Read nande Emĩbĩrĩ 25 Bible Online

Emĩbĩrĩ 25 - nande bible

Emĩbĩrĩ 25

¹Neryo Festo mwahĩka omo kihugo ekyo, neryo enyũma wʼebiro bisatu mwalũa eKaĩsarĩa mwaya eYerũsalema.

²Nĩkwa abahererĩ bakulu nʼabasondolĩ bʼAbayũda mobahandikirira Paũlo. Kandi mobahatikana Festo,

³bati awatĩkayebo erireta Paũlo yʼeYerũsalema, ibamabimulamba erĩmwĩtĩra omo nzira.

⁴Neryo Festo mwasũbĩryabo ati, Paũlo akateyĩbawa eKaĩsarĩa, nage ngayayo lũba.

⁵Kandi ati, Abandu bakulu omo katĩkatĩ kenyũ bayeyo haguma nage eKaĩsarĩa, neryo ibahandikirira omundu oyo, amabya ali kwʼebibi.

⁶Neryo Festo abere abisibaho omo katĩkatĩ kabo ebiro munani kutse ĩkũmĩ, mwandagalira eKaĩsarĩa. Neryo engyakya wʼaho mwĩkala oko kĩtũmbĩ kiwe omo nyũmba yʼolubanza, mwahamula ati Paũlo aletawe.

⁷Neryo Paũlo abere ahĩka, Abayũda abalũa eYerũsalema mobamũtĩmbako, ĩbakamũhandĩkĩrĩraya emyatsi mingi eyo batetoka erĩsĩsya.

⁸Nĩkwa Paũlo mwatonda ebiwe ati, Sĩndĩtahalya oko Migambo yʼAbayũda, kutse oko Hekalũ, kutse uku Kaĩsarĩ.

⁹Nĩkwa Festo, iniakasonda erĩtsemesya Bayũda bo ndeke, mwabũga na Paũlo ati, Wamalĩga eriya eYerũsalema nʼeritswerwa embere syage eyo busana nʼebyo bakakuhandikirira ebĩ kwehĩ?

¹⁰Neryo Paũlo mwabũga ati, Nyimene embere wʼenyũmba yʼolubanza ya Kaĩsarĩ, aho nyitolere eritswerwa. Sinditakola Abayũda bo nabi, ngoko ũnasĩ ndeke.

¹¹Namabya indi mukola-nabi, kutse namabya nabirikola ekyangaleka inahola, sindigana erihola. Nĩkwa hate kindu kyʼekwenene omo ebyo bakanyihandikirirako, sihali mundu wanganyihotera kubo. Ngabũlaya eriya embere sya Kaĩsarĩ.

¹²Neryo Festo abere abĩkanĩa haguma nʼabandu bʼerĩbũgĩro liwe, mwasũbĩrya ati, Ũkabũlaya eriya embere sya Kaĩsarĩ, ewa Kaĩsarĩ yo wanasyaya.

¹³Neryo enyũma wʼebindi biro, Omwami Agrĩpa na Berenĩke mobahĩka eKaĩsarĩa erĩbũkya Festo.

¹⁴Neryo babere bakasibayo biro bingi, Festo mwakanĩrya Omwami Agrĩpa omwatsi wa Paũlo ati, Felĩkĩ mwasĩga omundu muguma wʼomũlĩkĩ.

¹⁵Neryo omugulu nabya eYerũsalema, abahererĩ bakulu nʼabakulu bʼAbayũda mobamũhandĩkĩrĩrya, bati nyimutswere akwe.

¹⁶Nĩkwa monasũbĩryabo nyiti si mitsye yʼAbaroma erihotera omundu ate ahĩka emuliro wʼabahandĩkĩrĩrĩ buwe obũsũ nʼobũsũ, nʼeribana omwanya wʼerĩbũga ebiwe busana nʼomwatsi ogo bakamuhandikirirako.

¹⁷Neryo babere bahĩndana hano, mondalindirira, nĩkwa engyakya monĩkala oko kĩtũmbĩ kyage omo nyũmba yʼolubanza, neryo monahamula, nyiti omundu oyo aletawe.

¹⁸Neryo omugulu abahandĩkĩrĩrĩ bahangana, mobatamuhandikirira oko bibi ebyo naganĩraya.

¹⁹Nĩkwa mobanegena na Paũlo omo myatsi yʼekisomo kyabo, nʼomo myatsi yʼomundu muguma, ye Yesu oyo wahola. Nĩkwa Paũlo ati aneho.

²⁰Nĩkwa monabula aho nagasonda emyatsi eyĩ, nĩkwa monabũlya Paũlo ngʼanzĩre eriya eYerũsalema nʼeriyasamba busana nʼemyatsi eyĩ.

²¹Nĩkwa Paũlo abere abũlya ati atswerawe na Kaĩsarĩ omo myatsi eyĩ, monahana nyiti ateyĩbawe erĩhĩka aho nasyamutumira ewa Kaĩsarĩ.

²²Neryo Agrĩpa mwabwira Festo ati, Nage nibya nyanzĩre erĩowa omundu oyũ. Festo mwasũbĩrya ati, Omo ngyakya wasyamowa.

²³Neryo engyakya, Agrĩpa mwahĩka haguma na Berenĩke, omwʼikengwa ĩnene, neryo mwingira omo nyũmba eyo bakasoheramo esyombanza, iniali haguma nʼabakulu bʼabasĩrĩkanĩ bʼeelfu, nʼabakulu bʼomũyĩ. Neryo Festo mwahamula ati Paũlo aletawe.

²⁴Neryo Festo mwabũga ati, Uwe mwami Agrĩpa, nʼĩnywe bandu bosĩ abali hano haguma netu, mũnasamalĩre omundu oyũ, nĩkwa abandu bosĩ bʼAbayũda bʼeYerũsalema nʼabʼeno, babirimutsongera nʼolukanda lunene bati siabyeho kandi.

²⁵Nĩkwa mondamubana ko mwatsi akola owangamwĩtĩsya; nĩkwa kusangwa amabũlya ati atswerawe na Kaĩsarĩ, monatwalo erimutuma eRoma.

²⁶Nĩkwa singwite ekyo nangasakira omukama wage busana na Paũlo. Kikaleka inamuleta embere syʼĩnywe bosĩ, nʼembere syawe, uwe mwami Agrĩpa, neryo twabya twamabĩmũbũlya, inabana omwatsi ogo nangasaka.

²⁷Kusangwa oko bũlengekanĩa bwage nyiti Sĩryowene erituma omundu wʼomũlĩkĩ, nʼeritindahula emyatsi eyo bakamũhandĩkĩrĩraya.