Read nande Emĩbĩrĩ 21 Bible Online

Emĩbĩrĩ 21 - nande bible

Emĩbĩrĩ 21

¹Neryo twabere twabĩlũa kubo, motwagenda omo bwato, motwasokera omo nzira itunganene eriya eKosĩ, nʼengyakya motwahĩka eRodo, nʼerĩlũa eyo motwahĩka ePatara.

²Neryo motwabana obwato obukaya eFoĩnĩkĩ, neryo motwaya mubo, motwagenda.

³Neryo twabere twabĩhĩka ahʼobulangiriro bwʼekitsira kyʼeKĩpũro, motwasĩgakyo oko luhande lwʼamalembe, motwalola eSũrĩa. Kandi eTĩro motwakĩma omo bwato, kusangwa aho habya iho bakalũsĩraya ebindu byʼomo bwato.

⁴Nĩkwa motweyaho abandi biga, motwĩkala nabo eyenga nguma. Nabo mobabwira Paũlo omo bũtokĩ bwʼOmũlĩmũ bati siaye eYerũsalema.

⁵Neryo ebiro byetu haguma nabo byabere byabihwa, motwalũayo, motwaya oko lugendo lwetu. Abosĩ haguma nʼabakalĩ babo nʼabana mobatũkwamanĩsya ekyaswa kyʼomũyĩ. Neryo twabere twabĩkũkama oko na mũsĩke wʼengetsi, motwasaba, motwahana Obuholo.

⁶Neryo motwingira omo bwato, nabo mobasuba ewabo.

⁷Neryo motwayitsingira olugendo lwetu. Erĩlũa eTĩro motwahĩka eTolemaĩ, neryo twabere twabĩkerya abalĩkyetu, motwĩkala nabo kiro kiguma.

⁸Nʼengyakya motwalũa eyo, motwahĩka eKaĩsarĩ. Nʼeyo motwingira omo nyũmba ya Fĩlĩpo, omũkangĩrĩrya wʼEngulu Yowene, motwĩkala haguma naye. Fĩlĩpo abya muguma gʼoko balinda abo abayisogawa eYerũsalema.

⁹Kandi Fĩlĩpo oyũ abya awite abali buwe bani abatahĩkĩbwe, ababya bamĩnyererĩ.

¹⁰Neryo twabere tũnĩkereyo biro bingi, omũmĩnyererĩ muguma oyukahulawa mo Agabo mwatũhĩkako, akalũa eYũdea.

¹¹Neryo Agabo mwĩmya omukoba wa Paũlo, mwaboha ebisando nʼebyala biwe ĩyowene, ati, Omũlĩmũ Abũyĩrĩre ati, Abayũda bʼeYerũsalema basyaboha Omwenye omukoba oyũ yo batya, nʼerimuhotera omo byala byʼEbihanda.

¹²Neryo twabere twabĩowa ebĩnya ebĩ, ĩtwe nʼabandu baho motwamulemba-lemba tuti siahetukire eYerũsalema.

¹³Neryo Paũlo mwasũbĩrya ati, Mũkakolakĩ eririra, nʼerĩhahũkya omutima wage kwehĩ? Kusangwa nyĩsĩkĩre eribohwa eYerũsalema nʼerihola busana nʼerĩna lyʼomukama Yesu.

¹⁴Netu motwataluka erimubindula, motwayibera bũkũtũ tuti, Erisonda lyʼomukama likolawe.

¹⁵Nĩkwa enyũma wʼemyatsi eyĩ motwayĩtegekanĩa, motwahongoka omo lugendo lwʼeriya eYerũsalema.

¹⁶Kandi abandi bʼoko biga bʼeKaĩsarĩa mobagendanĩa netu, bakatutwala oko nyũmba ya Nasonĩ wʼeKĩpũro. Abya mwiga oyo Wĩkĩrĩrye biro bingi, itukandigotsera omuwe.

¹⁷Twabere twahĩka eYerũsalema, abalĩkyetu mobatũkokya nʼobutseme.

¹⁸Kandi engyakya Paũlo mwagenda haguma netu ewa Yakobo, nʼabakulu bosĩ bʼekanĩsa ibanemo.

¹⁹Neryo Paũlo abere abĩbũkyabo, mwatsũka erĩkanĩryabo emyatsi yosĩ mo muguma muguma eyo Nyamuhanga akola omo katĩkatĩ kʼEbihanda omo mũbĩrĩ wuwe.

²⁰Neryo babere bowabyo, mobapipa Nyamuhanga. Mobabwira Paũlo bati, Mũlĩkyetu Wamalangira amaelfu mangi wʼAbayũda ababĩrĩkĩrĩrya, kandi abosĩ bakwamĩre Emigambo yo kutsibu.

²¹Nĩkwa babiribwirwa busana nawe ambu ũkakangĩrĩraya Abayũda bosĩ abĩkere omo katĩkatĩ kʼEbihanda, uti, baleke Emigambo ya Musa, uti sĩbabanaye abana babo, kutse erikwama emitsye yʼAbayũda.

²²Ekyangakolwa ni kyahi kwehĩ? Kusangwa kwenene basyowa ko wabĩrĩhĩka.

²³Neryo Ukole omwatsi ogo tukakubwira. Tuwite hano ho bandu bani ababĩrĩlahĩrya.

²⁴Wĩmaye abandu aba Ukole emitsye yʼeriera haguma nabo, kandi ulihirebo emitsye eyo, ibatoka erĩsĩsa emitwe yabo. Neryo abosĩ basyaminya ko bakakulega busa omo myatsi eyo bakabwirawa busana nawe, nĩkwa kʼunemukwama ndeke Emigambo ya Musa.

²⁵Nĩkwa busana nʼEbihanda ebyabĩrĩkĩrĩrya, motwasoha nʼerisaka ebarua tuti, Baleke ebyalya ebĩtsandĩre kusangwa bikaherawa oko syosanamu, kandi baleke omusasi, kandi baleke erirya esĩswĩ esyabĩrĩnĩgwa, kandi baleke erĩsĩngĩra.

²⁶Neryo Paũlo mwĩmya bandu abo, nʼengyakya mwakola emitsye yʼeriera haguma nabo. Neryo Paũlo mwingira omo Hekalũ, iniakahula ebiro ebyo ebikabuga emitsye yʼeriera, erĩhĩka aho obuhere bwʼobuli mundu bwasyahererwa.

²⁷Neryo omugulu ebiro birinda byasonda erihwa, Abayũda bʼeAsĩa mobalola uku Paũlo omo Hekalũ. Neryo mobakola-kolya endeko, mobahamba Paũlo.

²⁸Mobabirikira bati, Ĩnywe balume ba Ĩsraelĩ! Mwase, mũtũwatĩkaye! Omundu yoyũ oyũkakangĩrĩraya abandu bosĩ ehosĩ, eripona bandu ba Ĩsraelĩ, nʼeripona Emigambo ya Musa, nʼeripona eHekalũ eyĩ. Kandi abirireta Abagĩrĩkĩ omo Hekalũ, nʼerĩtsandya ahabũyĩrĩre hano.

²⁹Kusangwa erĩmbere mobalangira Trofimo Omunya Efeso iniane haguma na Paũlo omo mũyĩ, neryo mobalengekanĩa ambu Paũlo mwamutwala omo Hekalũ.

³⁰Neryo omũyĩ gosĩ mwabya mʼolukanda, nʼabandu mobatibitira haguma. Neryo mobatsimba Paũlo, mobamukurira eyĩhya wʼeHekalũ. Neryoneryo esyonyũyĩ syʼeHekalũ mobakingasyo.

³¹Neryo babere basonda erĩĩta Paũlo, engulu eyĩ moyahĩka oko mukulu wʼabasĩrĩkanĩ bʼAbaroma, ambu eYerũsalema yabiribya mʼolukanda.

³²Neryo omukulu wʼabasĩrĩkanĩ mwĩmya abasĩrĩkanĩ nʼabakulu babo, mobatibita eyiri endeko. Neryo endeko yabere yabilangira omukulu oyo haguma nʼabasĩrĩkanĩ, mobaleka erĩswĩrya Paũlo.

³³Neryo omukulu wʼabasĩrĩkanĩ, mwahamba Paũlo, mwahana ati abohawe omo mahulula abiri. Neryo mwabũlya ati, Oyũ ni mundu wahi, kandi ayĩrĩre ati kwehĩ?

³⁴Nĩkwa abandi bʼendeko mobabũga mwatsi muguma, nʼabandi ogundi mwatsi. Neryo mwataluka eriminya ekyʼekwenene, busana nʼolukanda, neryo mwategeka Paũlo ati aletawe omo manyũmba wʼabasĩrĩkanĩ.

³⁵Neryo Paũlo abere abĩhĩka oko bisambiro, mwabya akahekwa nʼabasĩrĩkanĩ busana nʼerikala lyʼendeko.

³⁶Kusangwa endeko yʼabandu yabya ikakwamabo enyũma bati, Ĩtawe!

³⁷Neryo abasĩrĩkanĩ babere bakasonda erireta Paũlo yʼomo manyũmba wʼabasĩrĩkanĩ, Paũlo mwabũlya omukulu ati, Wanganalĩga inakubwira omwatsi kwehĩ? Neryo omukulu mwabũga ati, Ũnasĩ eKĩgĩrĩkĩ kwehĩ?

³⁸Neryo suli Omunya Mĩsĩrĩ oyo watwa omwaga oko bindi biro nʼerisondola abĩtĩ elfu ĩnĩ (4,000), omo mbwarara kwehĩ?

³⁹Nĩkwa Paũlo mwabũga ati, Ĩngye indi Mũyũda wʼeTarso, omũyĩ wʼeKĩlĩkĩa, indi ndũlanĩ yʼomũyĩ mukulu, neryo ngakusaba nyiti, Umba ehamũlĩ yʼerĩbũga nʼabandu.

⁴⁰Neryo omukulu mwamuha ehamũlĩ eyo. Neryo Paũlo mwimana oko bisambiro, mwakoherya abandu omo byala biwe. Neryo habere habibya esĩsyerere, Paũlo mwabũga nabo omo Kiebrania ati,