Read nande Emĩbĩrĩ 12 Bible Online

Emĩbĩrĩ 12 - nande bible

Emĩbĩrĩ 12

¹Neryo oko mugulu oyo omwami Herode mwahamba abandi bandu bʼekanĩsa, erikola bo nabi.

²Neryo mwĩta Yakobo mugala wabo Yoane omo mũyalĩ.

³Neryo abere alangira ko kyamatsemesya Abayũda, mwahamba Petero nibya. Omwatsi oyũ abya omo Biro Bikulu byʼErirya Obundu Bute mo Kĩhamya.

⁴Neryo abere ahamba Petero, mwamũhĩra omo mũlĩkĩ, ĩnĩakamũhĩra omo byala byʼemilondo ĩnĩ yʼabasĩrĩkanĩ ati bamũtegaye. Obuli mulondo abya wʼabasĩrĩkanĩ bani. Herode aganĩraya erĩhũlũkya Petero embere syʼabandu enyũma wʼEbiro Bikulu byʼErikiruka.

⁵Neryo mobateya Petero yʼomo mũlĩkĩ, nĩkwa abandu bʼekanĩsa mobasaba Nyamuhanga yo kutsibu busana naye.

⁶Neryo oko kiro ekyo Herode asonda erĩmũhũlũkya, Petero abya agotsere omo katĩkatĩ kʼabasĩrĩkanĩ babiri. Nĩkwa abya abohĩre omo mahulula abiri, nʼabateya ibanimene embere wʼolũkyo bakateya enyũmba yʼomũlĩkĩ.

⁷Neryo lebaya, omũlaĩka wʼomukama mwabulukirabo, nʼekyakakala mokyakolerya omo kyumba ekyo. Neryo omũlaĩka mwabanda uku Petero oko lukanga, mwamũbũkya ati, Hangana lũba! Neryo amahulula mwalũa oko byala biwe.

⁸Neryo omũlaĩka mwamubwira ati, wambale esyongimba nʼesyongendero syawe. Neryo Petero mwakola atya. Neryo omũlaĩka mwamubwira ati, Ũyĩrĩngĩre kwʼolukimba lwawe, Unyikwame!

⁹Neryo Petero mwamukwama erĩlũa omo nyũmba yʼomũlĩkĩ, ĩsĩasĩ ebyo mũlaĩka akola nga ni kwenene, nĩkwa mwaganĩrya ati akakola omwʼilota.

¹⁰Neryo mobalaba oko mũteya wʼerĩmbere, nʼowʼakabiri, neryo mobahĩka oko lũkyo lwʼekyuma olukalola oko mũyĩ. Olũkyo olo molwayikingula ĩlolwenelwene, neryo mobaya eyĩhya mobalaba omo nzira nguma, neryo-neryo omũlaĩka mwasĩganĩa Petero.

¹¹Neryo Petero abere abibuka mwabũga ati, Lino namaminya ndeke ko Mukama abirituma omũlaĩka wuwe. Kandi abĩrĩnyĩtongolya omo byala bya Herode, nʼoko myatsi yosĩ Abayũda basonda erinyikola.

¹²Neryo Petero abere abiminya ekyo, mwaya omo nyũmba ya Marĩa, nyĩnya wa Yoane Marĩko, aho abandu bangi babya ĩbabĩrĩhĩndana nʼerisaba.

¹³Neryo Petero abere ahumanga oko lũyĩ lwʼeyĩhya, omwana-muto mugombe erĩna liwe iyo Roda mwasaho oko lũyĩ.

¹⁴Neryo abere abiminya omulenge wa Petero, mwatakingula Olũyĩ busana nʼobutseme, nĩkwa mwatibita omo nyũmba mwatũlago ati, Petero animene eyĩhya oko lũyĩ.

¹⁵Nabo mobamubwira bati, Uli mũsĩre! Nĩkwa Roda mwayitsinga ati ni kwenene. Nabo bati, nĩ mũlaĩka wuwe!

¹⁶Nĩkwa Petero mwayitsinga erihumanga oko lũyĩ. Neryo mobakingulaho, mobamulolako, mobasweka.

¹⁷Nĩkwa Petero mwakoheryabo ati babye bũkũtũ, neryo mwakanĩryabo ngoko Mukama amusondola erĩmũlũsya omo nyũmba yʼomũlĩkĩ. Ati, Mubwire Yakobo nʼabalĩkyetu emyatsi eyĩ. Neryo mwalũaho mwaya ehandi.

¹⁸Neryo bwabere bwakya, mohabya eriganga-ganga omo katĩkatĩ kʼabasĩrĩkanĩ Petero ngʼayĩre hahi.

¹⁹Kandi Herode mwamusonda-sonda, nĩkwa mwatamubana. Neryo mwabũlya abateya bo ndeke, neryo mwategeka ati abateya bĩtawe. Neryo Herode mwandagalira eKaĩsarĩa akalũa eYũdea, neryo mwasibayo ndambĩ.

²⁰Nĩkwa Herode mwahitana oko bandu bʼeTĩro nʼeSĩdona. Nabo mobagenda haguma uku Herode ibamabisakana na Balasto ayũkategaya ekikali kyʼOmwami. Nĩkwa mobasaba Herode yʼobuholo kusangwa ekihugo kyabo kyabya kikabana akalyo kabo omo kihugo kyʼOmwami.

²¹Neryo oko kiro kyayisogawa, Herode mwambala olukimba lwʼobwami, mwĩkala oko kĩtũmbĩ kiwe kyʼobwami, neryo mwatsũka erĩkanĩrya bandu.

²²Neryo abandu mobũta obogo bati, Ni mulenge wa Nyamuhanga, si mulenge wʼomundu!

²³Neryo-neryo omũlaĩka wʼomukama mwaswĩrya Herode, kusangwa mwataha Nyamuhanga yʼolukengerwa. Neryo mwalibwa nʼemihuka, mwahola.

²⁴Nĩkwa ekĩnywa kyʼomukama mokyakula nʼerikanyirira.

²⁵Neryo Barnaba na Saũlo mobalũa eYerũsalema, ibamabibuga omũbĩrĩ wabo. Mobaletanĩa Yoane Marĩko haguma nabo.