Read nande Emĩbĩrĩ 16 Bible Online

Emĩbĩrĩ 16 - nande bible

Emĩbĩrĩ 16

¹Neryo Paũlo mwalaba eDerbe nʼeLĩstra. Nĩkwa eyo habya omwiga muguma erĩna liwe iyo Tĩmoteo. Nyĩnya wuwe abya Mũyũda oyo Wĩkĩrĩrye, nĩkwa ĩse wuwe abya Mũgĩrĩkĩ.

²Tĩmoteo abya asĩmĩrwe ndeke nʼabalĩkyetu bosĩ bʼeDerbe nʼeLĩstra.

³Paũlo abya anzĩre Tĩmoteo iniagenda haguma naye, neryo mwamũbanĩa busana nʼAbayũda ababya omo bihugo byʼeyo, kusangwa abosĩ babya basĩ kwʼĨse wuwe nĩ Mũgĩrĩkĩ.

⁴Neryo omugulu babya bakalaba omo mĩyĩ eyo, mobabwira abiga bʼeyo bʼemyatsi eyo bakwenda nʼabakulu bʼeYerũsalema basoha, bati bakwameyo.

⁵Litya esyokanĩsa mosyabana amaka omwʼĩkĩrĩrya, nʼeriganza lyabo molyakanya obuli kiro.

⁶Nĩkwa mobalaba omo bihugo byʼeFũrũgĩa nʼeGalatĩa. Kandi Omũlĩmũ Abũyĩrĩre mwakagabo erĩtũla omwatsi eAsĩa.

⁷Neryo mugulu bahĩka eMĩsĩa, mobalenga eriya eBĩtĩnĩa, nĩkwa Omũlĩmũ wa Yesu mwatalĩgĩrabo.

⁸Neryo mobatwangana eMĩsĩa, mobahĩka eTroa.

⁹Nĩkwa Paũlo mwalota esyonzolĩ syʼomo kiro. Omundu wʼeMakedonĩa iniahangene akamuhatikana ati, Usokere eMakedonĩa ũtũwatĩkaye!

¹⁰Neryo Paũlo abere abilola oko nzolĩ esyo, neryo-neryo motwasonda eriya eMakedonĩa, itwamabiminya ko Nyamuhanga abirimbirikira erĩtũla Engulu Yowene oko bandu bayo.

¹¹Kandi motwalũa eTroa omo bwato, motwagenda omo nzira itunganene erĩhĩka eSamotĩrake, nʼengyakya motwahĩka eNeapolĩ.

¹²Nʼerĩlũa eyo motwahĩka eFĩlĩpĩ, omo mũyĩ munene wʼekihugo kyʼeMakedonĩa. Ni kihugo kyʼAbaroma. Nĩkwa motwasiba omo mũyĩ oyo mwʼebindi biro.

¹³Nʼoko kiro kyʼeSabato motwalũa omo mũyĩ motwaya oko mũsĩke wʼolũsĩ, ĩtũkaganĩraya nga hane ahʼerisabira. Neryo motwĩkala ahisi, nʼerĩtsũka erĩbũga nʼabakalĩ ababya bahĩndeneho.

¹⁴Neryo omũkalĩ muguma oyo wabya akahulikirira, abya Lũdĩa wʼomũyĩ wʼeTuatira. Naye abya mũtũndĩ wʼesyongimba syʼengula. Abya mũkalĩ oyũkaramaya Nyamuhaga, neryo Omukama mwamwĩbũkya omo mutima wuwe erĩowa emyatsi eyo Paũlo abũga.

¹⁵Neryo Lũdĩa nʼabandu bʼenyũmba yiwe mobabatĩsĩbwa. Neryo mwatubirikira ati, Mwamaganĩrya muti nabĩrĩkĩrĩrya Omukama, mwase omo nyũmba yage mwĩkale. Mwatuhatikana, neryo motwingira.

¹⁶Neryo ekiro kiguma twabere tukaya ahʼerisabira, omwana-muto mugombe muguma oyo wabya kwʼekĩrĩmũ kibi kyʼerilagula, mwahĩndana netu. Omwana muto oyo abya akaletera abakama buwe bʼendũndĩ nene busana nʼerilagula.

¹⁷Neryo omwana-muto oyo mwatukwama tuna Paũlo iniakabirikira ati, Abandu aba ni bagombe ba Nyamuhanga Wʼendata Kutsibu! Bakabatũlĩra enzira yʼerilama!

¹⁸Naye mwakola atya ebiro bingi. Nĩkwa Paũlo mwasĩrĩkalira kutsibu, neryo mwakeba mwabũga nʼekĩrĩmũ ekyo ati, Ngakuhana omo lĩna lya Yesu Kristo ũmũlũeko! Neryo mokyamũlũako oko saa eyo nyisa-nyisa.

¹⁹Nĩkwa omugulu abakama buwe balangira kwʼamaha wʼendũndĩ yabo abirihwaho, mobatsimba Paũlo na Sila mobakurirabo embere syʼabatabalĩ omo katale.

²⁰Neryo mobaletabo embere wʼabatswerĩ bakulu bati, Abandu aba nĩ Bayũda kandi bakatsandaya omũyĩ wetu.

²¹Kandi bakakangĩrĩraya emitsye eyite omo migambo yetu. Ĩtwe tuli Baroma, sitwetoka erĩrĩga kutse erikwama emitsye eyĩ.

²²Nʼendeko moyahangana haguma erilwa nabo. Neryo abatswerĩ bakulu mobalũsya esyongimba sya Paũlo na Sila, kandi mobahana bati baswĩrĩbawe omo myũtso.

²³Neryo babere babĩhũnzabo kutsibu, mobagusabo omo mũlĩkĩ, nʼeritegeka omũteya erĩteyabo ndeke.

²⁴Neryo omũteya abere abĩowa erihana erĩ, mwagusabo omo kyumba kyʼomwisi wʼenyũmba yʼomũlĩkĩ, kandi, mwabohera ebisando byabo omo katĩkatĩ kʼemiti ĩbĩrĩ.

²⁵Nĩkwa omo katĩ kanene, Paũlo na Sila babya bakasaba nʼeriimba esyonyimbo syʼeripipa Nyamuhanga, nʼabandu bʼomũlĩkĩ mobahulikirirabo.

²⁶Neryoneryo mohabya omũsĩkĩ munene, kyaleka ebibanza byʼenyũmba yʼomũlĩkĩ ibyatenga-tengana. Neryo-neryo esyonyũyĩ syosĩ mosyakingukala, nʼamahulula wʼobuli mundu mwakũndũkala.

²⁷Kandi omũteya mwabuka omo tũgotserĩ, neryo abere alangira esyonyũyĩ syʼenyũmba yʼomũlĩkĩ isyabirikingulwa mwaganĩrya ati abʼomũlĩkĩ babiritibita, neryo mwakula omũyalĩ wuwe ati akayĩta.

²⁸Nĩkwa Paũlo mwamubirikira ati, Suyikole nabi kusangwa ĩtwe bosĩ tune hano!

²⁹Neryo omũteya mwatumira oko syotala, mwingira omo nyũmba yʼomũlĩkĩ akatitimana nʼeriubaha, mwatũlama embere wa Paũlo na Sila.

³⁰Neryo mwaletabo eyĩhya, mwabũlya ati, Bakama, litolere ĩnakolakĩ inatoka erĩlamĩbwa kwehĩ?

³¹Nabo mobabũga bati, Wĩkĩrĩraye Omukama Yesu, wasyalamĩbwa uwe nʼenyũmba yawe.

³²Kandi mobamũkangĩrĩrya ekĩnywa kyʼomukama, haguma nʼabosĩ ababya omo nyũmba yiwe.

³³Neryo oko saa eyo yʼekiro, omũteya oyo mwĩmya Paũlo na Sila, mwerya ebironda byabo, neryoneryo mwabatĩsĩbwa, iye nʼekĩtũnga kiwe kyosĩ.

³⁴Neryo mwatwalabo omo nyũmba yiwe, mwahabo akalyo kʼerirya. Neryo iye nʼabandu bʼenyũmba yiwe mobatsema kutsibu, ĩbamabĩkĩrĩrya Nyamuhanga.

³⁵Neryo engyakya, abatswerĩ bakulu mobatuma abapolĩsĩ babo bati, Mũlwĩke abandu abo.

³⁶Neryo mũteya mwabwira Paũlo ebĩnywa ebĩ ati, Abatswerĩ bakulu bamatuma bati mũlwĩkawe. Neryo lino muhuluke mugende buholo.

³⁷Nĩkwa Paũlo mwabwirabo ati, Babĩrĩtũswĩrĩrya embere syʼabandu, isitulitwatonda. Kandi ĩtwe tuli Baroma! Kandi babiritugusa omo mũlĩkĩ. Na lino bakasonda erituhiga bũbĩso-bĩso kwehĩ? Lero iyihi! Nĩkwa base ĩbobene-bene batũlũsayemo.

³⁸Neryo abapolĩsĩ mobayatũlĩra abatswerĩ bakulu bʼebĩnywa ebĩ. Nabo mobubaha omugulu bowa ko Paũlo na Sila ni Baroma.

³⁹Neryo mobasa mobalemba-lemba Paũlo na Sila eribuyirabo, neryo babere balũsyabo omo mũlĩkĩ, mobasababo bati balũe oko mũyĩ.

⁴⁰Neryo Paũlo na Sila mobalũa omo nyũmba yʼomũlĩkĩ, mobingira omo nyũmba ya Lũdĩa. Neryo babere balangira abalĩkyetu, mobasĩkyabo, mobagenda.