Read nande Emĩbĩrĩ 14 Bible Online

Emĩbĩrĩ 14 - nande bible

Emĩbĩrĩ 14

¹Neryo eĨkonĩo Paũlo na Barnaba mobingira haguma omo nyũmba yʼerĩhĩndanamo yʼAbayũda, neryo mobabũga omo mũsĩndo owaleka endeko nene yʼAbayũda nʼeyʼEbihanda ĩbĩkĩrĩrya.

²Nĩkwa Abayũda abagana erĩkĩrĩrya mobatsotsererya amalengekanĩa wʼEbihanda, erilwa nʼabalĩkyetu.

³Nĩkwa abakwenda mobasiba eyo omugulu muli. Mobabũga busana nʼomukama butsira eriubaha. Neryo Omukama mwatũlago busana nʼekĩnywa kyʼolukogo luwe, iniakahabo obũtokĩ bwʼerikola ebitikotiko nʼebyʼeriswekera.

⁴Nĩkwa endeko yʼomũyĩ moyagabana, abandi mobayĩhĩra oko Bayũda, nʼabandi oko bakwenda.

⁵Neryo Ebihanda nʼAbayũda, haguma nʼabatabalĩ mobalenga erikola abakwenda bo nabi, nʼerĩĩtabo omo mabwe.

⁶Neryo abakwenda mobaminyakyo, mobatibita eLĩstra nʼeDerbe, emĩyĩ yʼeLĩkaonĩa, nʼomo kihugo ekĩhererenĩe.

⁷Neryo mobatũla Engulu Yowene yʼeyo.

⁸Nĩkwa eLĩstra habya mundu muguma ĩnĩabũndamĩre. Omundu oyũ abya kirema omo bisando biwe isialitatoka erigenda na kera, abutawa ikwane atya.

⁹Omundu oyũ mwahulikirira ebĩnywa bya Paũlo. Neryo Paũlo mwalangira ko mundu oyũ abya awite erĩkĩrĩrya lyʼerĩlamĩbwa.

¹⁰Neryo Paũlo mwamubwira nʼomulenge munene ati, Hangana, wimane omo bisando byawe! Neryo omundu oyo mwabatuka, mwatsũka erigenda.

¹¹Neryo esyondeko syabere syalangira ekyo Paũlo akola, mobasumba emirenge yabo omo mũbũge wʼAbanya Lĩkaonĩa bati, Esyonyamuhanga syabere ngʼabandu, kandi syabiritwandagalirako.

¹²Mobahula Barnaba mo Zeũ, na Paũlo mobamwahula mo Herme, kusangwa Paũlo abya mbũyĩ.

¹³Neryo omũhererĩ wa Zeũ, ehekalũ yiwe yabya embere wʼomũyĩ, mwaleta esyonume syʼesyonde nʼobũsoyo oko syongyo syʼomũyĩ, iniakasonda haguma nʼesyondeko eriherera abakwenda.

¹⁴Nĩkwa omugulu abakwenda, Paũlo na Barnaba bowa ekyo, mobatula esyongimba syabo, mobatibita omo syondeko ibakabirikira bati,

¹⁵Ĩnywe balume, busana nakĩ mukakola mutya kwehĩ? Netu tuli bandu abalingene nenyũ! Tũkabatũlĩra Engulu Yowene imwatoka erireka emyatsi mitya-mitya eyĩ, nʼeribindukira Nyamuhanga oyuliho, oyo wabumba olubula, nʼekihugo, nʼengetsi, nʼebyosĩ ko birimo.

¹⁶Kandi, oko migulu yalaba Nyamuhanga mwaleka Ebihanda byosĩ erigenda omo mibere yabyo.

¹⁷Nĩkwa mwatayireka bute balangĩrĩ buwe, iniakakola ebibuya nʼeribaha embũla eyĩkalũa elubula, nʼeribaha ebirimo ebĩkeraya ebyalya, nʼerĩũsũlya emitima yenyũ mwʼobutseme.

¹⁸Nĩkwa nomo bakwenda babũga emyatsi eyĩ, lyabya lĩkalĩre erĩkakĩrya esyondeko erihererabo amahere.

¹⁹Neryo Abayũda mobahĩka bakalũa eAntĩokĩa yʼePĩsĩdĩa, nʼeĨkonĩo. Abayũda aba mobabindula emitima yʼabandu, mobahũtalya Paũlo yʼomo mabwe, mobamukurira ekyaswa kyʼomũyĩ, mobaganĩrya, bati abirihola.

²⁰Nĩkwa abiga babere bakamũtĩmbako, Paũlo mwahangana mwingira omo mũyĩ. Nʼengyakya Paũlo na Barnaba mobaya eDerbe.

²¹Neryo Paũlo na Barnaba mobatũla Engulu Yowene eDerbe, kandi mobayira abiga bangi. Neryo mobasuba eLĩstra, nʼeĨkonĩo, nʼeAntĩokĩa yʼePĩsĩdĩa.

²²Mobasĩkya emitima yʼabiga, nʼerĩhamĩryabo bati bakwamirire omwʼĩkĩrĩrya. Bati, Litolere itwingira omo bwami bwa Nyamuhanga itukalaba omo malĩge mangi.

²³Kandi mobahĩra abakulu busana nabo omo buli kanĩsa, babere babisaba nʼeritsira akalyo. Kandi mobahĩrabo omo byala byʼomukama oyo bĩkĩrĩraya.

²⁴Neryo Paũlo na Barnaba mobatwangana ePĩsĩdĩa, mobahĩka ePamfĩlĩa.

²⁵Neryo babere batũla omwatsi wʼekĩnywa kya Nyamuhanga ePerga, neryo mobandagalira eAtalĩa.

²⁶Neryo mobalũa eyo, mobaya eAntĩokĩa omo bwato, aho bahĩrawa oko lukogo lwa Nyamuhanga busana nʼomũbĩrĩ ogo babuga.

²⁷Neryo babere bahĩka eAntĩokĩa, mobahĩndanĩa ekanĩsa, mobabwirabo nʼerĩkanĩryabo ebyosĩ ebyo Nyamuhanga akola haguma nabo, kandi ngoko Nyamuhanga alĩbũla enzira busana nʼerĩkĩrĩrya lyʼEbihanda.

²⁸Nʼeyo mobĩkalayo mugulu muli haguma nʼabiga.