Read nande Emĩbĩrĩ 22 Bible Online

Emĩbĩrĩ 22 - nande bible

Emĩbĩrĩ 22

¹Ĩnywe balĩkyetu, nʼabotata, muhulikirire, ngatonda ebyage embere syenyũ!

²Nabo babere bakamuhulikirira akabũga nabo omo Kiebrania, mobabya bũkũtũ-kũtũ, neryo Paũlo mwaswabũga ati,

³Ĩngye indi Mũyũda, nabutirawa eTarso yʼeKĩlĩkĩa, nĩkwa nakulira omo mũyĩ oyũ wʼeYerũsalema. Nakangĩrĩrĩbawa na Gamalĩelĩ, kandi nakangĩrĩrĩbawa erikwama Emigambo yʼaboso-kulu wetu, ĩnyĩkwĩre omũhwa wʼerikolera Nyamuhanga, ngoko ĩnywe bosĩ muli nago mũnabwĩre.

⁴Monendererya nʼerĩĩta abakwama Enzira yʼomukama eyo, eriboha abalume nʼabakalĩ, nʼerĩhĩrabo omo manyũmba wʼomũlĩkĩ.

⁵Omũhererĩ mukulu oko bahererĩ bosĩ, nʼerĩbũgĩro lyosĩ lyʼabakulu bangatũlago batya nibya. Mobamba esyobarua oko balĩkyetu, kandi monahongoka eriya eDamasĩkĩ erireta abaliyo bʼeYerũsalema ĩbanabohĩre, busana nʼerisuyirabo.

⁶Neryo omugulu nabya omo lugendo lwage olo hakũhĩ nʼeDamasĩkĩ nga saa sĩta, neryo-neryo ekyakakala kĩkalĩre mokyanyĩkolerya ehosĩ kĩkalũa elubula.

⁷Nage monawa oko kitaka, monowa omulenge akabũga nage ati, Saũlo, Saũloĩ! Busana nakĩ ũkanyendereraya kwehĩ?

⁸Nage monasũbĩrya nyiti, Uwendi kwehĩ Mukama? Naye mwambwira ati, Ĩngye indi Yesu Omũnazaretĩ, oyo ũkendereraya.

⁹Abandu ababya haguma nage mobalangira ekyakakala ekyo kwenene, nĩkwa mobataminya omulenge wʼoyo wabya akabũga nage.

¹⁰Nage monabũlya nyiti, Mukama, nyiyire nyiti kwehĩ? Omukama mwambwira ati, Hangana, uye eDamasĩkĩ, nʼeyo wasyabwirwa ebyosĩ ebyo Nyamuhanga abirihamula ebyo wangakola.

¹¹Nabya ndĩmatĩme busana nʼerĩkangabasanĩa lyʼekyakakala ekyo, neryo ababya haguma nage mobanyiwata oko byala erinyisondola erĩhĩka eDamasĩkĩ.

¹²Neryo habya mundu muguma yo Anania, oyo wabya mundu wʼekisomo, kandi abya akakenga Emigambo yetu, kandi iniakahulawa ndeke nʼAbayũda bosĩ ababya bĩkere eDamasĩkĩ.

¹³Iye mwambĩkako, mwimana hakũhĩ nage, mwambwira ati, Saũlo, mũlĩkyetu, ubane erilangira lyawe! Oko saa eyo nyisa-nyisa monasamalira endata ngamulolako.

¹⁴Neryo Anania mwabũga ati, Nyamuhanga wʼaboso-kulu wetu abiriyisogawe eriminya erisonda liwe, nʼerilangira Oyutunganene, nʼerĩmowa akabũga nʼomulenge wuwe.

¹⁵Kusangwa wasyabya mũlangĩrĩ busana naye, eribwira abandu bosĩ ebyo wabirilangira nʼebyo wabĩrĩowa.

¹⁶Na lino, ukalinda busana nakĩ kwehĩ? Hangana, ũbatĩsĩbawe, kandi Ulakire erĩna liwe, ebibi byawe byerĩbawe.

¹⁷Neryo monasuba eYerũsalema, kandi nabere ngasabira omo Hekalũ, monalota esyonzolĩ.

¹⁸Kandi monalangira Omukama akabũga nage ati, Wanguhe, Ũlũe eYerũsalema yo lũba, kusangwa bandu sĩbendĩrĩga ũkatũla omwatsi busana nage.

¹⁹Nage monasũbĩrya nyiti, Mukama, banasĩ ndeke ngoko nabya ngagenda omo manyũmba wʼerĩhĩndanamo nʼerĩswĩrya abakwĩkĩrĩraya nʼerĩhĩrabo omo mũlĩkĩ.

²⁰Kandi omugulu bĩta omũlangĩrĩ wawe ye Setefano, nabya nyimeneho nʼerĩrĩga oluholo luwe, nabya ngateya esyongimba syʼabamwĩta.

²¹Neryo Omukama mwabũga nage ati, Ugende! Kusangwa nasyakutuma ehali oko Bihanda.

²²Nĩkwa bandu mobamuhulikirira erĩhĩka oko kĩnywa ekĩ, neryo mobasumba emirenge yabo bati, Omundu ngʼoyũ alũe omo kihugo, kusangwa siatolere akabyaho!

²³Kandi mobabũya olukanda nʼerĩlũsya esyongimba syabo nʼerigusanga olũtũtũ omo kyanya.

²⁴Neryo omukulu wʼabasĩrĩkanĩ elfu mwahana ati, Paũlo aletawe omo nyũmba yʼabasĩrĩkanĩ, kandi mwahana ati aswĩrĩbawe eriminya ekikaleka Abayũda ĩbamũta obogo.

²⁵Nĩkwa babere babimuboha omo bikoba bati bakamũswĩraya, Paũlo mwabwira omukulu wʼerĩgana oyo wabya akahanganaho, ati, Linatolere omo Migambo erĩswĩrya omundu Muroma isialiatonda nʼeritswerwa olubanza kwehĩ?

²⁶Neryo omukulu wʼabasĩrĩkanĩ erĩgana abere owa omwatsi oyo, mwayabwira omukulu wʼamaelfu ati, Ukasonda erikolakĩ kwehĩ? Omundu oyũ ni Muroma!

²⁷Neryo omukulu wʼamaelfu mwasa mwabũga na Paũlo ati, Umbwire, uli Muroma kwehĩ? Paũlo mwasũbĩrya ati, Inga.

²⁸Neryo omukulu wʼeelfu oyo mwabũga ati, Nage nagula eribya Muroma omo bũgũlĩ bunene. Nĩkwa Paũlo mwabũga ati, Ĩngye nabutawa mo Muroma.

²⁹Neryo abandu abasonda erirenga uku Paũlo, mobamũlwĩka lũba, nʼomukulu wʼeelfu mubaha omugulu aminya Paũlo kwʼali Muroma, kusangwa abya ĩnĩabĩrĩmũhĩra omo mahulula.

³⁰Nĩkwa engyakya, omukulu wʼabasĩrĩkanĩ oyo mwasonda eriminya ndeke Abayũda nga bakahandĩkĩrĩraya Paũlo yokĩ. Neryo mwamubohola, kandi mwahamula abahererĩ bakulu nʼabʼerĩbũgĩro lyosĩ ati bahĩndane. Neryo mwaleta Paũlo yʼembere syabo.