Read nande Emĩbĩrĩ 6 Bible Online

Emĩbĩrĩ 6 - nande bible

Emĩbĩrĩ 6

¹Neryo oko biro ebĩ, omugulu eriganza lyʼabiga lyabya likakanya, Abayũda bʼekihugo kyʼAbagĩrĩkĩ mobasĩnĩngũlĩra Bayũda, kusangwa abakwakalĩ babo mobataganzwa okwʼigabirwa lyʼakalyo kʼobuli kiro.

²Neryo abakwenda erĩkũmĩ nʼababiri, mobabirikira endeko yʼabiga bati, Sĩryowene tukaleka ekĩnywa kya Nyamuhanga busana nʼerikolera akalyo.

³Nĩkwa balĩkyetu, muyisoge abandu balinda omo katĩkatĩ kenyũ, abakasĩmawa, aboswĩre nʼOmũlĩmũ Abũyĩrĩre nʼamenge, tũhĩrebo oko mũbĩrĩ oyũ.

⁴Nĩkwa ĩtwe twasyayĩhĩra okwʼisaba, nʼomũbĩrĩ wʼerĩkangĩrĩrya ekĩnywa.

⁵Neryo endeko yosĩ mobasĩma omwatsi oyo, Mobayisoga Setefano oyo goswĩre nʼerĩkĩrĩrya nʼOmũlĩmũ Abũyĩrĩre, na Fĩlĩpo, na Porokoro, na Nĩkanora, na Tĩmonĩ, na Parmena, na Nĩkolao wʼeAntĩokĩa, oyo wabinduka eribya Mũyũda.

⁶Neryo endeko moyahĩra aba embere wʼabakwenda, neryo babere babisaba mobahĩra kubo kwʼebyala.

⁷Litya ekĩnywa kya Nyamuhanga mokyakanyirira. Nʼeriganza lyʼabiga nalyo molyakanyirira kutsibu eYerũsalema, nʼabahererĩ bangi mobalĩga erĩkĩrĩrya eryo.

⁸Neryo Setefano, ĩnĩoswĩre nʼolukogo nʼobũtokĩ, mwabya akakola ebyʼeriswekera nʼebitiko-tiko omo katĩkatĩ kʼabandu.

⁹Nĩkwa abandi bandu, ababya bandu bʼenyũmba yʼerĩhĩndanamo eyikahulawa mo Bandu bʼobwĩranda. Ibo ni bandu bʼeKũrene, nʼeAlesandũrĩa, nʼabandi bʼeKĩlĩkĩa nʼeAsĩa mobatsũka erikuba obuhaka na Setefano.

¹⁰Nĩkwa Omũlĩmũ mwaha Setefano yʼamenge, kyaleka ĩnĩasĩngabo.

¹¹Neryo mobayakulula abandu ababũga bati, Twabĩrĩowa akabũga ebĩnywa byʼeritsuma Musa na Nyamuhanga.

¹²Batya mobagangagangya abandu, nʼabakulu, nʼabakangĩrĩrya bʼEmigambo. Neryo mobatsimba Setefano mobamukurira embere syʼerĩbũgĩro.

¹³Neryo mobaleta bandu abakamũsĩngĩsĩraya bati, Omundu oyũ akabũga nabi emigulu yosĩ busana na hano ahabũyĩrĩre, na busana nʼEmigambo nibya.

¹⁴Kusangwa twabĩrĩowa akabũga ati, Yesu wʼeNazaretĩ oyũ, asyaherya hano, nʼeribindula emitsye eyo Musa atuha!

¹⁵Nʼabosĩ ababya bĩkere omwʼĩbũgĩro, mobasamalira Setefano, mobalangira obũsũ buwe ibwamasosa obũsũ bwʼomũlaĩka.