Read nande Emĩbĩrĩ 10 Bible Online

Emĩbĩrĩ 10 - nande bible

Emĩbĩrĩ 10

¹Neryo Ekaĩsarĩa yabya omundu oyukahulawa mo Kornelĩo. Abya mukulu wʼekisambala kyʼabasĩrĩkanĩ erĩgana, abakahulawa mo mulondo wʼeĩtalĩa.

²Abya mundu wʼeKisomo, oyo wabya akaramya Nyamuhanga, iye nʼenyũmba yiwe yosĩ. Kandi mwabya akaha ebindu byʼoko bera bʼAbayũda, kandi abya akasaba Nyamuhanga emigulu yosĩ.

³Neryo hakũhĩ nʼesaa mwenda yʼeritungi, mwalangira ndeke omo bũlĩme omũlaĩka wa Nyamuhanga akamũhĩkako, nʼerimubirikira ati, Kornelĩo!

⁴Neryo mwasamalira omũlaĩka oyo nʼeriubaha lĩnene, ati, Mukama, ũtĩkĩ kwehĩ? Neryo omũlaĩka mwamubwira ati, Nyamuhanga abĩrĩrĩga erisaba lyawe, nʼolũsũnzo lwawe, kandi abirikwibuka.

⁵Na lino Utume abandu bʼeYopa, ubirikire eyo yʼomundu erĩna liwe yo Sĩmonĩ, kandi akahulawa mo Petero.

⁶Ĩkere haguma nʼomũbambĩ wiebihu, oyukahulawa mo Sĩmonĩ. Enyũmba yiwe iri hakũhĩ nʼengetsi.

⁷Neryo omũlaĩka oyo wabũga naye abere abigenda, Kornelĩo mwabirikira abagombe buwe babiri nʼomũsĩrĩkanĩ muguma wʼekisomo, oyo wabya akamukolera.

⁸Neryo mwatumabo eYopa iniamabibwirabo ndeke emyatsi yosĩ eyo.

⁹Neryo engyakya abakwenda aba ibane omo nzira ibakasonda erĩhĩka eYopa, Petero mwaya omo kyumba kyʼendata akayasaba, hakũhĩ nʼesaa sĩta.

¹⁰Neryo Petero mwakwa enzala mwasonda erirya. Nĩkwa omugulu babya bakahũka kalyo, Petero mwayato, mwalota.

¹¹Neryo mwalebya olubula ilukingukere, neryo ekindu ngʼolukimba lunene olũkandagalĩbawa omo syosondo ĩnĩ syalo erĩhĩka oko kitaka.

¹²Ituli mwʼesyonyama esyʼamagulu ani, nʼesyonzoka, nʼesyonyonyũ syʼekyanya.

¹³Neryo omulenge mwamũhĩkako ati, Petero, hangana, ũsĩnze, ulye.

¹⁴Nĩkwa Petero mwabũga ati, Lero iyihi, Mukama! Sindinatalya na kera ekindu kĩtabũyĩrĩre kutse ekĩtũnda-tũndĩre.

¹⁵Neryo omulenge mwamubwira engendo yʼakabiri ati, Ebyo Nyamuhanga abĩrĩerya, isiwaswahulabyo mo bĩtabũyĩrĩre.

¹⁶Omwatsi oyo mwahĩka engendo ĩsatu; neryo-neryo ekindu ekyo mokyasumbirwa omo kyanya.

¹⁷Neryo Petero mwahanga-hangya omo bũlengekanĩa buwe erilota eryo alangira nga nĩkĩ. Neryo, lebaya, abalume abo Kornelĩo atuma, babere babĩbũlya busana nʼenyũmba ya Sĩmonĩ, mobimana oko lũkyo.

¹⁸Mobabirikira Ĩbakabũlaya Sĩmonĩ Petero ngʼanĩkereho.

¹⁹Neryo omugulu Petero akĩnaganĩraya omwatsi wʼerilota eryo, Omũlĩmũ mwamubwira ati. Lebaya! abandu basatu bakakusonda-sonda.

²⁰Nĩkwa hangana, Wandagale eyĩkwa, ugende nabo; sutika-tike, kusangwa ĩngye natumabo.

²¹Neryo Petero mwandagalira oko bandu abo, mwabũga nabo ati, Lebaya, ĩngye indi oyo mukasonda-sonda. Mũlĩasirakĩ kwehĩ?

²²Nabo mobabũga bati, Kornelĩo, omukulu wʼerĩgana, ni mundu utunganene oyũkaramaya Nyamuhanga, kandi akakengawa nʼabandu bosĩ bʼAbayũda. Ahanawa nʼomũlaĩka wa Nyamuhanga akutumireko eriya ewuwe, owe ebĩnywa byawe.

²³Neryo Petero mwakokyabo omo nyũmba mwahabo ahʼerigotsera. Engyakya Petero mwahangana mwagenda nabo, nʼabandi balĩkyetu bʼeYopa mobagenda haguma naye.

²⁴Neryo engyakya Petero mwahĩka eKaĩsarĩa. Nĩkwa Kornelĩo abya akalindabo, iniabiribirikira abʼekĩtũnga kiwe nʼabĩra buwe.

²⁵Neryo omugulu Petero abya akingira omo nyũmba, Kornelĩo mwahĩndana naye, mwatũlama oko bisando biwe, nʼerĩmũramya.

²⁶Nĩkwa Petero mwamũhanganĩa ati, Hangana, ĩngye nage indi mundu.

²⁷Neryo Petero abere akakanĩa naye, mwingira omo nyũmba, mweya bandu bangi ĩbamabĩhĩndana.

²⁸Neryo mwabwirabo ati, Ĩnywe mũnasĩ ngoko Mũyũda siatolere omo Migambo erisiba kutse eriyabana omundu wʼekindi kihanda. Nĩkwa Nyamuhanga abĩrĩnyĩkangya ati sinangahula omundu mo mubi kutse oyũtsandĩre.

²⁹Kyo kyalekĩre masa, isinditagana omugulu mwanyibirikira. Neryo ngababũlaya nga mwamanyitumirako busana nakĩ?

³⁰Neryo Kornelĩo mwabũga ati, Byamatakya biro bini, oko ndambĩ ngʼeno, nabya ngasabira omo nyũmba yage oko saa mwenda yʼeritungi, Neryo lebaya, omundu wʼesyongimba sĩhenĩrye mwimana embere syage,

³¹ati, Kornelĩo! Nyamuhanga abĩrĩowa erisaba lyawe, kandi abiryibuka olũsũnzo lwawe.

³²Utume omundu yʼeYopa, ubirikire Sĩmonĩ oyukahulawa mo Petero, ase ewawe, Ĩkere omo nyũmba ya Sĩmonĩ omũbambĩ wʼebihu, naye ĩkere hakũhĩ nʼengetsi.

³³Neryo-neryo monakutumirako, nawe wamayira ndeke ũkahĩka. Na lino ĩtwe bosĩ tune hano emuliro wa Nyamuhanga erĩowa ebyosĩ ebyo Mukama abirikuhana.

³⁴Neryo Petero mwatsũka erĩbũga ati, Namaminya ndeke lino ngoko Nyamuhanga siawite ebitaga.

³⁵Nĩkwa omo buli kihanda omundu oyukubaha Nyamuhanga, nʼerikola ebitunganene akalĩgawa naye.

³⁶Nyamuhanga mwatuma ekĩnywa oko bandu ba Ĩsraelĩ, erĩtũla Engulu Yowene yʼobuholo busana na Yesu Kristo, naye ni Mukama wʼabandu bosĩ.

³⁷Ĩnywe mũnasĩ omwatsi owahĩka eYũdea hosĩ, erĩtsũka eGalĩlaya, enyũma wʼerĩbatĩsya eryo Yoane akangĩrĩraya.

³⁸Kandi mũnasĩ Yesu wʼeNazaretĩ, ngoko Nyamuhanga amũtũlĩra Omũlĩmũ Abũyĩrĩre nʼobũtokĩ. Yesu mwalendera ehosĩ akakola ebibuya, nʼerĩlamya abosĩ abanũbĩbawa nʼeSatanĩ, kusangwa Nyamuhanga abya haguma naye.

³⁹Netu tuli balangĩrĩ bʼemyatsi yosĩ Yesu akola omo kihugo kyʼAbayũda nʼeYerũsalema. Kandi mobamwĩta nibya erimukongomerera oko musalaba.

⁴⁰Nĩkwa Nyamuhanga mwamũlũbũkya enyũma wʼebiro bisatu, kandi mwaleka inialolwako.

⁴¹Nĩkwa abandu bosĩ mobatamulolako, nĩna twe twabya balangĩrĩ abo Nyamuhanga ayisoga erĩmbere, Ĩtwe motwalya nʼerĩpũlya haguma naye abĩlũbũka oko baholĩ.

⁴²Neryo Yesu mwatuhana ati tũkangĩrĩraye Engulu Yowene oko bandu, nʼerĩtũlago kwʼali Oyo Nyamuhanga ahĩra mo Mũtswerĩ wʼabaliho, nʼomũtswerĩ wʼabaholĩre.

⁴³Abamĩnyererĩ bosĩ mobatũla omwatsi wuwe bati, Omo bũtokĩ bwʼerĩna liwe obuli mundu oyũkamwĩkĩrĩraya abiribana eribuyira lyʼebibi.

⁴⁴Neryo Petero abere akĩnabũga ebĩnywa ebĩ, Omũlĩmũ Abũyĩrĩre mwawa oko bosĩ abowa ebĩnywa ebĩ.

⁴⁵Neryo abikĩrĩrye bosĩ bʼAbayũda abasa haguma na Petero mobasweka, kusangwa Nyamuhanga mũtũlĩra abʼEbihanda nibya olũsũnzo lwʼOmũlĩmũ Abũyĩrĩre.

⁴⁶Kusangwa bowabo bakabũga omo yindi mĩbũge, ĩbakahamaya Nyamuhanga. Neryo Petero mwabũga ati,

⁴⁷Abandu aba babiriangirira Omũlĩmũ Abũyĩrĩre nga twe, Ko nindi angakagabo erĩbatĩsĩbwa omo magetsi kwehĩ?

⁴⁸Neryo Petero mwahana ati babatĩsĩbawe omo lĩna lya Yesu Kristo. Neryo mobabũlya Petero bati ĩkale nabo ebindi biro.