Read nande Emĩbĩrĩ 28 Bible Online

Emĩbĩrĩ 28 - nande bible

Emĩbĩrĩ 28

¹Neryo twabere twabibala ndeke erĩhĩka oko kitaka, motwaminya kwʼekitsira ekyo kikahulawa mo Melĩta.

²Nʼesyondũlanĩ syako mobatuyira ndeke kutsibu. Neryo embũla moyatsũka eriwa, nĩkwa busana nʼembeho mobatwakĩrya omuliro, mobatũkokya ĩtwe bosĩ.

³Nĩkwa Paũlo mwasenya obũlo bwʼesyongwĩ, mwahĩrasyo oko muliro, neryo enzoka moyalũa mũsyo busana nʼekĩhũhanĩ kyʼomuliro, neryo moyayĩrĩnga-lĩngĩra oko byala bya Paũlo.

⁴Neryo esyondũlanĩ syako syabere syalangira enzoka ĩnĩnalerembĩre oko byala bya Paũlo, mobabwirana bati, Kwenene omundu oyũ nĩ mwĩtĩ. Kandi nomo anabiribala engetsi, erĩbanza sĩryetalĩga akabyaho.

⁵Nĩkwa Paũlo mwakungutira enzoka eyo omo muliro, ĩsĩalĩtakwakĩ.

⁶Nĩkwa abandu mobaganĩrya bati akandĩbĩmba, kutse eriwa ahisi nʼerihola. Nĩkwa mobalindirira ndambĩ nyiri, mobalangira ĩsĩalĩtakwakĩ, mobabindula amalengekanĩa wabo, bati Paũlo ni nyamuhanga!

⁷Nĩkwa hakũhĩ nʼaho habya ebitaka bya Pũblĩo omukulu wʼekitsira ekyo. Naye mwatũkokya ndeke biro bisatu.

⁸Neryo ĩse wa Pũblĩo abya alwere erĩhũhana nʼerihita omusasi. Neryo Paũlo mwayamũkerya omo nyũmba, nĩkwa abere abisaba mwamũhĩra kwʼebyala, mwamũlamya.

⁹Neryo omwatsi oyũ abere abibya atya, abandi bakonĩ bosĩ bʼekitsira ekyo mobasa uku Paũlo, mobalamĩbwa.

¹⁰Mobatũsĩkya nibya, omo myatsi mingi yʼeritukenga. Kandi omugulu twabya tũkalũayo omo bwato, mobatuha ebyosĩ ebyo twabya nabyo bwaga.

¹¹Neryo enyũma wʼemikera ĩsatu, motwahongoka omo bwato bwa Alesandũrĩa obwabya bũsĩbĩreho oko mikera yʼeritsuku. Obwato obũ bwabya ibukahulawa mo Esyonyamuhanga syʼOluhasa.

¹²Neryo motwahĩka oko mũyĩ wʼe Sĩrakũse, nĩkwa motwĩkalaho ebiro bisatu.

¹³Nʼerĩlũa eSĩrakũse, motwalaba omo bwato motwahĩka eRegĩo. Kandi enyũma wʼekiro kiguma, erihunga molyabuhirira, lĩkalũa elutambi lwʼeyĩkwa, nʼoko kiro kyʼebibiri motwahĩka ePũteolĩ.

¹⁴Motweyayo abandi balĩkyetu, abatũbũlaya bati twĩkale nabo eyenga nguma. Ko twahĩka tutya eRoma.

¹⁵Kandi abalĩkyetu bʼeRoma, babere babĩowa omwatsi wetu, mobasa oko Katale kʼeApĩa nʼoko Manyũmba Asatu wʼAbalalĩrĩrĩ, erĩhĩndana netu. Neryo Paũlo abere alangirabo, mwaha Nyamuhanga yʼewasĩngya, nʼomutima wuwe mwasĩka.

¹⁶Nĩkwa twabere twahĩka eRoma, Paũlo mwahabwa ehamũlĩ yʼerĩĩkala aho wuwe iniawite omũsĩrĩkanĩ oyũkamũtegaya.

¹⁷Neryo enyũma wʼebiro bisatu, Paũlo mwabirikira abakulu bʼAbayũda erĩhĩndana. Neryo babere babĩhĩndana, mwabũga nabo ati, Balĩkyetu! Nomo nanabya isinditakola omwatsi oko bandu betu, kutse oko mitsye yʼabosokulu wetu, mobanyibohera eYerũsalema, nʼerinyiha oko Baroma.

¹⁸Neryo Abaroma mobanyĩbũlĩrĩrya, kandi mobasonda erinyibohola, kusangwa mobatabana omwatsi owangaleka ĩbanyĩta.

¹⁹Nĩkwa Abayũda babere babigana, monasangwa eriya uku Kaĩsarĩ, isinyiwite ekyʼerihandikirira ekihanda kyetu nibya.

²⁰Kyo kirialeka ĩnabũlya eribalolako nʼerĩkanĩa nenyũ. Kusangwa ngaheka obuhulula obũ busana na Kristo, oyuli maha wa Ĩsraelĩ.

²¹Nabo mobamubwira bati, Sitwetabana esyobarua sĩkalũa eYũdea busana nawe. Kandi sihali mundu mũlĩkyetu oyũkahĩka eno nʼerĩtũlago kutse erĩbũga omwatsi mubi busana nawe.

²²Nĩkwa twanzĩre erĩowa amalengekanĩa wawe, kusangwa tũnasĩ abandu bakahula ekisomo ekĩ kyo nabi ehosĩ.

²³Neryo babere babilagana na Paũlo busana nʼekiro kiguma, abandu bangi mobamweya omo nyũmba yiwe aho abya ĩkere. Naye mwakanĩryabo erĩtsũka omo ngyakya-ngyakya erĩhĩka, omwʼĩgolo-golo, ĩnĩakatũla omwatsi wʼobwami bwa Nyamuhanga. Nĩkwa Paũlo mwalenga erĩsĩngabo busana nʼomwatsi wa Yesu omo Migambo ya Musa nʼamasako wʼabamĩnyererĩ.

²⁴Abandi Bayũda mobasĩngwa omo bĩnywa biwe, nĩkwa abandi mobatĩkĩrĩrya.

²⁵Neryo mobagenda ibamabiponana, kandi Paũlo ĩnĩamabĩbũga ekĩnywa kiguma ati, Omũlĩmũ Abũyĩrĩre mwabũga kwenene nʼabosokulu wenyũ omo bĩnywa byʼomũmĩnyererĩ Ĩsaya,

²⁶ati, Ugende, ũbũge nʼabandu aba uti, Mwasyahulikirira, nʼerihulikirira, nĩkwa simwendisyaminya, Kandi mwasyalangira nʼerĩyĩtegererya, Nĩkwa sĩmwendĩsyaganĩrya.

²⁷Kusangwa omutima wʼabandu aba abiribya omo bũtowa, Babirihoma amatwĩ wabo okwʼowa, Kandi babĩrĩrĩba ameso wabo, Bakasyalangira nʼameso wabo, Nʼerĩowa omo matwĩ wabo, Nʼeriminya omo mitima yabo, nʼerinyibindukira, Nyamuhanga atya, Nage ĩnalamyabo.

²⁸Neryo Paũlo mwabũga ati, Ĩnywe muminye ngoko erilama erĩ rya Nyamuhanga lyabiritumwa oko Bihanda. Nabo basyahulikirira nibya! [

²⁹Neryo Paũlo abere bĩbũga ebĩnywa ebĩ, Abayũda mobagenda, ibakakuba obuhaka bunene, omo katĩkatĩ kabo ĩbobene-bene.]

³⁰Nĩkwa Paũlo mwĩkala emyaka ĩbĩrĩ, omo nyũmba eyo abya akayirihira ĩyowene-wene, ĩnĩakakokaya abosĩ abamũhĩkako.

³¹Neryo mwatũla engulu yʼobwami bwa Nyamuhanga, nʼerĩkangĩrĩrya omwatsi wʼomukama Yesu Kristo butsira eriubaha, isihali oyũkamũkakĩraya.