Read nande Emĩbĩrĩ 19 Bible Online

Emĩbĩrĩ 19 - nande bible

Emĩbĩrĩ 19

¹Neryo omugulu Apolo abya eKorĩnto, Paũlo mwalaba omo kihugo kyʼendata, mwahĩka eEfeso. Neryo mweyayo abandi biga.

²Neryo mwabũlyabo ati, Ekiro mwĩkĩrĩraya, momwangirira Omũlĩmũ Abũyĩrĩre kwehĩ? Nabo mobamubwira bati, Iyihi, sĩtwetowa ko hali Omũlĩmũ Abũyĩrĩre.

³Neryo Paũlo mwabũlya ati, Mwabatĩsĩbawa omo lwahi kwehĩ? Nabo mobabũga bati, Omo lũbatĩso lwa Yoane.

⁴Neryo Paũlo mwabũga ati Olũbatĩso lwa Yoane lwabya busana nʼabandu ababindula emitima yabo erireka ebibi byabo. Yoane iniakabwira abandu ati bĩkĩrĩraye oyo wasyasa enyũma wuwe, iye ni Yesu.

⁵Nĩkwa babere babĩowa ekĩ, mobabatĩsĩbwa omo lĩna lyʼomukama Yesu.

⁶Neryo Paũlo abere ahĩra kubo kwʼebyala biwe, Omũlĩmũ Abũyĩrĩre mwahĩka kubo, mobatsũka erĩbũga omo mĩbũge, nʼeriminyerera.

⁷Neryo babya nga bandu ĩkũmĩ nʼababiri.

⁸Kandi Paũlo mwaya omo nyũmba yʼerĩhĩndanamo, mwabũga nʼabandu nʼeritendiubaha omo mikera ĩsatu, ĩnĩakakanĩraya nʼeribindula abandu omo mwatsi wʼobwami bwa Nyamuhanga.

⁹Nĩkwa abandi mobakala mobagana erĩowa, ĩbakabũga nabi embere wʼendeko busana nʼEnzira yʼomukama. Neryo Paũlo mwalũa kubo, mwatwala abiga, ĩnĩakakanaya obuli kiro omo kalasi ka Tĩrano.

¹⁰Neryo mwakola atya omo myaka ĩbĩrĩ, kyaleka bandu bosĩ ababya bĩkere eAsĩa, Abayũda nʼAbagĩrĩkĩ, ĩbowa ekĩnywa kyʼomukama.

¹¹Nyamuhanga mwakola ebitiko-tiko bĩkalĩre omo byala bya Paũlo.

¹²Kandi ebitambara nʼesyongimba ebyalũa oko mubiri wa Paũlo mobyatwalwa oko bakonĩ, nʼesyondwala mosyalũa kubo, nʼebĩrĩmũ bibi mobyalũamo.

¹³Nĩkwa abandi bakũmũ bʼAbayũda, abalendera ehandi nʼehandi, mobalenga eriahula erĩna lyʼomukama Yesu ukwʼabo babya kwʼebĩrĩmũ bibi, bati, Ngakusema omo lĩna lya Yesu oyo Paũlo akatũlaganaya.

¹⁴Neryo abakola batya babya bagala balinda ba Sikewa omũhererĩ mukulu wʼAbayũda.

¹⁵Neryo ekĩrĩmũ kibi ekyo mokyasũbĩryabo kiti, Nyĩnasĩ Yesu, kandi nyĩnasĩ Paũlo, nĩkwa ĩnywe muli bahi kwehĩ?

¹⁶Neryo omundu oyo wabya kwʼekĩrĩmũ kibi mwagulukirabo, mwakĩndabo ababiri bosĩ, mwalabyabo akagala, neryo mobatibita bakalũa omo nyũmba eyo ibali ndũmbũ ĩbakwĩre bironda.

¹⁷Kandi Abayũda bosĩ nʼAbagĩrĩkĩ abĩkere eEfeso mobaminya omwatsi oyũ. Abosĩ mobakwa obuba, nʼerĩna lyʼomukama Yesu molyahamĩbwa.

¹⁸Kandi abangi ba kubo abĩkĩrĩraya mobasa nʼerĩkangya nʼerĩhũlũkya emĩbĩrĩ yabo.

¹⁹Nʼabangi bʼoko bakũmũ mobaleta ebitabu byabo, mobahĩsĩryabyo omo meso wʼabandu bosĩ, neryo mobaganza obũgũlĩ bwʼebitabu ebyo mobabana esyofranka elfu makũmĩ atanu (50,000).

²⁰Litya ekĩnywa kyʼomukama mokyakanyirira kutsibu nʼerĩsĩngana.

²¹Neryo enyũma wʼemyatsi eyĩ, Paũlo mwayĩsũnza omo mutima wuwe eriyalaba eMakedonĩa, nʼomo kihugo kyʼAbagĩrĩkĩ, nʼeriya eYerũsalema, ati, Namabĩhĩka eyo, kandi litolere ĩnayalebya eRoma.

²²Neryo mwatuma abawatĩkya buwe babiri, Tĩmoteo, na Erasto, eMakedonĩa, nĩkwa iye mwasĩgala eAsĩa ebindi biro.

²³Neryo oko mugulu oyo, omwaga munene mwahuluka eEfeso busana nʼeNzira yʼomukama.

²⁴Kusangwa omũhesĩ muguma wʼebĩtsĩpa, erĩna liwe iyo Demetrĩo, oyo wabya akahesa emisaka yʼekĩtsĩpa ya Artemĩ yʼerisabiramo. Obũhesĩ obũ bwabya bukaletera abanyima-nyima bʼendũndĩ nene.

²⁵Neryo Demetrĩo mwabirikira abanyima-nyima aba bo haguma, nʼabanyimanyima bʼeyindi mĩbĩrĩ ati, Balume, mũnasĩ omũyĩsa wetu owakabanika omo mũbĩrĩ oyũ.

²⁶Kandi mukalangira nʼerĩowa ebyo Paũlo oyũ akakola, butsira hano eEfeso hasa, nĩkwa hakũhĩ nʼehosĩ eAsĩa. Kandi abiribindula bandu bangi nʼerĩlolyabo ehandi, ati, esyonyamuhanga esĩkakokotĩbawa nʼabandu si nyamuhanga nʼahake.

²⁷Neryo omũbĩrĩ wetu oyũ ali omo bwĩko eriahulwa mo mũbĩrĩ mubi, kandi ehekalũ ya nyamuhanga mukulu wʼobũkalĩ yo Artemĩ iyaganzwa nga buyira, na Artemĩ oyũ akaramĩbawa nʼeAsĩa hosĩ, na muna-kihugo, ĩnĩalũsĩbwa oko bukulu buwe.

²⁸Neryo omugulu endeko yowa omwatsi oyũ, mobahitana kutsibu, neryo mobabũgĩra iguma-guma bati, Artemĩ wʼAbanya Efeso ni mukulu!

²⁹Nʼomũyĩ gosĩ mũsũla mwʼolukanda, neryo mobatibita haguma omwʼebitsange, bakakura Gayo na Arĩstarĩko, abandu bʼeMakedonĩa ababya bakalendera na Paũlo.

³⁰Kandi Paũlo mwasonda eriingira omo ndeko, nĩkwa abiga mobatalĩga akayayo.

³¹Kandi abandi bʼeAsĩa, abĩra ba Paũlo, mobamutumirako bakamugo nga-gonga bati siaye omwʼebitsange.

³²Neryo abandi mobabirikira omwatsi muguma, nʼabandi ogundi mwatsi, kusangwa endeko yabya litya-litya, nʼabangi ĩsĩbasĩ ekyo bakahĩndanĩra.

³³Kandi abandi bʼendeko mobaganĩrya bati ni Alesandũro, kusangwa Abayũda mobamũhanganĩa embere syʼabandu. Alesandũro mwakoherya omo byala ati akabũga nʼendeko.

³⁴Nĩkwa omugulu baminya kwʼali Mũyũda, abosĩ mobabũgĩra iguma-guma omo saa ĩbĩrĩ bati, Artemĩ wʼAbanya Efeso ni mukulu!

³⁵Neryo omũhandĩkĩ wʼomũyĩ mwabonderya endeko eribya bũkũtũ ati, Abalume bʼeEfeso! Ko ni mundu wahi oyũtasĩ ngoko mũyĩ wʼeEfeso nĩ mũteya wʼehekalũ ya Artemĩ mukulu, kandi nĩ mũteya wʼolusumba olwatoga lũkalũa elubula, kwehĩ?

³⁶Neryo kusangwa sihali mundu oyo wangagana emyatsi eyĩ, ĩnywe mutolere imwabondera, isimwakola omwatsi go lũba-lũba.

³⁷Ĩnywe mwabirireta bandu aba bo hano ĩsĩbetahũnga esyohekalũ, kutse sĩ batsũmĩ ba nyamuhanga wetu wʼobũkalĩ.

³⁸Neryo Demetrĩo nʼabanyima-nyima abakakola haguma naye, bamabya bawite olubanza nʼomundu, hali enyũmba yʼesyombanza, nʼabʼehamũlĩ baneyo, neryo bahandikirirane omo syombanza syabo.

³⁹Nĩkwa mwamanza ogundi mwatsi, asyasoherwa omwʼĩbũgĩro eritolere.

⁴⁰Kusangwa tuli omo bwĩko bwʼerihandikirirwa lyʼeriyisamambula omo mwatsi wa mũnabwĩre, kusangwa sihali ekikaleka olukanda olũ ilwabyaho, kandi situwite ekyʼerĩbũga busana nʼomwaga oyũ.

⁴¹Neryo omũhandĩkĩ oyũ abere abĩbũga atya mwakũlũkya erĩhĩndana eryo.