Read nande Yoane 4 Bible Online

Yoane 4 - nande bible

Yoane 4

¹Neryo Omukama abere aminya kwʼAbafarĩsayo babĩrĩowa ko Yesu akayira nʼerĩbatĩsya abiga bangi oko ba Yoane,

²nĩkwa Yesu ĩyũtebatĩsaya, nĩkwa abiga buwe bo babatĩsaya.

⁴Kandi kyabya kitolere inialabira oko kihugo kyʼeSamarĩa.

⁵Neryo Yesu mwahĩka oko mũyĩ wʼeSamarĩa owakahulawa mo Sũkarĩ, hakũhĩ nʼekitaka ekyo Yakobo aha mugala wuwe ye Yosefũ.

⁶Neryo ekitehero kya Yakobo kyabyaho. Neryo Yesu, ĩnĩalũhĩre busana nʼolugendo luwe mwĩkala atya oko kitehero. Endambĩ yabya hakũhĩ na saa sĩta.

⁷Omũkalĩ wʼeSamarĩa mwahĩkaho akateha amagetsi. Yesu mwamubwira ati, Umba awʼerĩpũlya.

⁸Kusangwa abiga ba Yesu babya ibabiriya oko mũyĩ eriyagula ebyalya.

⁹Omũkalĩ wʼeSamarĩa oyo mwabwira Yesu ati, Uwe uli Mũyũda, nage indi Mũsamarĩa, ũkanyĩbũlaya awʼerĩpũlya uti kwehĩ? Kusangwa Abayũda baponene nʼAbasamarĩa.

¹⁰Yesu mwamũsũbĩrya ati, Kumbe wasĩ olũsũnzo lwa Nyamuhanga, nʼoyũkabũga nawe ati, Umba awʼerĩpũlya, kumbe wabĩrĩmũbũlya, naye kumbe abirikuha amagetsi wʼengebe.

¹¹Omũkalĩ mwamubwira ati, Mukama, suwite ekyʼeritehamo, nʼekitehero ni kiri. Neryo ukabana magetsi wʼengebe ayo go hahi kwehĩ?

¹²Tata-kulu wetu Yakobo, mwatuha, ekitehero ekĩ, naye mwapũlya kukyo nʼabagala buwe, nʼebihangulo biwe, nawe uli mukulu kwilaba tata-kulu wetu ye Yakobo kwehĩ?

¹³Yesu mwamũsũbĩrya ati, Oyũkapũlaya oko magetsi aya asyaswakwa enyota.

¹⁴Nĩkwa oyũkapũlaya amagetsi ago nasyamuha siendisyaswakwa enyota na kera. Nĩkwa amagetsi ago nasyamuka asyabya omwisi wuwe eyĩsoko yʼamagetsi awakakũnũnũka nʼerimuha engebe yʼerikota.

¹⁵Omũkalĩ mwabũga ati, Mukama, umbe oko magetsi ayo, neryo sindiendĩsyaswakwa nyota, kutse ndasyaswasa eno nʼeriteha magetsi!

¹⁶Yesu mwamubwira ati, Ugende, ubirikire ĩbawe, mwase eno.

¹⁷Omũkalĩ oyo mwasũbĩrya ati, Singwite ĩbage. Yesu mwamũsũbĩrya ati, Wamabũga ndeke uti suwite ĩbawe.

¹⁸Kusangwa wabiribya nʼabĩbawe batanu, nʼoyo guli naye sĩ ĩbawe. Ekĩ wabĩrĩbũga kwenene.

¹⁹Omũkalĩ mwabũga na Yesu ati, Mukama, namalebya kʼuli mũmĩnyererĩ.

²⁰Abotata wetu mobaramya Nyamuhanga oko kitwa ekĩ, nenyũ mũkabũga muti eYerũsalema ho abandu batolere erĩramĩrya Nyamuhanga.

²¹Yesu mwamubwira ati, Mũkalĩ, ũnyĩkĩrĩraye, omugulu asyasa isimwendisyaswaramya Tata oko kitwa ekĩ, kutse eYerũsalema.

²²Ĩnywe mũkaramaya ekyo mũtasĩ; ĩtwe tũkaramaya ekyo twasĩ, kusangwa erilama lĩkalũa oko Bayũda.

²³Nĩkwa omugulu akasa, kandi lino ane, abaramya bʼekwenene basyaramya Tata omo kĩrĩmũ nʼekwenene, kusangwa Tata akasondaya abandu abali batya eribya baramya buwe.

²⁴Nyamuhanga nĩ Mũlĩmũ, nʼabakamũramaya litolere ĩbamũramya omo kĩrĩmũ nʼomo kwenene.

²⁵Omũkalĩ mwabũga na Yesu ati, Nyasĩ Masĩya asyasa, Oyukahulawa mo Kristo, ekiro oyo asyasa, asyatubwira emyatsi yosĩ.

²⁶Yesu mwamũsũbĩrya ati, Ĩngye ngabũga nawe, ni iye.

²⁷Oko saa eyo abiga ba Yesu mobasubula, neryo mobasweka kusangwa abya akabũga nʼomũkalĩ oyo. Nĩkwa sihabya oyũkabũga ati, Ukasondakĩ kwehĩ? Kutse, Busana nakĩ ũkabũga naye kwehĩ?

²⁸Neryo omũkalĩ oyo mwasĩga erĩrega liwe, mwaya oko mũyĩ, mwabwira abandu bayo ati,

²⁹Mwase, mũlebaye omundu, oyo wamambwira ebyosĩ nakola. Oyũ si Kristo kwehĩ?

³⁰Nabo mobalũa oko mũyĩ, mobahĩka uku Yesu.

³¹Omo mugulu oyo abiga mobalemba-lemba Yesu bati, Mũkangĩrĩrya, ulya!

³²Nĩkwa Yesu mwabwirabo ati, Ngwite akalyo kʼerirya ako mũtasĩ.

³³Kyaleka abiga ĩbabũlanĩa bati, Hali mundu wamuletere akalyo kwehĩ?

³⁴Nĩkwa Yesu mwabwirabo ati, Akalyo kage ni ʼkola erisonda lyʼoyo wanyituma, nʼeribuga omũbĩrĩ ogo amba.

³⁵Sĩmwebũga muti, Hakĩsĩya mikera ĩnĩ erigesa ĩryahĩka, kwehĩ? Lebaya, ngababwira nyiti, Musumbe ameso wenyũ, musamalire amalima erĩre, amahĩka erigeswa.

³⁶Oyukagesa akahamba oluhembo. Kandi akahĩndanaya esyombuto busana nʼengebe yʼerikota, neryo omũbĩbĩ nʼomũgesĩ ibatoka eritsemera haguma.

³⁷Kusangwa erĩbũga erĩ ni kwenene riti, Omundu muguma akabiba, nʼogundi akagesa.

³⁸Ngabatuma eriyagesa aho mutakola; abandi babirikola, nenyũ mwabiriingira omo mĩbĩrĩ yabo.

³⁹Neryo omo mũyĩ oyo, Abanya Samarĩa bangi mobĩkĩrĩrya Yesu busana nʼekĩnywa kyʼomũkalĩ oyo wabũga ati, Amambwira ebyosĩ ebyo nakola.

⁴⁰Neryo Abanya Samarĩa babere bahĩka uku Yesu, mobamuhatikana bati ĩkale haguma nabo. Neryo Yesu mwĩkalaho biro bibiri.

⁴¹Abandi bangi mobĩkĩrĩrya busana ngʼekĩnywa kya Yesu.

⁴²Mobabwira omũkalĩ bati, Lino tũkĩkĩrĩraya, si busana nʼerĩbũga lyawe, nĩkwa kusangwa ĩtwe twabĩrĩowa ĩtwebene-bene, kandi tũnasĩ oyũ, kwenene kwʼali Mũlamya wʼekihugo.

⁴³Neryo enyũma wʼebiro bibiri, Yesu mwalũaho mwaya eGalĩlaya.

⁴⁴Kusangwa Yesu abya ĩnĩabĩrĩbũga ati, Omũmĩnyererĩ sĩalĩsĩkĩbawa omo kihugo kyʼewabo.

⁴⁵Neryo omugulu ahĩka eGalĩlaya, Abanya Galĩlaya mobamũkokya kusangwa mobalangira emyatsi yosĩ akola eYerũsalema oko biro bikulu, kusangwa nabo mobaya oko biro bikulu ebyo.

⁴⁶Neryo Yesu mwaya kandi eKana yʼeGalĩlaya, aho abindulira amagetsi mo bĩnyũ. Nĩkwa eKapernaũma habya omũtabalĩ muguma, nʼomugala wuwe abya alwere.

⁴⁷Omugulu owa ko Yesu abĩrĩlũa eYũdea nʼeriya eGalĩlaya, omũtabalĩ oyo mwahĩka uku Yesu, nʼerĩmũbũlya ati andagale erĩlamya mugala wuwe, kusangwa abya hakũhĩ nʼerihola.

⁴⁸Neryo Yesu mwamubwira ati, Ĩnywe mwamatendilangira ebitiko-tiko nʼebyʼeriswekera, sĩmwendĩsyĩkĩrĩrya nʼahake.

⁴⁹Omũtabalĩ oyo mwabũga na Yesu ati, Mukama, andagalirayo omwana wage ate ahola.

⁵⁰Yesu mwamubwira ati, Genda, mugala wawe aneho. Omundu oyo mwĩkĩrĩrya ekĩnywa ekyo Yesu amubwira, neryo mwagenda.

⁵¹Neryo abagombe buwe mobahĩndana naye akandagala bati, Mugala wawe aneho.

⁵²Naye mwabũlyabo esaa omwana wuwe atsũka erilama. Nabo mobamubwira bati, Mũlĩgolo oko saa sirinda erĩhũhana molyamũlũĩreko.

⁵³Neryo ĩse mwaminya ko yabya oko saa eyo Yesu amubwira ati, Mugala wawe aneho. Neryo omundu oyo mwĩkĩrĩrya nʼenyũmba yiwe yosĩ.

⁵⁴Ekĩ ni kitiko-tiko kyʼakabiri ekyo Yesu akola abĩlũa eYũdea akaya eGalĩlaya.