa mwatibita mwaya eyiri Sĩmonĩ Petero nʼogundi mwiga oyo Yesu abya anzĩre, neryo mwabwirabo ati, Balũsĩrye Omukama yʼomwʼisinda, kandi Sĩtwasĩ aho bamũhĩrĩre!

³Neryo Petero mwahongoka nʼogundi mwiga oyo, mobaya okwʼisinda.

⁴Nĩkwa ababiri bosĩ mobatibitira iguma, nʼogundi mwiga oyo mwalengya Petero yʼamagulu, mwamutanga okwʼisinda.

⁵Neryo mũnama mwasamaliramo, mwalangira esyongimba syʼekĩtanĩ ĩsĩnĩkĩryeho, nĩkwa mwatingiramo.

⁶Neryo Sĩmonĩ Petero mwahĩkaho, ĩnĩanakwamĩre ogundi oyo, neryo mwingira omwʼisinda. Naye mwalangira esyongimba syʼekĩtanĩ ĩsĩnĩkĩryeho,

⁷nʼekitambala ekyabya oko mutwe, ĩsĩkĩkĩrye haguma nʼesyongimba syʼekĩtanĩ, nĩkwa ĩkĩrĩngĩre aho wakyo.

⁸Neryo ogundi mwiga oyo watsũka erĩhĩka okwʼisinda mwingiramo nibya, naye mwalangira kandi mwĩkĩrĩrya.

⁹Kusangwa isibebaminya Amasako, kwʼatolere erĩlũbũka oko baholĩ.

¹⁰Neryo abiga abo mobasyasuba eka wabo.

¹¹Nĩkwa Marĩa abya imene eyĩhya okwʼisinda akalira. Neryo abere anemulira, mũnama mwasamalira omwʼisinda.

¹²Neryo mwalola oko bamalaĩka babiri ibambite esyongimba nyeru-nyeru, ĩbanĩkere aho mubiri wa Yesu abya ĩkĩrye, omuguma aho musegemo, nʼogundi aho bĩlambĩryo.

¹³Nabo mobamũbũlya bati, Mũkalĩ, busana nakĩ ukalira kwehĩ? Naye mwabwirabo ati, Kusangwa batwere Omukama wage, nage Sĩnyasĩ aho bamũhĩrĩre.

¹⁴Neryo abere abĩbũga atya, mwakeba, mwalangira Yesu inianimeneho, nĩkwa ĩsĩasĩ kwʼali ini Yesu.

¹⁵Yesu mwamũbũlya ati, Mũkalĩ, ukalira busana nakĩ kwehĩ? Ukasonda-sondayandi kwehĩ? Naye mwaganĩrya ati yo mũlĩmĩ wʼeririma, mwamubwira ati, Mukama, wamabya ini we wamutwere ehandi, unyibwire aho wamũhĩrĩre, nage ngandimutwala.

¹⁶Neryo Yesu mwamubwira ati, Marĩa! Naye mwamukebera, mwamubwira omo Kiebranĩa ati, Rabonĩ, kiti, Mũkangĩrĩrya.

¹⁷Yesu mwamubwira ati, Sũnyĩtũleko Kusangwa sindinahetukira ewa Tata. Nĩkwa ugende oko bagala betu ubwirebo uti ngahetukira uku Tata wage, na Tata wenyũ, nʼuku Nyamuhanga wage, nʼuku Nyamuhanga wenyũ.

¹⁸Neryo Marĩa Magdalene mwayabwira abiga ati, Nabirilola oko Mukama. Kandi ati Omukama mwamubwira emyatsi eyĩ.

¹⁹Neryo omwʼĩgolo-golo lyʼekiro ekyo, ekyʼerĩtsũka eyenga, abiga mobahĩndana omo nyũmba nʼesyonyũyĩ ĩsĩnakĩngĩre, busana nʼeriubaha Abayũda. Neryo Yesu mwasa, mwahangana omo katĩkatĩ kabo. Mwabwirabo ati, Obuholo ũkwʼĩnywe!

²⁰Neryo abere abĩbũga atya, mwakangyabo ebyala biwe, nʼolukanga luwe. Neryo abiga mobatsema omugulu balangira Omukama.

²¹Neryo Yesu mwaswabwirabo ati, Obuholo kwʼĩnywe. Ngoko Tata anyituma, nage ko ngabatuma nyitya.

²²Abere abĩbũga atya, mwahumulira kubo ati, Mwangirire Omũlĩmũ Abũyĩrĩre.

²³Mwamabuyira ebibi byʼabandu, ibyamabibuyirwa kubo; mwamatendibuyira ebibi byʼabandu, ibyamabyegekwa kubo.

²⁴Nĩkwa Toma, omuguma gʼokwʼĩkũmĩ nʼababiri, oyo wahulawa mo Muhasa, siabya haguma nabo omugulu Yesu ahĩka.

²⁵Neryo abandi biga mobamubwira bati, Twabirilola oko Mukama! Nĩkwa Toma mwabwirabo ati, Namatendilangira engolũ yʼemĩsũmalĩ omo byala biwe, nʼerĩhĩra omunwe wage gʼomo myanya yʼemĩsũmali nʼerĩhĩra ebyala byage omo lukanga luwe, sindiendĩsyĩkĩrĩrya nʼahake.

²⁶Neryo enyũma wʼebiro munani abiga buwe babya omo nyũmba, na Toma haguma nabo. Neryo esyonyũyĩ ĩsĩnakĩngĩre, Yesu mwasa, mwahangana omo katĩkatĩ kabo, ati, Obuholo ũkwʼĩnywe!

²⁷Neryo mwabwira Toma ati, Leta omunwe wawe, ulangire ebyala byage. Leta ebyala byawe, ũhĩrebyo omo lukanga lwage, subye bũtĩkĩrĩrya, nĩkwa Wĩkĩrĩraye!

²⁸Toma mwamũsũbĩrya ati, Omukama wage na Nyamuhanga wage!

²⁹Yesu mwamubwira ati, Wabĩrĩkĩrĩrya kusangwa wabirinyilolako kwehĩ? Obutseme buli oko bakanyĩkĩrĩraya bate banyilolako.

³⁰Yesu mwakola ebindi bitiko-tiko bingi embere syʼabiga buwe, ebĩtasakĩre omo kitabu ekĩ.

³¹Nĩkwa ebĩ bĩsakĩre imwatoka erĩkĩrĩrya Yesu kwʼali Kristo, Omugala wa Nyamuhanga, neryo omwʼĩkĩrĩrya erĩ imwabana engebe omo lĩna liwe.