Read nande Emĩbĩrĩ 9 Bible Online

Emĩbĩrĩ 9 - nande bible

Emĩbĩrĩ 9

¹Nĩkwa Saũlo iniakinahaya ati akĩta abiga bʼomukama, mwaya oko Mũhererĩ mukulu oko bahererĩ bosĩ!

²Neryo mwamusaba esyobarua oko manyũmba wʼerĩhĩndanamo eDamasĩkĩ, ati ameyayo abandu abakakwama Enzira yʼomukama, abalume kutse abakalĩ, iniatoka eribohabo nʼeritwalabo eYerũsalema.

³Neryo abere anemugenda akahĩka hakũhĩ nʼeDamasĩkĩ, neryo-neryo ekyakakala mokyalũa elubula mokyamũkolerya.

⁴Neryo mwawa oko kitaka, mowa omulenge akabũga naye ati, Saũlo, Saũlo! busana nakĩ ũkanyendereraya kwehĩ?

⁵Neryo Saũlo mwabũga ati, Ulindi kwehĩ Mukama? Naye mwabũga ati, Indi Yesu, oyo ũkendereraya.

⁶Nĩkwa uhangane, wingire omo mũyĩ, nʼeyo wasyabwirwa ebyo utolere iwakola.

⁷Nĩkwa abalume ababya naye oko lugendo mobahangana bũkũtũ, ĩbakowa omulenge oyo, nĩkwa isibetalangira mundu.

⁸Neryo Saũlo mwahangana oko kitaka, nĩkwa nomo meso wuwe abya alĩbũkere, mwatatoka erilangira kindu, mobamuwatako oko byala, mobamutwala eDamasĩkĩ.

⁹Neryo oko biro bisatu mwatatoka erilangira, kutse mwatalya kutse erĩpũlya kindu.

¹⁰Neryo eDamasĩkĩ habya mwiga muguma oyukahulawa mo Anania. Neryo Omukama mwabũga naye omo bũlĩme ati, Anania! Naye mwasũbĩrya ati, Lebaya, ĩngye yono, Mukama.

¹¹Neryo Omukama mwabũga naye ati, Hangana, ugende omo nzira eyikahulawa mo Litunganene, Ũbũlaye omo nyũmba ya Yũda busana nʼomundu wʼeTarso, oyukahulawa mo Saũlo, kusangwa, lebaya, akasaba.

¹²Naye abirilangira omo bũlĩme omundu oyukahulawa mo Anania akingira omo nyũmba nʼerĩmũhĩra kwʼebyala, atoke eriswabana erilangira liwe.

¹³Neryo Anania mwasũbĩrya ati, Mukama, abandu bangi babirimbwira omwatsi wʼomundu oyo, ngoko abirikola abandu bawe eYerũsalema bo nabi kutsibu.

¹⁴Na hano eDamasĩkĩ awite ehamũlĩ yʼabahererĩ bakulu eriboha abosĩ abakalakira erĩna lyawe.

¹⁵Nĩkwa Omukama mwabwira Anania ati, Ugende, kusangwa nabiriyisogaye, erĩmĩnyĩsya erĩna lyage oko bʼEbihanda, nʼabami, nʼabana ba Ĩsraelĩ.

¹⁶Nage nasyamũkangya ebyosĩ ebyo asyagalwamo busana nʼerĩna lyage.

¹⁷Neryo Anania mwahongoka, mwingira omo nyũma eyo, kandi mwahĩra ebyala biwe uku Saũlo ati, Saũlo, mũlĩkyetu, Omukama Yesu amanyituma, oyo wakubutukirako omo nzira wasiramo. Abirinyituma iwatoka eriswabana erilangira lyawe, nʼerĩũsũlĩbwa mʼOmũlĩmũ Abũyĩrĩre.

¹⁸Neryo-neryo ebindu ebiri ngʼesyongũkũ mobyatoga bĩkalũa oko meso wuwe, neryo mwaswabana erilangira liwe, neryo mwahangana mwabatĩsĩbwa.

¹⁹Neryo Saũlo abere abirya akalyo, mwabana maka. Neryo Saũlo mwasiba nʼabiga ebiro bike eDamasĩkĩ.

²⁰Kandi mwaya neryoneryo omo manyũmba wʼerĩhĩndanamo akatũla engulu ya Yesu, ati ni Mugala wa Nyamuhanga.

²¹Neryo abosĩ abamowa mobasweka bati, Omundu oyũ si yo nʼoyo wĩta abandu ababya bakabirikira oko lĩna erĩ kwehĩ? Kandi, mwatahĩka enoka busana nʼomwatsi wʼeribohabo nʼeritwalabo oko bahererĩ bakulu kwehĩ?

²²Nĩkwa Saũlo mwabana amaka omwʼikangĩrĩrya ĩnĩakasĩnga Abayũda ababya bĩkere eDamasĩkĩ, nʼerĩkangya ndeke Yesu kwʼali Kristo.

²³Enyũma wʼebiro bingi, Abayũda mobahĩndana, mobaya embĩta yʼerĩĩta Saũlo.

²⁴Nĩkwa Saũlo mwabwirwa omwatsi wʼembĩta yabo. Kandi mobalĩmbya esyongyo syʼomũyĩ, omo kiro nʼomo musibo bati bĩte Saũlo.

²⁵Nĩkwa abiga buwe mobamũtswesya omo kiro, mobamwandagalya omo kitiri bakamũlabya omo mwanya wʼolũhĩmbo lwʼomũyĩ.

²⁶Neryo Saũlo mwaya eYerũsalema, nʼeyo mwalenga erĩĩkala nʼabiga. Nĩkwa abosĩ mobamubaha ĩsĩbetalĩga kwʼali mwiga.

²⁷Neryo Barnaba mwaminya omwatsi oyo, mwamuleta oko bakwenda, mwakanĩryabo ngoko Saũlo alangira Omukama yʼomo nzira, kandi ngoko Mukama abũga naye. Kandi mwabwirabo ngoko Saũlo akangĩrĩraya omwatsi omo lĩna lya Yesu eDamasĩkĩ butsira eriubaha.

²⁸Neryo Saũlo mwasiba nabo iniakalendera omo mũyĩ wʼeYerũsalema erĩkangĩrĩrya butsira eriubaha, omo lĩna lyʼomukama.

²⁹Kandi mwabya akabũga nʼerikuba obuhaka nʼAbayũda abakabũga omo Kĩgĩrĩkĩ. Nĩkwa mobasonda erĩmwĩta.

³⁰Neryo abalĩkyetu babere babĩowa omwatsi oyo mobatwala Saũlo eKaĩsarĩa, mobamutuma eTarso.

³¹Neryo ekanĩsa yʼeYũdea hosĩ nʼeGalĩlaya, nʼeSamarĩa moyabya nʼobuholo. Kandi ekanĩsa moyayĩhĩmba, nʼerĩyĩgenderya omʼubaha lyʼomukama, nʼomwʼĩsĩbĩkya lyʼOmũlĩmũ Abũyĩrĩre, moyakanyirira.

³²Nĩkwa Petero mwalendera ehosĩ-hosĩ eyo, neryo mwandagalira oko bandu ba Nyamuhanga ababya bĩkere eLũda.

³³Eyo Petero mweya yʼomundu oyukahulawa mo Aĩnea, oyo wabya alwere ĩsĩalĩlũa omo ngyingo yiwe emyaka munani, kusangwa abya abasĩre.

³⁴Petero mwamubwira ati, Aĩnea, Yesu Kristo akakũlamaya. Hangana, usese engyingo yawe. Neryo-neryo Aĩnea mwahangana.

³⁵Neryo abandu bosĩ ababya bĩkere eLũda nʼeSaronĩ mobamulolako, mobabindukira Omukama.

³⁶Neryo eYopa habya omwiga muguma erĩna liwe iyo Tabĩta, eribindula erĩna liwe omo Kĩgĩrĩkĩ liti, Dorĩka kutse Isaswi. Omũkalĩ oyo abya akasiba erikola emĩbĩrĩ mibuya nʼerĩwatĩkya abera.

³⁷Oko mugulu oyo Tabĩta mwalwala, neryo mwahola. Neryo mobakosa omubiri wuwe mobahĩrago omo kyumba kyʼendata.

³⁸Neryo kusangwa eLũda abya mũyĩ hakũhĩ nʼeYopa, abiga babere babĩowa ko Petero abya eLũda, mobamutuma kwʼabandu babiri, erimulembalemba bati, Sulindirire, wase aho tuli.

³⁹Neryo Petero mwahangana, mwagenda nabo. Neryo abere abĩhĩka, mobamutwala omo kyumba ekyʼendata. Nʼabakwakalĩ bosĩ mobimana hakũhĩ naye, ibanemulira, nʼerĩmũkangya esyokanzu nʼesyongimba esyo Dorĩka abya akasona akine nabo.

⁴⁰Nĩkwa Petero mwahigira bosĩ bʼeyĩhya wʼekyumba ekyo, neryo mwakũkama, mwasaba, neryo mwakebera ekĩnda ekyo ati, Tabĩta, hangana! Naye mwalĩbũla ameso wuwe, neryo abere alangira Petero, mwayĩkũkũma mwĩkala.

⁴¹Neryo Petero mwamuha ebyala biwe, mwamũhanganĩa. Nĩkwa Petero mwabirikira abandu ba Nyamuhanga nʼabakwakalĩ, mwahĩra Tabĩta yo kubo ĩnĩanakalĩre.

⁴²Neryo engulu yʼomwatsi oyo moyaminyikala eYopa hosĩ, nʼabandu bangi mobĩkĩrĩrya Omukama.

⁴³Neryo Petero mwĩkala eYopa biro bingi omwʼomũbambĩ wʼebihu, ye Sĩmonĩ.