Read nande Emĩbĩrĩ 4 Bible Online

Emĩbĩrĩ 4 - nande bible

Emĩbĩrĩ 4

¹Neryo omugulu Petero na Yoane babya bakĩnabũga nʼabandu, abahererĩ, nʼomukulu wʼabateya bʼeHekalũ, nʼAbasadũkayo mobahĩka kubo.

²Mobahitana kusangwa abakwenda babiri abo babya bakakangĩrĩrva bandu, ĩbakatũlago bati, Yesu abĩrĩlũbũkĩbwa oko baholĩ, erĩkangya batya ngoko abaholĩ basyalũbũkĩbwa omo ngebe.

³Neryo mobahambabo mobahĩrabo omo mũlĩkĩ erĩhĩka engyakya, kusangwa bwabya ibukasonda erĩĩra.

⁴Nĩkwa abangi abowa erĩkangĩrĩrya eryo mobĩkĩrĩrya; nʼeriganza lyʼabalume molyahĩka nga elfu ĩtanu (5,000).

⁵Neryo engyakya abatabalĩ bʼAbayũda, nʼabakulu, nʼabakangĩrĩrya bʼEmigambo mobahĩndana eYerũsalema.

⁶Mobahĩndana haguma nʼomũhererĩ mukulu oko bahererĩ bosĩ ye Ana, na Kayafa, na Yoane na Alesandũra, nʼabʼekihanda kyosĩ kyʼomũhererĩ mukulu oko bahererĩ bosĩ.

⁷Neryo mobahunganĩa abakwenda embere syabo, mobabũlyabo bati, Mwamakola ekĩ omo bũtokĩ bwandi, nʼomo lĩna lyandi kwehĩ?

⁸Neryo Petero, ĩnĩoswĩre mʼOmũlĩmũ Abũyĩrĩre mwabwirabo ati, Ĩnywe batabalĩ nʼabakulu bʼabandu,

⁹twamabya tukatsongerawa busana nʼebibuya ebyakolawa oko mũkonĩ oyo, kutse nga mwalamĩbwa ati,

¹⁰ĩnywe bosĩ muminye, nʼabandu bosĩ ba Ĩsraelĩ baminye, tuti omundu oyũ imene hano emuliro wenyũ iniabirilama ndeke busana nʼerĩna lya Yesu Kristo wʼeNazaretĩ, oyo mwabamba oko musalaba, nĩkwa Nyamuhanga mwamũlũbũkya oko baholĩ.

¹¹Yesu yoyo Amasako akahula ati, Erĩbwe ĩnywe bahĩmbĩ mwagana, Lyabĩrĩhĩrwa mo lĩbwe erĩkatũngananaya enyũmba.

¹²Neryo erilama siriri omo gundi mundu, kusangwa Nyamuhanga sialitahula erindi rĩna omo kihugo kyosĩ omo katĩkatĩ kʼabandu, eryangatũlamya.

¹³Neryo abakulu abo mobasweka omugulu balangira obutubaha bwa Petero na Yoane, kandi mobaminya ko bali bandu batakangĩrĩrĩbawa, isi banyimanyima. Neryo mobibuka ko bali bandu abasiba haguma na Yesu.

¹⁴Neryo kandi mobabula ekyʼerĩbũga, kusangwa ibakalangira omundu oyo walamĩbawa inianimene haguma na Petero na Yoane.

¹⁵Nĩkwa babere babwirabo bati balũe omwʼĩbũgĩro mobatsũka erĩkanĩa omo katĩkatĩ kabo,

¹⁶bati, Twasyakolakĩ nʼabandu aba kwehĩ? Kusangwa abosĩ abĩkere eYerũsalema babiriminya kwʼabandu aba babirikola ekitiko-tiko kĩkalĩre. Netu Sitwangatoka erigana ekyo.

¹⁷Nĩkwa tũbahĩsayebo sĩbabũge kandi, nʼomundu nʼomuguma omo lĩna lya Yesu, omwatsi oyũ siatsungane omo katĩkatĩ kʼabandu.

¹⁸Neryo babere babirikirabo, mobahanabo bati sĩbabũge kutse erĩkangĩrĩrya nʼahake omo lĩna lya Yesu.

¹⁹Nĩkwa Petero na Yoane mobasũbĩryabo bati, Ĩnywe mubye batswerĩ nga linatunganene omo meso wa Nyamuhanga erĩbowa, kutse erĩowa Nyamuhanga.

²⁰Kusangwa Sitwangatoka erireka erĩbũga ebyo twabirilolako nʼebyo twabĩrĩowa.

²¹Neryo erĩbũgĩro molyasyũbahĩrĩryabo, neryo mobaboholabo mobabula ekyʼerisuyirirabo busana nʼabandu, kusangwa abosĩ babya bakapipa Nyamuhanga busana nʼekyakolawa.

²²Kandi omundu oyo walamĩbawa omo kitiko-tiko ekyo abya wʼemyaka eyĩlabĩre amakũmĩ ani.

²³Neryo babere baboholabo, Petero na Yoane mobasuba oko ndeko yabo, mobabwirabo emyatsi yosĩ eyo abahererĩ bakulu nʼabakulu babwirabo.

²⁴Neryo omugulu bowa ebyo, abosĩ mobasaba Nyamuhanga omo mutima muguma bati, Uwe Mwami Mukulu, ni iwe wahangika olubula nʼekihugo, nʼengetsi, nʼebyosĩ ko birimo!

²⁵Oyo wabũga omo Mũlĩmũ Abũyĩrĩre omo buno bwa tata wetu omugombe wuwe Dawĩdĩ, ati,

²⁶Busana nakĩ, ebihanda bikahitana kwehĩ? Busana nakĩ abandu bakaya embĩta ya busa kwehĩ? Abami bʼekihugo bakayisamambula, Nʼabatabalĩ bakaya embĩta yo haguma, Bakalwa nʼOmwami Mukulu, Kandi bakalwa na Kristo wuwe.

²⁷Kusangwa kwenene Herode na Pontĩo Pilato, haguma nʼEbihanda nʼabandu ba Ĩsraelĩ, mobahĩndana haguma omo mũyĩ, erilwa nʼomugombe wawe oyũbũyĩrĩre ye Yesu, oyo wayira mo Kristo.

²⁸Mobahĩndana haguma bakole ebyosĩ wayĩsũnza omo bũtokĩ bwawe nʼerisonda lyawe uti bikolawe.

²⁹Na lino, Mukama, Ũlebaye erĩũbahĩrĩrya lyabo, kandi uleke abagombe bawe babũge ekĩnywa kyawe nʼeritendiubaha lyosĩ.

³⁰Usumbe ebyala byawe, ũlamaye, nʼebitiko-tiko nʼebyʼeriswekera bikolawe omo lĩna lyʼomugombe wawe oyũbũyĩrĩre, ye Yesu.

³¹Neryo babere babisaba, aho babya bahĩndene mohasũka-sũkanĩbwa, nʼabosĩ mobũsũla nʼOmũlĩmũ Abũyĩrĩre, mobabũga ekĩnywa kya Nyamuhanga omo butubaha.

³²Nʼendeko yʼabandu abĩkĩrĩraya moyabya nʼomutima nʼobũlengekanĩa buguma. Sihali oyo wabũga ati ebindu biwe ni biwe ĩyowene. Nĩkwa mobasangira ebyosĩ.

³³Kandi abakwenda mobatũla omwatsi wʼerĩlũbũka lyʼomukama Yesu omo bũtokĩ bunene, nʼolukogo lunene lwabya kubo abosĩ.

³⁴Kandi sihabya omundu wʼobwaga omo katĩkatĩ kabo. Neryo ababya bawite ebitaka kutse amanyũmba, mobagũlyabyo, mobaleta obũgũlĩ bwabyo,

³⁵mobahĩra obũgũlĩ obo, oko bisando byʼabakwenda, neryo mobyagabirwa oko buli mundu ngʼobwaga buwe ko bwabya.

³⁶Neryo Yosefũ, Omũlawĩ ĩnĩabũtĩrwe eKĩpũro, abakwenda mobamwahula mo Barnaba (erĩna eryo liti, Mugala wʼerihanda omutima),

³⁷abya nʼekitaka, neryo mwagũlyakyo, mwaleta obũgũlĩ bwakyo mwahĩrabo embere syʼabakwenda.