Read nande Yoane 21 Bible Online

Yoane 21 - nande bible

Yoane 21

¹Enyũma wʼemyatsi eyĩ, Yesu mwayĩkangya kandi oko biga buwe oko ngetsi yʼeTĩberĩa. Neryo mwayĩkangya kubo omo mũsĩndo oyũ.

²Sĩmonĩ Petero, na Toma oyukahulawa mo Muhasa, na Natanaelĩ wʼeKana yʼeGalĩlaya, nʼabagala ba Zebedayo, nʼabandi biga babiri, babya haguma.

³Sĩmonĩ Petero mwabwirabo ati, Ĩngye ngayasoha amahere. Mobamubwira bati, Netu tukagenda haguma nawe. Neryo mobahuluka mobingira omo bwato, nʼomo kiro ekyo mobatabana kindu.

⁴Nĩkwa bwabere bwasonda erikya, Yesu mwahangana oko mũsĩke wʼengetsi, nĩkwa abiga mobataminya kwʼali Yesu.

⁵Neryo Yesu mwabũlyabo ati, Bana, munawite amahere kwehĩ? Mobamũsũbĩrya bati, Iyihi.

⁶Neryo mwabwirabo ati, Muguse ebĩsohĩ byʼoko luhande lwʼamali lwʼobwato neryo mwasyabanago. Neryo mobagusa ebĩsohĩ, neryo-neryo mobataluka erikurabyo busana nʼamahere mangi.

⁷Neryo omwiga oyo Yesu abya anzĩre mwabwira Petero ati, Yo Mukama! Neryo omugulu Sĩmonĩ Petero owa kwʼali iyo Mukama, mwambala olukimba luwe, kusangwa abya iniabiriambula esyongimba siwe, neryo mwayigusa omo ngetsi.

⁸Abandi biga mobasa omo bwato buke ibanemukura obutaha-taha ĩbũnoswĩre nʼamahere, kusangwa sibabya hali oko mũsĩke, nga metre makũmĩ mwenda nʼĩbĩrĩ (92 m).

⁹Neryo babere bahĩka oko kitaka, mobalangira omuliro wʼamakala inianeho, nʼamahere oko muliro oyo, nʼobundu.

¹⁰Yesu mwabwirabo ati, Mulete oko mahere ago mukabisoha.

¹¹Sĩmonĩ Petero mwayakura ebĩsohĩ oko kitaka, ĩbĩnoswĩre nʼamahere manenemanene, erĩgana nʼamakũmĩ atanu nʼawasatu (153); nomo anabya mangi, ebĩsohĩ mobitatulika.

¹²Yesu mwabwirabo ati, Mwase mulye. Sihabye omwiga oyo walenga erĩmũbũlya ati, Uwendi kwehĩ? Ĩbanasĩ kwʼali iyo Mukama.

¹³Neryo Yesu mwasa, mwĩmya obundu, mwahabobo. Kandi mwahabo nʼamahere.

¹⁴Eyĩ ni ngendo yʼakasatu Yesu akayĩkangya oko biga; abĩlũbũkĩbwa oko baholĩ.

¹⁵Neryo babere babirya, Yesu mwabũlya Sĩmonĩ Petero ati, Sĩmonĩ, mugala wa Yoane, ũnanyanzĩre kwilaba aba kwehĩ? Naye mwamubwira ati, Ega, Mukama! Ũnasĩ ko nyĩkwanzĩre. Yesu mwamubwira ati, Ũtegaye ebyana byʼesyombũlĩ syage.

¹⁶Neryo Yesu mwamũbũlya engendo yʼakabiri ati, Sĩmonĩ, mugala wa Yoane, ũnanyanzĩre kwehĩ? Naye mwamũsũbĩrya ati, Ega, Mukama, ũnasĩ ko nyĩkwanzĩre. Yesu mwamubwira ati, Ũtegaye esyombũlĩ syage.

¹⁷Neryo Yesu mwamũbũlya engendo yʼakasatu ati, Sĩmonĩ, mugala wa Yoane, ũnanyanzĩre kwehĩ? Neryo Petero mwabya nʼobũlĩge kusangwa Yesu amamũbũlya engendo yʼakasatu ati, Ũnanyanzĩre kwehĩ? Neryo mwamubwira ati, Mukama, ũnasĩ emyatsi yosĩ, ũnasĩ ko nyĩkwanzĩre! Neryo Yesu mwamubwira ati, Ũtegaye esyombũlĩ syage.

¹⁸Kwenene, kwenene ngakubwira nyiti, omugulu wabya mũlwana, wabya igukayĩkũndĩka omo mukaba wawe, igukagenda eyo wanzĩre; nĩkwa ekiro wasyabya mũsyakulu, wasyakakya ebyala byawe, nʼogundi mundu asyakũkũndĩka omukaba, nʼerikutwala aho ũtanzĩre erigenda.

¹⁹Nĩkwa Yesu mwabũga ekĩ iniakahula omũsĩndo wʼoluholo olo Petero asyahola busana nʼeripipa Nyamuhanga. Neryo Yesu mwamubwira ati, Unyikwame!

²⁰Neryo Petero mwabinduka, mwalangira omwiga oyo Yesu anzĩre akakwamabo, yo mwiga oyo wabya akegemera oko kĩkũba kya Yesu okwʼirya lyʼerĩgolo-golo, nʼerĩbũga ati, Mukama, nindi yukakuhotera kwehĩ?

²¹Neryo Petero abere amulangira, mwabũga ati, Mukama, omundu oyo asyayira ati kwehĩ?

²²Yesu mwamubwira ati, Namanza akasĩgalira erĩhĩka aho nasyasira, oyo ni mwatsi wawe kwehĩ? Uwe tanyikwama!

²³Neryo ekĩnywa ekĩ mokyagenda-genda omo katĩkatĩ kʼabalĩkyabo, kiti ambu omwiga oyũ Siendisyahola. Nĩkwa Yesu mwatamubwira ati, Siendisyahola; nĩkwa ati, Namanza akasĩgalira erĩhĩka aho nasyasira, oyo ni mwatsi wawe kwehĩ?

²⁴Oyũ yo mwiga oyũkatũla emyatsi eyĩ, kandi yo wasaka emyatsi eyĩ, netu tũnasĩ erĩtũlago liwe ko ni kwenene.

²⁵Nĩkwa hali eyindi myatsi mingi eyo Yesu akola. Kumbe eyosĩ yalisakawa mo muguma muguma, mbino ekihugo kyosĩ sĩkyangasũngĩre omwanya busana nʼebitabu ebyangasakĩrwe.