Read nande Emĩbĩrĩ 11 Bible Online

Emĩbĩrĩ 11 - nande bible

Emĩbĩrĩ 11

¹Neryo abakwenda nʼabalĩkyetu ababya eYũdea hosĩ mobowa kwʼEbihanda nibya byabiriangirira ekĩnywa kya Nyamuhanga.

²Kandi omugulu Petero ahetukira eYerũsalema, ababya babwene mobalwa naye,

³bati, Uwe mowaya omo nyũmba yʼabandu batabwene, kandi mowalya haguma nabo.

⁴Nĩkwa Petero mwatsũka erĩkanĩryabo, nʼeritondekago mo muguma muguma, ati,

⁵Nabya oko mũyĩ wʼeYopa iningasaba. Monalota omo nzolĩ. Monalangira ekindu ngʼolukimba lunene olũkandagalĩbawa omo syosondo, ĩlũkalũa omo kyanya, neryo mokyambĩkako.

⁶Neryo nabere ngasamalirakyo, nʼerilola kukyo, monalangira esyonyama syʼamagulu ani syʼekihugo, nʼesyonyama esyʼomolĩ nʼesyonzoka, nʼesyonyonyũ syʼekyanya.

⁷Kandi monowa omulenge akabũga nage ati, Petero, hangana, ũsĩnze, ulye!

⁸Nĩkwa monabũga nyiti, Lero iyihi Mukama! Kusangwa sindinatalya na kera ekindu kĩtabũyĩrĩre kutse ekĩtũndatũndĩre.

⁹Neryo omulenge mwalũa elubula mwasũbĩrya engendo yʼakabiri ati, Ebyo Nyamuhanga abĩrĩerya, isiwahulabyo mo bĩtabũyĩrĩre.

¹⁰Omwatsi oyũ mwahĩka engendo ĩsatu, neryo-neryo ekyo mokyasumbirwa omo kyanya.

¹¹Neryo lebaya, oko saa eyo; abandu basatu mobahĩka embere wʼenyũmba eyo twabya twĩkeremo, ibabiritumwa ũkwʼĩngye bakalũa eKaĩsarĩa.

¹²Neryo Omũlĩmũ mwambwira ati, nyigende nabo butsira eritika-tika. Neryo abalĩkyetu ndatu aba mobagenda haguma nage eKaĩsarĩa, neryo motwingira omo nyũmba ya Kornelĩo.

¹³Naye mwatubwira ngoko alangira omũlaĩka inianimene omo nyũmba yiwe, oyo wamubwira ati, Utume omundu yʼeYopa ubirikire Sĩmonĩ oyukahulawa mo Petero, ase hano;

¹⁴Naye asyakũtũlĩra ebĩnywa ngoko wasyalamĩbwa, uwe nʼenyũmba yawe yosĩ.

¹⁵Neryo omugulu natsũka erĩbũga, Omũlĩmũ Abũyĩrĩre mwandagalira kubo ngoko atwandagalirako erĩmbere.

¹⁶Neryo monibuka ekĩnywa Omukama abũga ati, Yoane abatĩsaya omo magetsi, nĩkwa ĩnywe mwasyabatĩsĩbwa omo Mũlĩmũ Abũyĩrĩre.

¹⁷Neryo Nyamuhanga mwahabo olũsũnzo olo atuha twabĩkĩrĩrya Omukama Yesu Kristo, nage nabyandi nyiti nangatoka erĩkakĩrya Nyamuhanga kwehĩ?

¹⁸Neryo babere bowa ebyo, mobabya bũkũtũ, mobapipa Nyamuhanga bati, Kwesĩ, Nyamuhanga abiriha oko Bihanda nibya eribindula omutima nʼeribana engebe.

¹⁹Neryo abĩkĩrĩrye mobapanza-panzwa busana nʼerĩendererya eryatsũka ekiro Setefano ĩtawa. Abandi mobaya eFoĩnĩkĩ, nʼeKĩpũro, nʼeAntĩokĩa, ibakabwira Abayũda basa ekĩnywa kya Kristo.

²⁰Nĩkwa abandi ba kubo, abandu bʼeKĩpũro, nʼabʼeKũrene, mobahĩka eAntĩokĩa, ĩbakabũga nʼAbagĩrĩkĩ nibya, ĩbakatũla Engulu yʼomukama Yesu.

²¹Kandi Omukama abya haguma nabo, nʼabandu bangi mobĩkĩrĩrya mobabindukira Omukama.

²²Nʼengulu yabo moyahĩka oko kanĩsa yʼeYerũsalema, neryo mobatuma Barnaba eAntĩokĩa.

²³Neryo abere ahĩka nʼerilangira olukogo lwa Nyamuhanga, mwatsema, neryo mwahanabo ati, abosĩ bakwame Omukama nʼomutima asĩkĩre, nʼeritendiregula.

²⁴Barnaba abya mundu mubuya, ĩnĩoswĩre nʼOmũlĩmũ Abũyĩrĩre nʼerĩkĩrĩrya. Kandi abandu bangi mobakwama Omukama.

²⁵Neryo Barnaba mwaya eTarso erĩyasondya Saũlo.

²⁶Neryo abere amubana eyo mwamuleta eAntĩokĩa. Neryo omo mwaka muguma mobahĩndana nʼabandu bʼekanĩsa, mobakangĩrĩrya abandu bangi. Nĩkwa eAntĩokĩa yo abiga batsũkĩra eriahulwa mo Bakristo.

²⁷Neryo oko biro ebyo, abandi bamĩnyererĩ mobaya eAntĩokĩa bakalũa eYerũsalema.

²⁸Neryo omuguma wa kubo erĩna liwe iyo Agabo, mwahangana, mwaminyerera omo bũtokĩ bʼOmũlĩmũ ati, Hakandisyabya enzala nene omo kihugo kyosĩ. Nĩkwa enzala eyĩ moyahĩka omwʼitabala lyʼomũtabalĩ mukulu ye Klaũdĩo.

²⁹Neryo obuli mundu wʼoko biga mobayĩsũnza erituma esyofranka ngoko bangatoka busana nʼomũbĩrĩ wʼerĩwatĩkya abalĩkyetu abĩkere eYũdea.

³⁰Neryo mobakola batya, mobatuma esyofranka oko bakulu bʼekanĩsa omo byala bya Barnaba na Saũlo.