Read nande Emĩbĩrĩ 7 Bible Online

Emĩbĩrĩ 7 - nande bible

Emĩbĩrĩ 7

¹Neryo omũhererĩ mukulu oko bahererĩ bosĩ mwabũlya Setefano ati, Emyatsi eyĩ ni kwenene kwehĩ?

²Neryo Setefano mwasũbĩryabo ati, Balĩkyetu, nʼabotata, mũnyowe! Nyamuhanga wʼolukengerwa mwabutukira tata wetu Abrahamũ, omugulu abya eMesopotamia, ate ayĩkala eHaranĩ.

³Neryo mwamubwira ati, Ũlũe omo kihugo kyenyũ, noko bʼekĩtũnga kyawe, neryo uye oko kihugo ekyo nasyakũkangya.

⁴Neryo mwalũa omo kihugo kyʼAbanya Kaldea, mwĩkala eHaranĩ. Neryo ĩse wa Abrahamũ abere ahola, Nyamuhanga mwamũhũmya erĩhĩka omo kihugo ekĩ aho mwĩkere lino.

⁵Oko mugulu oyo Nyamuhanga mwataha Abrahamũ oko kihugo ekĩ, kutse nʼekitswe kyʼemetere nguma. Nĩkwa mwamulagakyo isiawite mwana, ati asyamuhakyo mo kitaka kiwe, nʼekyʼabana buwe.

⁶Nĩkwa Nyamuhanga mwabwira Abrahamũ ati, Abitsikulu bawe basyabya babunga, basyĩkala omo kihugo kyʼobubunga, eyo basyabya abakobe nʼerikolwa nabi emyaka magana ani (400).

⁷Nĩkwa Nyamuhanga ati, Nasyatswera ekihanda ekyo ekikayirabo mo bakobe, nʼenyũma wʼaho basyalũa eyo, ibanyikolera hano.

⁸Neryo Nyamuhanga mwaha Abrahamũ, omwatsi wʼerĩbanĩa mo kĩmĩnyĩsyo kyʼendagane. Neryo Abrahamũ mwabuta Ĩsaka, mwamũbanĩa ekiro kyʼomunani; neryo Ĩsaka mwabuta Yakobo, na Yakobo mwabuta abotatakulu erĩkũmĩ nʼababiri.

⁹Neryo abotata-kulu abo mobakwa Yosefũ yʼobũha, mobamũgũlya mo mukobe eMĩsĩrĩ. Nĩkwa Nyamuhanga abya haguma naye.

¹⁰Kandi mwamũlamya omo malĩge wuwe gosĩ. Kandi mwaha Yosefũ yʼamenge nʼerĩsĩmwa omo meso wa Farao, omwami wʼeMĩsĩrĩ. Kandi Farao mwayira Yosefũ mo mũtabalĩ mukulu wʼeMĩsĩrĩ, nʼowʼekĩtũnga kyosĩ kyʼOmwami.

¹¹Neryo enzala moyahĩka omo kihugo kyʼeMĩsĩrĩ nʼekyʼeKanana kyosĩ, nʼobũlĩge bunene, nʼabotata-kulu wetu mobabula akalyo.

¹²Nĩkwa omugulu Yakobo owa ko hali akalyo eMĩsĩrĩ, mwatuma, abotata-kulu wetu bʼeyo engendo yʼerĩmbere.

¹³Nʼoko lugendo lwʼakabiri Yosefũ mwayĩmĩnyĩkalya oko bagala babo, nʼekĩtũnga kya Yosefũ mokyamĩnyĩkalĩbwa uku Farao.

¹⁴Neryo Yosefũ mwatumira uku Yakobo tata wuwe erimubirikira nʼekĩtũnga kiwe kyosĩ, abandu makũmĩ alinda nʼabatanu eriasa eMĩsĩrĩ.

¹⁵Neryo Yakobo mwandagalira eMĩsĩrĩ, neryo mwaholerayo iye haguma nʼabotata-kulu wetu,

¹⁶Neryo ebĩnda byabo mobyatabwa eSekemũ omo mahero ago Abrahamũ agula oko franka uku bagala ba Hemora.

¹⁷Neryo omugulu wʼendagane eyo Nyamuhanga alahĩraya Abrahamũ abya akasonda erĩhĩka, abandu mobakanyirira, mobabya bangi eMĩsĩrĩ.

¹⁸Neryo eMĩsĩrĩ mohasinga ogundi mwami, oyũtasĩ Yosefũ.

¹⁹Iye mwakola menge nʼekihanda kyetu, mwakola abotata-kulu betu bo nabi, ati baguse abana babo bahole.

²⁰Neryo Musa mwabutwa oko mugulu oyo. Abya mubuya kutsibu omo meso wa Nyamuhanga, mobamulembera omo nyũmba yʼĩse emikera ĩsatu.

²¹Neryo omugulu ahĩrawa eyĩhya, mwali wa Farao mwamwĩmya, mwamulembera eribya mugala wuwe.

²²Musa mwakangĩrĩrĩbwa omo menge gosĩ wʼAbanya Mĩsĩrĩ, kandi mwabya mundu mukulu omo bĩnywa nʼemĩbĩrĩ.

²³Nĩkwa emyaka ya Musa yabere yasonda eribya makũmĩ ani, mwaganĩrya eriyabana abalĩkyabo abana ba Ĩsraelĩ.

²⁴Nĩkwa Musa mwalangira Omunya Mĩsĩrĩ oyukakola Omũĩsraelĩ yo nabi, neryo Musa mwimira Omũĩsraelĩ mwakĩsya mwĩta Omunya Mĩsĩrĩ.

²⁵Musa mwaganĩrya ati abalĩkyabo Abaĩsraelĩ banganĩmya ngoko Nyamuhanga abya akalamyabo omo byala biwe, nĩkwa mobataminya batya.

²⁶Nʼengyakya Musa mwahuluka kubo ibakalwa, neryo mwalenga erĩsanganĩabo omo buholo ati, Batahi muli baguma, busana nakĩ mukakolerana nabi kwehĩ?

²⁷Nĩkwa oyo wabya akahũtalya mũlĩkyabo, mwakũna Musa ati, Nindi wakũhĩrĩre mo mũtabalĩ nʼomũtswerĩ wetu kwehĩ?

²⁸Wanzĩre erĩnyĩta ngoko wĩta Omunya Mĩsĩrĩ yo mũlĩgolo kwehĩ?

²⁹Nĩkwa omugulu Musa owa ekĩnywa ekĩ mwatibita, mwabya mubunga omo kihugo kyʼeMĩdĩanĩ. Kandi eyo Musa mwabutirayo bagala babiri.

³⁰Neryo emyaka makũmĩ ani yabere yahwa, omũlaĩka mwahuluka uku Musa omo kirimi kyʼomuliro omo kisaka kyʼomusakisaki omo mbwarara yʼekitwa kyʼeSĩnaĩ.

³¹Nĩkwa Musa mwaswekera ekyo alangira, neryo abere ayĩtũnda erĩyĩtegererya ndeke, omulenge wʼOmukama mwabũga ati,

³²Ĩngye indi Nyamuhanga wʼaboso-kulu wawe, Nyamuhanga wa Abrahamũ, na Ĩsaka, na Yakobo. Neryo Musa mwatitimana nʼeriubaha, mwataswalenga erilangira.

³³Nĩkwa Omukama mwabũga naye ati, Ũlũsaye esyongendero oko bisando byawe, kusangwa aho uhangene ni kitaka kĩbũyĩrĩre.

³⁴Nabirilangira kwenene amalĩge wʼabandu bage eMĩsĩrĩ. Kandi nabĩrĩowa erĩsĩmba lyabo, nabĩrĩkĩma erĩlamyabo. Neryo wase ngakutuma eMĩsĩrĩ.

³⁵Musa oyo Baĩsraelĩ bagana bati, Nindi wakũyĩrĩre mo mũtabalĩ nʼomũtswerĩ kwehĩ? Yoyo Nyamuhanga atuma eribya mũtabalĩ nʼomũlamya, haguma nʼerĩwatĩkya lyʼomũlaĩka oyo wamubutukirako omo kisaka kyʼemisakisaki.

³⁶Omundu oyo mwasondola Abaĩsraelĩ erĩlũsyabo eMĩsĩrĩ, iniakakola ebyʼeriswekera, nʼebitiko-tiko omo myaka makũmĩ ani, omo kihugo kyʼeMĩsĩrĩ, nʼomo Ngetsi yʼeNgula, nʼomo mbwarara.

³⁷Oyũ ni Musa oyo wabwira bandu ba Ĩsraelĩ ati, Nyamuhanga asyabahanganĩrya omũmĩnyererĩ, ngoko anyituma, oyũkalũa oko balĩkyenũ.

³⁸Yoyo wabya haguma nʼabandu ba Ĩsraelĩ omo mbwarara. Abyayo haguma nʼabotata-kulu Wetu, kandi haguma nʼomũlaĩka oyo wabũga naye oko kitwa kyʼeSĩnaĩ. Iye mwangirira amahano wʼengebe nʼerituhago.

³⁹Kandi abotata-kulu wetu mobagana erĩowa Musa, nĩkwa mobamupona, kandi omo mitima yabo mobasuba eMĩsĩrĩ.

⁴⁰Mobabwira Harũnĩ bati Utuyirire esyonyamuhanga esikandisyatusondola. Kusangwa Sĩtwasĩ ebyahĩkĩre uku Musa oyo watũlũsaya eMĩsĩrĩ.

⁴¹Neryo mobayira esanamu yʼekyana kyʼende mo sanamu, ibakaleterayo ehongo, nʼeritsemera omũbĩrĩ wʼebyala byabo.

⁴²Nĩkwa Nyamuhanga mwalũa kubo, mwalekabo ĩbakaramaya esyongũnũnũ syʼekyanya; ngoko kĩsakĩre omo kitabu kyʼabamĩnyererĩ kiti, Abandu ba Ĩsraelĩ! Mwaherera amahere ayo nʼesyohongo ũkwʼĩngye, kwehĩ? Emyaka makũmĩ ani omo mbwarara.

⁴³Mwabya mukaheka ehema ya nyamuhanga yo Molokĩ. Nʼesyosanamu syʼengũnũnũ ya nyamuhanga wenyũ Refanĩ; Syabya sanamu esyo mwabumba erĩramyasyo. Nage nasyabahũmĩrya eyisirya wʼeBabelĩ.

⁴⁴Abotata-kulu wetu babya nʼehema embere sya Nyamuhanga omo mbwarara. Moyabambwa ngoko Nyamuhanga ahana Musa eribambayo, ngʼolulengo olo Musa alolako.

⁴⁵Nʼenyũma wʼaho abotata-kulu wetu, abahabawa ehema eyo, mobatwalayo haguma na Yosũa omugulu bĩmaya ekihugo ekyo kyʼebihanda ebyo Nyamuhanga ahiga embere syʼabotata wetu. Neryo moyabyaho erĩhĩka oko mugulu wa Dawĩdĩ.

⁴⁶Dawĩdĩ oyo mwabana erĩsĩmwa omo meso wa Nyamuhanga, neryo mwabũlya Nyamuhanga ehamũlĩ yʼeribanira Nyamuhanga wa Yakobo yʼenyũmba.

⁴⁷Nĩkwa ni Solomono yo wamũhĩmbĩra enyũmba.

⁴⁸Nĩkwa, Owendata Kutsibu sĩalĩkala omo manyũmba awakahĩmbawa nʼabandu, ngoko mũmĩnyererĩ akabũga ati,

⁴⁹Olubula nĩ kĩtũmbĩ kyage kyʼobwami, Omukama atya; Nʼekihugo nĩ kĩtũmbĩ kyʼebisando byage. Mwasyambĩmbĩra enyũmba yʼomuhanda wahi kwehĩ? Nʼaho nasyaluhukira ni hahi kwehĩ?

⁵⁰Ebyala byage byo bitahangika emyatsi yosĩ eyĩ kwehĩ?

⁵¹Ĩnywe muli bandu bakalĩre! Muli batwenge omo mitima yenyũ, nʼamatwĩ wenyũ sĩalĩowa omwatsi wa Nyamuhanga. Kandi mukalwa nʼOmũlĩmũ Abũyĩrĩre ebiro byosĩ. Muli ngʼaboso-kulu wenyũ.

⁵²Nindi oko bamĩnyererĩ oyo aboso-kulu wenyũ batendereraya kwehĩ? Kandi mobĩta abakwenda abatũla omwatsi wʼerĩhĩka lyʼOyutunganene. Na lino ĩnywe mwabirihotera oyo nʼerĩmwĩta.

⁵³Inywe mwabiriangirira Emigambo ya Nyamuhanga eyo mwahabawa nʼabamalaĩka, nĩkwa simwetakengayo.

⁵⁴Neryo abandu bʼerĩbũgĩro, omugulu bowa ebĩnywa bya Setefano ebĩ, mobahitana mobayĩsyolya.

⁵⁵Nĩkwa Setefano ĩnĩoswĩre nʼOmũlĩmũ Abũyĩrĩre mwasamalira elubula mwalangira olukengerwa lwa Nyamuhanga, na Yesu inianimene oko byala byʼamali bya Nyamuhanga.

⁵⁶Neryo mwabũga ati, Lebaya! namalangira olubula ĩlũnakĩngwĩre, nʼomugala wʼOmundu iniahangene oko byala byʼamali bya Nyamuhanga!

⁵⁷Nĩkwa mobabirikira nʼomulenge munene, kandi mobalĩba amatwĩ wabo, mobamugulukirako, iguma-guma.

⁵⁸Mobamuhigira eyĩhya wʼomũyĩ, mobamwĩta omo mabwe. Nĩkwa abalangĩrĩ mobabika esyongimba syabo oko mũlwana oyukahulawa mo Saũlo.

⁵⁹Kandi mobaswagusa uku Setefano kwʼamabwe, naye mwabirikira Omukama ati, Mukama Yesu, wangirire ekĩrĩmũ kyage!

⁶⁰Neryo Setefano mwakũkama, iniakabirikira nʼomulenge munene ati, Mukama, Suganzire kubo kwʼekibi ekĩ! Neryo abere abĩbũga atya, mwalekula.