Read nande Yoane 6 Bible Online

Yoane 6 - nande bible

Yoane 6

¹Enyũma wʼaho Yesu mwagenda eyisirya wʼengetsi yʼeGalĩlaya, ye Ngetsi yʼeTĩberĩa.

²Nʼendeko nene moyamukwama, kusangwa balangira ebitiko-tiko ebyo abya akakolera abakonĩ.

³Nĩkwa Yesu mwahetukira oko kitwa, nʼeyo mwĩkala nʼabiga buwe.

⁴Neryo Ebiro Bikulu byʼErikiruka byʼAbayũda byabya hakũhĩ.

⁵Neryo Yesu mwasumba ameso wuwe, mwalangira endeko nene ĩkamũhĩkako, neryo mwabũga na Fĩlĩpo ati, Twangagula amandu go hahi, aba batoke eriryago kwehĩ?

⁶Yesu abya akabũga atya erimulengako; kusangwa abya asĩ ebyo asonda erikola.

⁷Fĩlĩpo mwamũsũbĩrya ati, Amandu wʼesyodĩnarĩ magana abiri siangatolerabo nomo bangalya obuli mundu kake.

⁸Omuguma wʼoko biga buwe ye Anderea, mugala wabo Sĩmonĩ Petero, mwamubwira ati.

⁹Hano hali omũlwana oyuwite amandu atanu wʼekisusu, nʼamahere abiri, nĩkwa hino nĩkĩ busana nʼabandu bangahaba kwehĩ?

¹⁰Yesu mwabwirabo ati, Mwĩkalaye abandu bʼahisi. Neryo aho habya ebiti bingi. Neryo abalume abo mobĩkala ahisi. Eriganza lyabo lyabya nga elfu ĩtanu (5,000).

¹¹Neryo Yesu mwĩmya amandu ayo, neryo mwagabirago oko babya bĩkere ahisi. Mwakola atya nibya nʼamahere eriha abosĩ ngoko babya banzĩre.

¹²Babere babĩũgũta, Yesu mwabwira abiga buwe ati, Mukuma-kume ebihandebihande ebitahangukira, sihatale kindu.

¹³Neryo mobasonga-songya, mobũsũlya ebitiri ĩkũmĩ na bibiri oko bitahangukira ebyalũa oko mandu atanu wʼekisusu ebyasaka, abandu babirya.

¹⁴Neryo abandu babere balangira ekitiko-tiko ekyo Yesu akola, mobabũga bati, Kwenene oyũ nĩ Mũmĩnyererĩ oyo wasyasa omo kihugo!

¹⁵Nĩkwa Yesu mwaminya kwʼabandu babya bakasonda erĩhĩka nʼerimuhamba nʼamaka erimuyira mo mwami. Neryo mwalũaho mwaya oko kitwa ĩyowene.

¹⁶Neryo bwabere bwabya ĩgolo-golo abiga buwe mobandagalira oko ngetsi.

¹⁷Neryo babere babingira omo bwato, mobatsũka erisoka engetsi bakaya eKapernaũmũ. Neryo ibwamabihumbera, nĩkwa Yesu ĩsĩalĩahĩka aho bali.

¹⁸Nʼengetsi moyatsũka erigunga busana nʼerihunga lĩkalĩre eryabya likabuhirira.

¹⁹Neryo abiga mobagoya olulengo lwʼebilometre bitanu kutse ndatu, neryo mobalangira Yesu iniakatandayira oko magetsi akahĩka hakũhĩ nʼobwato; neryo mobubaha.

²⁰Nĩkwa Yesu mwabũga nabo ati, Nĩ ĩngye, simubahe!

²¹Neryo mobalĩga erĩmũkokya omo bwato; neryoneryo obwato mobwahĩka oko mũsĩke eyo babya bakalolya.

²²Neryo engyakya endeko eyahangana eyisirya wʼengetsi moyalangira isihali obundi bwato buke aho, ibo nʼobuguma. Kandi mobaminya ko Yesu sialitingira omo bwato haguma nʼabiga buwe, nĩkwa abiga mobagenda ĩbobene.

²³Awandi mato make-make mwalũa eTĩberĩa, mwahĩka hakũhĩ nʼaho endeko yalira amandu, Omukama iniamabiha ewasĩngya.

²⁴Neryo omugulu endeko yalangira Yesu nʼabiga buwe ko bateho, mobingira omo mato make-make, mobaya eKapernaũmũ, erisonda-sonda Yesu.

²⁵Kandi omugulu abandu begaya Yesu eyisirya wʼengetsi, mobamũbũlya bati, Mũkangĩrĩrya, wahĩka eno yo mugulu wahi kwehĩ?

²⁶Yesu mwasũbĩryabo ati, Kwenene, kwenene ngabũga nenyũ, mukanyĩsondaya kusangwa mwalya oko mandu, momũgũta, si busana nʼerilangira ebitiko-tiko.

²⁷Simukolere ebyalya ebikahonda, nĩkwa mukolere ebyalya ebikabyaho erĩhĩka oko ngebe yʼerikota. Ebyalya ebĩ Omugala wʼOmundu asyabahabyo, kusangwa Nyamuhanga, Tata, abĩrĩmũhĩra kwʼekiminyikalo kyʼerĩmũsĩma.

²⁸Neryo mobabũlya Yesu bati, Tuyire tuti tutoke erikola emĩbĩrĩ ya Nyamuhanga kwehĩ?

²⁹Yesu mwasũbĩryabo ati, Omũbĩrĩ wa Nyamuhanga goyũ: mwĩkĩrĩraye oyo Nyamuhanga atuma.

³⁰Neryo mobamũbũlya bati, Wangakolakĩ mo kitiko-tiko neryo tulangirekyo, nerĩkwĩkĩrĩrya kwehĩ? Ukakola omũbĩrĩ wahi kwehĩ?

³¹Abotata-kulu betu mobalya amana omo mbwarara; ngoko byasakawa biti, Mwahabo obundu bwʼerirya obũkalũa elubula.

³²Yesu mwabwirabo ati, Kwenene, kwenene ngababwira, kwʼatabya Musa oyo wabaha obundu obwalũa elubula; nĩkwa ni Tata wage oyukabaha obundu bwʼekwenene obũkalũa elubula.

³³Kusangwa obundu obo Nyamuhanga akaha yo yũkalũa elubula nʼeriha engebe oko kihugo.

³⁴Neryo mobamubwira bati, Mukama, utuhe obundu obo bwʼebiro byosĩ.

³⁵Yesu mwabũga nabo ati, Ingye indi bundu bwʼengebe. Oyukasa kwĩngye sĩendĩsyakwa nzala na kera, nʼoyũkanyĩkĩrĩraya sĩendĩsyakwa nyota na kera.

³⁶Nĩkwa ngababwira nyiti, Mwabirinyilolako, nĩkwa sĩmũlĩkĩrĩraya.

³⁷Abosĩ abo Tata akamba basyasa ũkwʼĩngye; nʼoyukasa kwĩngye sindiendĩsyamũsũbya eyĩhya nʼahake.

³⁸Kusangwa sinandagala erĩlũa elubula erikola erianza lyage, nĩkwa nandagala erikola erianza lyʼoyo wanyituma.

³⁹Kandi erianza lyʼoyo wanyituma lyerĩ ati, sĩnyĩtalaye nʼomuguma oko bosĩ abirimba, nĩkwa nyĩlũbũkaye abosĩ oko kiro kyʼenyũmanyũma.

⁴⁰Kusangwa erianza lya Tata wage lyerĩ ati, Oyukalangira Omugala, akamwĩkĩrĩrya, abane engebe yʼerikota; nage nasyamũlũbũkya oko kiro kyʼenyũma-nyũma.

⁴¹Neryo Abayũda mobayikuna busana na Yesu, kusangwa abũga ati, Ĩngye indi bundu obwandagala bũkalũa elubula.

⁴²Neryo mobabya bakabũga bati, Omundu oyũ si Yesu, mugala wa Yosefũ kwehĩ? Ĩtwe tũnasĩ ĩse wuwe na nyĩnya wuwe. Ko lino akabũga ati, Nandagala ngalũa elubula, ati kwehĩ?

⁴³Yesu mwasũbĩryabo ati, Muleke emiyikuno omo katĩkatĩ kenyũ.

⁴⁴Sihali omundu oyukatoka erĩnyĩhĩkako, Tata oyo wanyituma ataliamuleta; nage nasyamũlũbũkya ekiro kyʼenyũma-nyũma.

⁴⁵Abamĩnyererĩ mobasaka bati, Abandu bosĩ basyakangĩrĩrĩbwa na Nyamuhanga. Obuli mundu oyũkowa Tata nʼerĩkangĩrĩrĩbwa naye, akahĩka ũkwʼĩngye.

⁴⁶Butsira erĩbũga ambu hali mundu wabirilangira Tata; yo nʼoyũkalũa ewa Nyamuhanga, Iye abirilola uku Tata.

⁴⁷Kwenene, kwenene ngababwira, Oyũkĩkĩrĩraya awite engebe yʼerikota.

⁴⁸Ĩngye indi bundu bwʼengebe.

⁴⁹Abotata-kulu benyũ mobalya amana omo mbwarara, mobahola.

⁵⁰Obũ bo bundu bukandagala bũkalũa elubula, neryo omundu atoke eriryabo, iniatahola.

⁵¹Ĩngye indi bundu bwʼengebe obwandagala bũkalũa elubula. Omundu amalya oko bundu obo, asyabyaho kera na kera; nʼobundu obo nasyaha ni mubiri wage, ogo ngaha, ekihugo kitoke eribyaho.

⁵²Neryo Abayũda mobatsũka erikuba obuhaka omo katĩkatĩ kabo bati, Omundu oyũ angatoka erituha omubiri wuwe eriryago ati kwehĩ?

⁵³Yesu mwabwirabo ati, Kwenene, kwenene ngabũga nenyũ, mwamatindalya omubiri wʼomugala wʼOmundu nʼerĩpũlya omusasi wuwe, simuwite engebe omwisi wenyũ.

⁵⁴Oyukalya omubiri wage nʼerĩpũlya omusasi wage, awite engebe yʼerikota, nage nasyamũlũbũkya nʼengebe oko kiro kyʼenyũma-nyũma.

⁵⁵Kusangwa omubiri wage ni kalyo kũndũ, nʼomusasi wage nĩ ʼpũlya lyʼekwenene.

⁵⁶Oyukalya omubiri wage nʼerĩpũlya omusasi wage amatikene ũkwʼĩngye, nage nyimatikene ukwʼiye.

⁵⁷Ngoko Tata oyuliho anyituma, nage nyiriho busana na Tata; litya oyukanyirya, asyabyaho busana nage.

⁵⁸Obũ bo bundu obwandagala bũkalũa elubula; sibuli ngʼobundu obo abotata-kulu benyũ balya, mobahola. Oyukalya obundu obũ asyabyaho kera na kera.

⁵⁹Yesu mwabũga enyatsi eyĩ omo nyũmba yʼerĩhĩndanamo omugulu akangĩrĩraya eKapernaũmũ.

⁶⁰Neryo abangi bʼoko biga ba Yesu omugulu bowa ebĩ mobabũga bati, Ekĩnywa ekĩ kĩkalĩre; ko nindi wangowakyo.

⁶¹Nĩkwa Yesu, ĩnĩanasĩ kwʼabiga buwe bakayikuna busana nʼebĩ, mwabwirabo ati, Ekĩ kikaleka ĩmwahũka-hũkya emitima kwehĩ?

⁶²Byasyabya biti, mwamalangira Omugala wʼOmundu akahetukira eyo abya erĩmbere kwehĩ?

⁶³Nĩ Mũlĩmũ oyukaha engebe; omubiri sialigasakĩ. Ebĩnywa ebyo nabĩrĩbũga nenyũ nĩ Mũlĩmũ, kandi ni ngebe.

⁶⁴Nĩkwa hali abandi omo katĩkatĩ kenyũ abatĩkĩrĩraya. Kusangwa Yesu abya asĩ erĩmbere nga ni bahi abatĩkĩrĩrye, nʼoyo wasyamuhotera.

⁶⁵Neryo Yesu mwaswabũga ati, Busana nʼomwatsi oyũ, nabiribabwira nyiti sihali mundu wangatoka erĩnyĩhĩkako, Tata amatendimuha eriasa ũkwʼĩngye.

⁶⁶Busana nʼekĩ, abangi bʼoko biga buwe mobasuba enyũma, mobataswalendera naye kandi.

⁶⁷Neryo Yesu mwabũlya abiga erĩkũmĩ nʼababiri ati, Nenyũ mũnanzĩre ĩmwayĩgenderya kwehĩ?

⁶⁸Sĩmonĩ Petero mwamũsũbĩrya ati, Mukama, twasyaya ukundi kwehĩ? Uwe uwite ebĩnywa byʼengebe yʼerikota.

⁶⁹Netu twabĩrĩkĩrĩrya twabiriminya kʼuli Mũbũyĩrĩre wa Nyamuhanga.

⁷⁰Yesu mwasũbĩryabo ati, Mondayisoga nywe, erĩkũmĩ nʼababiri, kwehĩ? Nĩkwa omuguma gʼũkwʼĩnywe nĩ Satanĩ.

⁷¹Nĩkwa abya akahula Yũda mugala wa Sĩmonĩ Ebĩnywa ebyo nabĩrĩbũga nenyũ nĩ Ĩskarĩota. Kusangwa Yũda abya muguma gʼokwʼĩkũmĩ nʼababiri, iyukandisyamuhotera.