Read nande Emĩbĩrĩ 8 Bible Online

Emĩbĩrĩ 8 - nande bible

Emĩbĩrĩ 8

¹Neryo Saũlo abya akalĩga erĩĩta Setefano. Oko kiro ekyo, erĩendererya lĩnene molyatsũka busana nʼekanĩsa eYerũsalema. Kandi abandu bosĩ bʼekanĩsa mobapanzikanira omo bihugo byʼeYũdea nʼeSamarĩa, abakwenda bate kubo.

²Nʼabandu bagenge mobata Setefano, mobamulira kutsibu.

³Nĩkwa Saũlo mwatsũka erĩherya ekanĩsa yo kutsibu, mwingira omo buli nyũmba akakura abalume nʼabakalĩ, nʼerĩhĩrabo omo mũlĩkĩ.

⁴Neryo abapanzikana mobaya eyĩ nʼeyĩ bakatũla Engulu Yowene.

⁵Fĩlĩpo naye mwandagalira oko mũyĩ wʼeSamarĩa, neryo mwakangĩrĩryabo Kristo.

⁶Neryo esyondeko syako mobatega matwĩ wabo oko byo Fĩlĩpo abũga. Abosĩ mobahulikirira, nʼerilangira ebitiko-tiko ebyo akola.

⁷Ebĩrĩmũ bibi mobyalũa oko bandu bangi ĩbĩkabũga nʼomulenge munene; kandi abandu bangi ababasĩre nʼebirema, mobalamĩbwa.

⁸Nĩkwa mohabya obutseme bunene eSamarĩa.

⁹Neryo habya mundu muguma oyukahulawa mo Sĩmonĩ, oyutula akakola obusaki omo mũyĩ oyũ wʼeSamarĩa. Abya akaswekya Abanya Samarĩa, iniakayahula mo mundu mukulu.

¹⁰Neryo abandu bosĩ, bʼomo mũyĩ oyo, abakebake, nʼabakulu-bakulu, mobamuhulikirira bati, Omundu oyũ, yo yukahulawa mo Bũtokĩ Bunene bwa Nyamuhanga.

¹¹Neryo babya bakamuhulikirira kusangwa abya ĩnĩakaswekayabo ebiro bingi omo busaki buwe.

¹²Nĩkwa omugulu bĩkĩrĩraya erĩtũlaganĩa lya Fĩlĩpo lyʼEngulu Yowene yʼobwami bwa Nyamuhanga, nʼeyʼerĩna lya Yesu Kristo, mobabatĩsĩbwa, abalume nʼabakalĩ.

¹³Sĩmonĩ naye mwĩkĩrĩrya neryo abere abĩbatĩsĩbwa, mwĩkala hakũhĩ na Fĩlĩpo, iniakasweka akalangira ebiminyikalo, nʼebitiko-tiko ebyakolawa.

¹⁴Neryo abakwenda ababya eYerũsalema babere bowa ngoko abandu bʼeSamarĩa babiriangirira ekĩnywa kya Nyamuhanga, mobatuma kubo ko Petero na Yoane.

¹⁵Nabo mobandagalirayo, mobasabirabo bati bangirire Omũlĩmũ Abũyĩrĩre.

¹⁶Kusangwa Omũlĩmũ Abũyĩrĩre abya ĩsyalĩahĩka kubo. Babya ĩbamatabatĩsĩbwa lisa omo lĩna lyʼomukama Yesu.

¹⁷Neryo Petero na Yoane mobahĩra kubo kwʼebyala, neryo mobangirira Omũlĩmũ Abũyĩrĩre.

¹⁸Nĩkwa Sĩmonĩ abere alangira ngoko Mũlĩmũ Abũyĩrĩre ahabawa busana nʼerĩhĩra lyʼebyala byʼabakwenda, Sĩmonĩ mwahererya Petero na Yoane bʼobũgũlĩ.

¹⁹Ati, Nage, mumbe ehamũlĩ eyĩ, neryo ukwʼoyo nasyahĩra kwʼebyala asyangirira Omũlĩmũ Abũyĩrĩre.

²⁰Nĩkwa Petero mwamũsũbĩrya ati, Obũgũlĩ bwawe buhere haguma nawe, kusangwa waganĩraya uti wangabana olũsũnzo lwa Nyamuhanga lʼomo bũgũlĩ!

²¹Suwite ekihande kutse erĩgabo omo mũbĩrĩ oyũ, kusangwa omutima wawe siatunganene embere sya Nyamuhanga.

²²Neryo ubindule omutima wawe uleke obubi bwawe obũ, usabe Omukama, erisonda lyʼomutima wawe, libuyirawe ukʼuwe.

²³Kusangwa namalangira goswĩre mʼobũha bũkalĩre, nʼomo mũlĩkĩ wʼebibi.

²⁴Neryo Sĩmonĩ mwabwira Petero na Yoane ati, Ĩnywe munyisabire oko Mukama, emyatsi mũkabĩbũga eyĩ sĩyĩmbĩkeko nʼomuguma.

²⁵Neryo Petero na Yoane, babere babĩtũla omwatsi go ndeke, nʼerĩbũga ekĩnywa kyʼomukama, mobatsũka erisuba eYerũsalema. Neryo omo nzira mobatũla Engulu Yowene omo hĩyĩ hingi hyʼAbanya Samarĩa.

²⁶Nĩkwa omũlaĩka wʼomukama mwabũga na Fĩlĩpo ati, Uhangane, ugende oko kitambi kyʼeyĩkwa oko nzira eyikandagala ĩkalũa eYerũsalema eriya eGaza. Eyĩ ni nzira yʼembwarara.

²⁷Neryo Fĩlĩpo mwahangana mwayayo. Neryo habya omundu oyũbũnĩre owʼeEtĩopĩa, iniakasuba ewabo. Omundu oyo abya mundu mukulu oyukabika ebindu byosĩ byʼomwamikalĩ ye Kandake wʼeEtĩopĩa. Kandi abya ĩnĩayĩre eYerũsalema erĩyaramya Nyamuhanga,

²⁸iniakasuba eEtĩopĩa omo galĩ yiwe. Omugulu abya akagenda omo galĩ yiwe eyo, abya akasoma omo kitabu kyʼomũmĩnyererĩ Ĩsaya.

²⁹Neryo Omũlĩmũ Abũyĩrĩre mwabwira Fĩlĩpo ati, Ugende, uyitomeke oko galĩ eyo.

³⁰Neryo Fĩlĩpo mwatibita eyo ali, nĩkwa mowa akasoma ekitabu kyʼomũmĩnyererĩ Ĩsaya, neryo mwamũbũlya ati, Unemuminya ebyo ukasoma kwehĩ?

³¹Nĩkwa omukulu oyo mwabũga ati, Ko nangaminya nyiti ndawite oyũkanyowĩsayabyo kwehĩ? Neryo mwabũlya Fĩlĩpo ati asambire oko galĩ nʼerĩĩkala naye.

³²Nĩkwa omulondo wʼAmasako awabya akasoma waya, ati, Abya ngʼembũlĩ eyikatwalawa erikerwa, Abya ngʼekyana kyʼembũlĩ ekikabya bũkũtũ omugulu bakatwa obweya bwakyo. Mwatabũga kĩnywa nʼekiguma.

³³Kandi mwahemulwa, kandi mobamukaga erĩbanza. Nindi wasyatũla omwatsi wʼabana buwe kwehĩ? Kusangwa engebe yiwe omo kihugo yabĩrĩlũsĩbwaho.

³⁴Neryo omukulu oyo mwabũga na Fĩlĩpo ati, Unyibwire omũmĩnyererĩ ngʼakahulandi. Akayahula kutse akahula ogundi kwehĩ?

³⁵Neryo Fĩlĩpo mwatsũka oko mulondo oyo wʼAmasako, mwamũtũlĩra Engulu Yowene ya Yesu.

³⁶Neryo babere bakagenda omo nzira eyo, mobahĩka ahabya magetsi, neryo omukulu oyo mwabũga ati, Lebaya, hano hali amagetsi! Ekyanganyĩkakĩrya erĩbatĩsĩbwa ni kyahi kwehĩ? [

³⁷Neryo Fĩlĩpo mwabũga naye ati, Wangahatĩsĩbwa Wamĩkĩrĩrya nʼomutima wawe gosĩ. Naye mwasũbirya ati, Namĩkĩrĩrya ko Yesu Kristo ni Mugala wa Nyamuhanga.]

³⁸Neryo mwahamula ati egalĩ ihangane, neryo ababiri bosĩ, Fĩlĩpo nʼomukulu oyo, mobandagalira omo magetsi, na Fĩlĩpo mwamũbatĩsya.

³⁹Neryo omugulu balũa omo magetsi, Omũlĩmũ wʼomukama mwabakula Fĩlĩpo, nʼomukulu oyo mwataswamulolako, nĩkwa mwaya omo lugendo luwe ĩnĩatsemĩre ndeke.

⁴⁰Neryo Fĩlĩpo mwayabanika eAzoto. Neryo mwalaba omo mĩyĩ yosĩ ĩnĩakatũla Engulu Yowene, erĩhĩka e Kaĩsarĩ.