Read nande Abanya Roma 1 Bible Online

Abanya Roma 1 - nande bible

Abanya Roma 1

¹Ĩngye Paũlo, omugombe wa Kristo Yesu nʼomukwenda oyo Nyamuhanga abirikira nʼerimusombola busana nʼEngulu Yowene yiwe.

²Engulu Yowene eyĩ Nyamuhanga alagayo erĩmbere omo muno wʼabamĩnyererĩ buwe, kandi ĩsakĩre omo Masako abũyĩrĩre.

³Engulu Yowene eyĩ ni yʼomugala wuwe, Omukama wetu Yesu Kristo. Naye abutawa ngʼomundu omo lubuto lwa Dawĩdĩ.

⁴Nĩkwa omo Bunyamuhanga buwe bũbũyĩrĩre, erĩlũbũka liwe oko baholĩ lĩkakangaya omo bũtokĩ bunene, Yesu kwʼali Mugala wa Nyamuhanga.

⁵Busana na Kristo twabirihabwa olukogo, kandi twabĩrĩhĩrwa mo bakwenda buwe, erisondola abandu bʼebihanda byosĩ erĩmwĩkĩrĩrya nʼerimukenga.

⁶Nenyũ nibya ĩnywe muli eRoma, Nyamuhanga abiribabirikira eribya bandu ba Yesu Kristo.

⁷Neryo ngabasakira ĩnywe, abʼeRoma, abo Nyamuhanga abirianza nʼeribabirikira eribya bana buwe. Nyamuhanga Tata wetu, nʼomukama Yesu Kristo, abahe olukogo nʼobuholo.

⁸Ngatsũka eriha Nyamuhanga wage yʼewasĩngya busana na Yesu Kristo, busana nenyũ ĩnywe bosĩ. Kusangwa erĩkĩrĩrya lyenyũ lĩkatũlawa omo kihugo kyosĩ.

⁹Kusangwa Nyamuhanga nĩ mũlangĩrĩ wage, oyo ngakolera nʼomutima wage gosĩ omo mũbĩrĩ wʼEngulu Yowene yʼomugala wuwe, anasĩ ngoko ngabahula emigulu yosĩ omwʼisaba, lyage, butsira erĩũmbya.

¹⁰Ngabũlaya omwʼisaba lyage nyiti omwʼisonda lya Nyamuhanga, kumbe Ĩnahĩka eyo eribabana.

¹¹Kusangwa nyĩbakwĩre olukando lwʼeribalolako, inatoka eribaha emyatsi yʼOmũlĩmũ, imwatoka erihangana ndeke.

¹²Nyiti itwatoka erĩsĩkanĩa emitima omwʼĩkĩrĩrya lyenyũ nʼeryage ĩtwe bosĩ.

¹³Nyanzĩre imwaminya ndeke, balĩkyetu, ko nalenga esyongendo nyingi eriyabalolako. Nĩkwa nabĩrĩkakĩrĩbwa kandi nʼakandi. Nabya nyanzĩre eribana abandu busana na Nyamuhanga omo katĩkatĩ kenyũ, ngoko twabanabo, omo katĩkatĩ kʼebindi bihanda.

¹⁴Indi mʼomwĩnda wʼabandu bosĩ, abasĩ ebarua nʼabayĩra, owʼamenge, nʼoyũtasĩkĩ.

¹⁵Neryo ĩngye indi nʼomũhwa wʼerĩbatũlĩra Engulu Yowene, ĩnywe muli eRoma.

¹⁶Kandi sĩnyĩkwĩre esĩsonĩ busana nʼEngulu Yowene, kusangwa nĩ bũtokĩ bwa Nyamuhanga, obũkalamaya obuli mundu Oyũkĩkĩrĩraya, erĩtsũka oko Bayũda, nʼakandi oko bandu bʼebindi bihanda nibya.

¹⁷Kusangwa Engulu Yowene ĩkatũbĩsũlĩra ngoko Nyamuhanga akatũngananaya omundu embere siwe, omwʼĩkĩrĩrya lisa, ngoko kĩsakĩre kiti, Nĩkwa oyukatunganana embere sya Nyamuhanga busana nʼerĩkĩrĩrya asyakota.

¹⁸Kusangwa erikarama lya Nyamuhanga lyabĩrĩbĩsũlwa, lĩkalũa elubula busana nʼebyosĩ ebitatunganene byʼabandu, nʼebitekenga Nyamuhanga. Kusangwa omo nzira nyibi yabo bakakakĩraya ekyʼekwenene eriminyikala.

¹⁹Kusangwa ebyasĩbwe bya Nyamuhanga byabĩrĩmĩnyĩkalĩbwa kubo, kusangwa Nyamuhanga abĩrĩmĩnyĩsyabo.

²⁰Erĩtsũka omugulu Nyamuhanga ahangika ekihugo, emyatsi ya Nyamuhanga eyitalolawako, yʼobũtokĩ buwe bwʼerikota, nʼObunyamuhanga buwe, byabiriminyikala ndeke-ndeke omo bindu ebyo ahangika. Neryo abandu sibawite ekyʼerĩyĩhambũlyamo.

²¹Kusangwa nomo banabya basĩ Nyamuhanga, mobatamũsĩkya nga Nyamuhanga, kutse erimuha ewasĩngya. Amalengekanĩa wabo abiribya buyira, kandi omwĩrĩmya abiringira omo mitima mĩkĩrũ yabo.

²²Bakayihalamba ngʼabʼamenge, kwesĩ ibabiribya bakĩrũ.

²³Mobahĩnganĩa olukengerwa lwa Nyamuhanga olutetsanda, omo bĩsosekanĩo byʼabandu abakatsanda, nʼebyʼesyonyonyũ, nʼebyʼesyonyama, nʼesikakululuka.

²⁴Busana nʼemyatsi eyĩ, Nyamuhanga mwalekabo ati bakwame esyongumbu syʼemitima yabo, nʼerikola ebĩtĩsĩrĩre. Kandi bakakola emyatsi yʼesĩsonĩ omo mibiri yabo.

²⁵Bakahĩnganaya ekwenene ya Nyamuhanga omo mabehĩ, ĩbaramya nʼerikolera ekyahangikawa butsira Omũhangĩkĩ oyutolere eripipwa kera na kera! Amina.

²⁶Busana nʼebĩ, Nyamuhanga mwalekabo erikwama esyongumbu syabo syʼesĩsonĩ, Nʼabakalĩ ĩbakahĩnganaya emyatsi yʼobũkalĩ omo myatsi eyite yʼobũkalĩ.

²⁷Nʼabalume nabo ibakaleka emyatsi eyitolere erikola nʼomũkalĩ, ibakabeberera omo syongumbu syabo, omulume iniakakola nʼogundi mulume ebyʼesĩsonĩ. Aba bakabana omwisi wabo eririha eritolere erĩhalya lyabo.

²⁸Kusangwa bakagana erĩrĩga Nyamuhanga omo bũlengekanĩa bwabo, Nyamuhanga mwalekabo omo bũlengekanĩa bũtsandĩre erikola emyatsi itatolere.

²⁹Boswĩre mwʼebitatunganene, nʼebibi, nʼerirumwa, nʼomwaga, boswĩre nʼeritsura, erĩĩta, nʼamalwa, eriteba, erirega abandi, nʼeritonga nabi,

³⁰bakalega abandu, bakakwa Nyamuhanga yʼobusu, bakapona, bakayanza, bakayihalamba, bakayibanira emĩsĩndo yosĩ yʼebibi. Kandi Sĩbalĩowa ababutabo.

³¹Sibaliminya, bakatwa erilagana lyabo, sibawite olwanzo, sibeganyira mundu.

³²Kandi nomo banabya basĩ Emigambo ya Nyamuhanga eyĩkabũga iti, abakakola emyatsi eyĩ, batolere ibahola; nomo banabya basĩ ebĩ, bakakolabyo, kandi bakasĩma abandu abakakolabyo.