Read nande Yoane 9 Bible Online

Yoane 9 - nande bible

Yoane 9

¹Yesu abere akalaba mwalangira omundu oyo wabutawa inina ndĩmatĩme.

²Neryo abiga buwe mobamũbũlya bati, Mũkangĩrĩrya, nindi yo wakola ebibi, omundu oyũ akabutwa mo ndĩmatĩme, ni iye, kutse ababũtĩ buwe kwehĩ?

³Yesu mwasũbĩrya ati, Omundu oyũ mwatakola ebibi kutse ababũtĩ buwe, nĩkwa abutawa mo ndĩmatĩme, emĩbĩrĩ ya Nyamuhanga iminyikale omwisi wuwe.

⁴Tutolere itwakola emĩbĩrĩ yʼoyo wanyituma omugulu bũkĩnalolĩre; obũtũkũ bũkandĩsyĩra, isihali mundu wangatoka erikola.

⁵Omugulu nyikine omo kihugo indi kyakakala kyʼekihugo.

⁶Abere abĩbũga ebĩ, Yesu mwatwĩra amatande wʼahisi, mwatsumba olondo omo matande; neryo mwahakabya olondo oko meso wʼomundu oyo.

⁷Neryo mwamubwira ati, Ugende, unabe omo kitsinga kyʼeSĩloamũ, eribindula liti, Eritumwa. Neryo omundu oyo mwagenda, mwanaba, mwasubula inianemulangira.

⁸Neryo abalĩkyabo, nʼabamulangira erĩmbere ini mundu ũkasabĩrĩraya, mobabũga bati, Oyũ si yo mundu wabya akĩkala nʼerĩsabĩrĩrya kwehĩ?

⁹Abandi bati, Nina ye, nĩkwa abandi bati, Iyihi, nĩkwa amũsosĩre. Nĩkwa omundu oyo mwabũga ati, Nĩna ngye.

¹⁰Neryo mobamũbũlya bati, Ameso wawe alĩbũkala ati kwehĩ?

¹¹Naye mwasũbĩrya ati, Omundu oyukahulawa mo Yesu mwatsumba olondo, mwahakabyalo oko meso wage, kandi mwambwira ati, Ugende eSĩloamũ, unabe. Neryo monayayo monanaba, monabana erilangira.

¹²Nabo mobamũbũlya bati, Ali hahi kwehĩ? Naye ati, Sĩnyasĩ.

¹³Neryo mobatwala omundu oyo wabya ndĩmatĩme oko Bafarĩsayo.

¹⁴Ekiro Yesu atsumba olondo, nʼerĩrĩbũla ameso wʼomundu oyo, kyabya kiro kyʼeSabato.

¹⁵Abafarĩsayo nabo mobabũlya omundu oyo bati nga mwabana erilangira liwe lyo ati. Naye mwabwirabo ati, Aliahakabaya olondo oko meso wage, nage monganaba, neryo ngalangira.

¹⁶Abandi bʼoko Bafarĩsayo mobabũga bati, Omundu oyo wakola ekĩ si wa Nyamuhanga, kusangwa sĩalĩowa omugambo wʼeSabato. Abandi bati, Ko mundu mukola-nabi angakola emĩbĩrĩ ĩkalĩre ngʼeyĩ yo ati kwehĩ? Neryo mohabya erigabana omo katĩkatĩ kabo.

¹⁷Neryo Abafarĩsayo mobaswabũlya omundu oyo bati, Abĩrĩrĩbũla ameso wawe, ũkabũgakĩ busana naye kwehĩ? Naye ati, Nĩ mũmĩnyererĩ.

¹⁸Nĩkwa Abayũda mobatamwĩkĩrĩrya kwʼabya ndĩmatĩme, kandi mobatamwĩkĩrĩrya kwʼabiribana erilangira bate babirikira ababũtĩ bʼoyo wabana erilangira.

¹⁹Neryo mobabũlyabo bati, Oyũ ni mwana wenyũ kwehĩ? Kandi muti abutawa mo ndĩmatĩme kwehĩ? Neryo lino akalangira ati kwehĩ?

²⁰Ababũtĩ buwe mobasũbĩryabo bati, Tũnasĩ kwʼoyũ ni mwana wetu, kandi tũnasĩ kwʼabutawa mo ndĩmatĩme.

²¹Nĩkwa Sĩtwasĩ ngʼakalangira ati lino, kutse Sĩtwasĩ oyo walĩbũla ameso wuwe. Mũmũbũlaye, ka ni mukulu-kulu, abũge ĩyowene.

²²Ababũtĩ buwe mobabũga batya kusangwa babya bakubaha Abayũda. Abayũda nabo babya ibabiriya embĩta bati omundu amamũmĩnyĩsya kwʼali Kristo, asyahiwa erĩlũsĩbwa omo nyũmba yʼerĩhĩndanamo.

²³Busana nʼomwatsi oyũ, ababũtĩ buwe mobabũga bati, Ka ni mukulu-kulu, mũmũbũlaye!

²⁴Engendo yʼakabiri mobabirikira omundu oyo wabya ndĩmatĩme, mobamubwira bati, Upipe Nyamuhanga; ĩtwe tũnasĩ omundu oyũ ni mukola-nabi.

²⁵Neryo mwasũbĩrya ati, Sĩnyasĩ nga ni mukola-nabi; omwatsi muguma nyasĩ nyiti, nabya ndĩmatĩme, lino ngalangira.

²⁶Neryo mobamũbũlya bati, Mwakukolakĩ kwehĩ? Mwalĩbũla ameso wawe ati kwehĩ?

²⁷Naye mwasũbĩryabo ati, Nabiribabwira, simwetahulikirira. Busana nakĩ mukasonda erĩowa kandi kwehĩ? Nenyũ mwanzĩre eribya biga buwe nibya kwehĩ?

²⁸Nabo mobamutsuma, bati, Uwe uli mwiga wuwe, nĩkwa ĩtwe tuli biga ba Musa.

²⁹Tũnasĩ ngoko Nyamuhanga mwabũga na Musa; nĩkwa omundu oyũ Sĩtwasĩ aho alũa.

³⁰Omundu oyo mwasũbĩryabo ati, Ĩlolo, omwatsi wʼeriswekera goyũ, sĩmwasĩ eyo alũa, nĩkwa mwalĩbũla ameso wage!

³¹Tũnasĩ Nyamuhanga sĩalĩowa abakola-nabi; nĩkwa omundu amabya akakenga Nyamuhanga, nʼerikola ebyo anzĩre, Nyamuhanga akamowa.

³²Erĩtsũka na kera sihehatogũbwa omundu ũkalĩbũla ameso wʼomundu oyo wabutawa mo ndĩmatĩme.

³³Omundu oyo atalĩlũa ewa Nyamuhanga, siangatoka erikola kindu.

³⁴Mobamũsũbĩrya bati, Wabutawa omo bibi, kandi ũkatũkangĩrĩraya kwehĩ? Neryo mobamugusa eyĩhya wʼenyũmba yʼerĩhĩndanamo.

³⁵Yesu mowa ko bamamugusa eyĩhya. Neryo mwamweya, mwamũbũlya ati, Wĩkĩrĩrye uku Mugala wa Nyamuhanga kwehĩ?

³⁶Neryo omundu oyo mwamũsũbĩrya ati, Naye nindi Mukama, inatoka erĩmwĩkĩrĩrya kwehĩ?

³⁷Yesu mwamubwira ati, Wabirimulolako, kandi yo nʼoyũkabũga nawe.

³⁸Neryo omundu oyo mwabũga ati, Mukama, namĩkĩrĩrya! Neryo omundu oyo mwamũramya.

³⁹Yesu mwabũga ati, Monasa omo kihugo ekĩ busana nʼeritswera, neryo esyondĩmatĩme balangire, kandi abakalangira babye ndĩmatĩme.

⁴⁰Nʼabandi bʼoko Bafarĩsayo ababya haguma naye mobowa emyatsi eyĩ, mobamũbũlya bati, Netu tuli ndĩmatĩme kwehĩ?

⁴¹Yesu mwabwirabo ati, Kumbe mũlũe ndĩmatĩme simwangabya nʼekibi; nĩkwa lino mũkabũga muti, Tukalangira; ebibi byenyũ ibine.