Read nande Emĩbĩrĩ 5 Bible Online

Emĩbĩrĩ 5 - nande bible

Emĩbĩrĩ 5

¹Nĩkwa habya omundu erĩna liwe iyo Anania, nʼerĩna lya mũkalĩwe lyabya Safira. Iye mwagũlya ekitaka kiguma kyabo,

²nĩkwa mwabika ekitswe kyʼobũgũlĩ obo busana naye, nʼomũkalĩ wuwe ĩnĩanasĩ omwatsi oyo, neryo mwaha abakwenda ekindi kitswe kyʼobũgũlĩ.

³Nĩkwa Petero mwamubwira ati, Busana nakĩ walekĩre Satanĩ iyabya omo mutima wawe eribihira Omũlĩmũ Abũyĩrĩre, nʼeribika oko bũgũlĩ bwʼekitaka kwehĩ?

⁴Omugulu wabya ute wagũlya ekitaka sikyabya kyawe kwehĩ? Kandi omugulu wagũlayakyo sikyabya omo hamũlĩ yawe kwehĩ? Wamaganĩrya erikola omwatsi oyũ omo mutima wawe busana nakĩ kwehĩ? Sulitabiha uku bandu, nĩkwa Ulyabiha uku Nyamuhanga!

⁵Anania abere owa ebĩnywa ebĩ, mwawa ahisi, mwalekula, neryo abosĩ abowakyo mobubaha kutsibu.

⁶Neryo abalwana mobahangana, mobamusenga, mobamuta.

⁷Neryo enyũma wʼesyosaa ĩsatu, omũkalĩ wuwe mwahĩkamo, ĩsĩasĩ ekyakolekĩre.

⁸Petero mwamũbũlya ati, Umbwire obũgũlĩ obũlyalũa oko kitaka mũlyagũlaya, bo nʼobũ kwehĩ? Naye mwabũga ati, Ega, obũgũlĩ ko na singaho.

⁹Neryo Petero mwamũbũlya ati, Busana nakĩ uwe nʼĩbawe, mwabirihanana haguma erirenga oko Mũlĩmũ wʼomukama kwehĩ? Lebaya, abandu abakabita ĩbawe bane oko lũkyo, kandi bakandikutwala nawe nibya!

¹⁰Neryo-neryo mwawa ahisi oko bisando biwe, mwalekula. Neryo abalwana babere bakingira mobeya iniabirihola, mobamutwala, eyĩhya, mobamuta hakũhĩ nʼĩba wuwe.

¹¹Neryo ekanĩsa yosĩ, nʼabosĩ abowa omwatsi oyo mobubaha kutsibu.

¹²Neryo abakwenda mobakola ebitikotiko nʼebyʼeriswekera bingi omo katĩkatĩ kʼabandu. Nʼabandu bosĩ babya bʼomutima muguma ĩbahĩndene omo baraza ya Solomono.

¹³Nĩkwa sihabya bandi bate bʼendeko yabo abalenga erĩyĩhĩra kubo, nʼomo abandu mobapipabo.

¹⁴Nĩkwa abĩkĩrĩraya oko Mukama babya bangi, esyondeko syʼabalume nʼabakalĩ, mobatomekera oko ndeko yabo.

¹⁵Kyaleka ibahekera abakonĩ omo syonzira, nʼerĩhĩrabo oko syongyingo, nʼoko birago, bati omugulu Petero akalabaho, kumbe ekyũtsũtsũ kiwe ikyatogera oko muguma wa kubo.

¹⁶Nʼesyondeko syʼabandu mosyalũa oko mĩyĩ hakũhĩ nʼeYerũsalema bakahĩndana, nʼerireta abakonĩ nʼabakagalawa nʼebĩrĩmũ bĩtĩsĩrĩre. Nʼabosĩ mobalamĩbwa.

¹⁷Nĩkwa omũhererĩ mukulu, mwahangana haguma nʼabalĩkyabo bosĩ (ekyo ni kihanda kyʼAbasadũkayo), mobũsũla nʼobũha.

¹⁸Neryo mobahamba abakwenda mobahĩrabo omo nyũmba yʼomũlĩkĩ wʼomũyĩ.

¹⁹Nĩkwa omo kiro, omũlaĩka wʼomukama mwakingula esyonyũyĩ syʼenyũmba yʼomũlĩkĩ, mwahũlũkĩrya abakwenda bʼeyĩhya, mwabwirabo ati,

²⁰Mugende, muhangane omo Hekalũ, mubwire abandu ebĩnywa byosĩ byʼeNgebe eyĩ.

²¹Neryo babere bowa ebĩ, mobingira omo Hekalũ omo ngyakyangyakya, mobatsũka erĩkangĩrĩrya. Neryo omũhererĩ mukulu, nʼabalĩkyabo mobabirikira erĩbũgĩro lyosĩ lyo haguma, nʼabakulu bʼekihanda kya Ĩsraelĩ, neryo mobatumira oko bakwenda omo nyũmba yʼomũlĩkĩ bati baletawe.

²²Nĩkwa omugulu abalembya bahĩkaho, mobateya bakwenda bʼomo nyũmba yʼomũlĩkĩ. Neryo mobasuba okwʼĩbũgĩro bati,

²³Motũkegaya enyũmba yʼomũlĩkĩ ĩnĩnakĩngĩre ndeke, nʼabateya ibanimene oko syongyo, nĩkwa motukabya twakingulamo, motutetabana mo mundu!

²⁴Neryo omugulu omũteya wʼeHekalũ, nʼabahererĩ bakulu bowa ebĩnywa ebĩ, mobalemwa omwatsi oyũ ngʼasyabya ati.

²⁵Neryo omundu muguma mwahĩka mwabwirabo ati, Lebaya! abandu abo mwahĩra omo mũlĩkĩ banimene omo Hekalũ banemũkangĩrĩrya bandu!

²⁶Neryo omũteya oyo haguma nʼabalembya mobayenda abakwenda butsira mwaga; kusangwa babya bakubaha abandu, bati bakasyaguswa kwʼamabwe.

²⁷Neryo mobaleta abakwenda mobahanganĩabo omwʼĩbũgĩro. Neryo omũhererĩ mukulu oko bahererĩ bosĩ mwabũlyabo

²⁸ati, Motwabahana kutsibu tuti sĩmũkangĩrĩraye omo lĩna erĩ. Lebaya! mwabĩrĩũsũlya eYerũsalema mwʼerĩkangĩrĩrya lyenyũ, kandi mukasonda erĩtũhĩra kʼomusango wʼomusasi wʼomundu oyo.

²⁹Nĩkwa Petero nʼabakwenda mobasũbĩrya bati, Litolere itwakenga Nyamuhanga kwilaba bandu.

³⁰Nyamuhanga wʼabotata wetu mwalũbũkya Yesu, oyo mwĩta nʼerimubamba oko musalaba.

³¹Nĩkwa Nyamuhanga mwamũhamya oko byala biwe byʼamali mo Mukulu nʼomũlamya, ahe Ĩsraelĩ eribindula emitima yabo nʼeribuyirwa lyʼebibi.

³²Netu tuli balangĩrĩ bʼemyatsi eyĩ, ĩtwe haguma nʼOmũlĩmũ Abũyĩrĩre, ogo Nyamuhanga abiriha abakamukenga.

³³Nĩkwa omugulu bowa ebĩ, mobahitana ibakasonda erĩĩtabo.

³⁴Nĩkwa Omũfarĩsayo muguma oyukahulawa mo Gamalĩelĩ, omũkangĩrĩrya wʼEmigambo, iniakakengawa nʼabandu bosĩ, mwahangana omwʼĩbũgĩro, mwahamula ati abakwenda bahĩrawe eyĩhya yo hake.

³⁵Neryo mwabwira erĩbũgĩro ati, Ĩnywe balume ba Ĩsraelĩ, muyitondeke nga mwanzĩre erikolakĩ nʼabandu aba.

³⁶Kusangwa oko gundi mugulu ye Teũda mwahuluka iniakayahula mo mundu mukulu. Neryo abandu nga magana ani mobamukwama. Teũda oyo mwĩtwa, nʼabosĩ abamukwama mobapanza-panzwa, nʼomwatsi wuwe mwahwa.

³⁷Nʼenyũma wʼaho Yũda wʼeGalĩlaya mwahangana omo biro byʼetsapa. Naye mwayira abandu bangi erimukwama. Naye nibya mwĩtwa, nʼabosĩ abamukwama mobapanza-panzwa.

³⁸Neryo omo mwatsi oyũ, ngababwira nyiti, simukwame abandu aba, mulekebo. Kusangwa kumbe amalengekanĩa aya nʼomũbĩrĩ oyũ, amabya wʼabandu, iniakandisyabulirana.

³⁹Nĩkwa omwatsi oyũ amabya ini wa Nyamuhanga, simwendisyatoka erĩsĩngana. Kite kitya mũkandĩyĩmĩnyĩkalya ko mukalwa na Nyamuhanga.

⁴⁰Neryo erĩbũgĩro molyalĩga erihana lya Gamalĩelĩ. Mobabirikira abakwenda, mobaswĩryabo omo nyambĩ, neryo mobahanabo bati sĩbabũge kandi omo lĩna lya Yesu, neryo mobalwĩkabo.

⁴¹Neryo abakwenda mobalũa omwʼĩbũgĩro ibanemutsema bati Nyamuhanga akaganzabo ngʼabatolere erihemulwa busana nʼerĩna lya Yesu.

⁴²Neryo ebiro byosĩ, omo Hekalũ nʼomo manyũmba wʼabandu, mobatũmbya erĩkangĩrĩrya nʼerĩtũla Engulu Yowene ya Yesu kwʼali Kristo.