Read nande Abanya Roma 11 Bible Online

Abanya Roma 11 - nande bible

Abanya Roma 11

¹Neryo ngabũlaya nyiti, Nyamuhanga abirigana abandu buwe kwehĩ? Iyihi nʼahake! Kusangwa nage indi Mũĩsraelĩ, ogʼolubuto lwa Abrahamũ, owʼekihanda kya Benyamĩna.

²Nyamuhanga sialitagana abandu buwe, abo abiriyisoga kera. Ũnasĩ ngoko Amasako akabũga busana na Elĩa kwehĩ? Elĩa ahandĩkĩrĩraya Abaĩsraelĩ bʼuku Nyamuhanga ati,

³Mukama, babĩrĩta abamĩnyererĩ bawe, babĩrĩhĩmbũla ebiherero byawe. Ĩngye nyĩkĩnasĩya, kandi bakasonda erĩnylĩta.

⁴Nĩkwa Nyamuhanga mwasũbĩrya atĩkĩ kwehĩ? Ati, Nabiriyibikira abandu elfu irinda (7,000), abatetakũkamira Baala.

⁵Ko liri ritya lino, hali abasĩgalira, abo Nyamuhanga abiriyisoga omo lukogo luwe.

⁶Neryo eriyisoga liwe lyamabya busana nʼolukogo luwe, silwimene oko mĩbĩrĩ. Kite kitya olukogo luwe si kwenene.

⁷Ko byabere biti kwehĩ? Abaĩsraelĩ mobatabana ekyo babya bakasonda. Nĩkwa abake abayisogawa mobabanakyo Nʼabandi emitima yabo moyakala.

⁸Ngoko kĩsakĩre kiti, Nyamuhanga mwahabo ekĩrĩmũ kyʼeritendiminya kindu, Ameso wabo sialilangira, nʼamatwĩ wabo sĩalĩowa, Bane batya erĩhĩka na mũnabwĩre,

⁹Kandi Dawĩdĩ akabũga ati, Emesa yabo yibye mũlyatĩ nʼekitego. Batwĩkale nʼerisuyirwa.

¹⁰Ameso wabo abye mwĩrĩmya ibatatoka erilangira, Kandi ũnamaye emigongo yabo yʼebiro byosĩ.

¹¹Neryo ngabũlaya nyiti, Batwĩkere nʼeriwa kwehĩ? Iyihi nʼahake! Nĩkwa busana nʼerĩlolo lyabo, erilama lyabĩrĩhĩka oko Bihanda, erireka Abayũda ibabya nʼobũha.

¹²Neryo erĩlolo lyʼAbayũda lyamaleta omũyĩsa oko kihugo, nʼeritaluka lyabo lyamaleta omũyĩsa gʼoko Bihanda. Omũyĩsa asyabya munene kwʼaho omugulu Abayũda basyabyaho ndeke.

¹³Neryo ngabwira ĩnywe bʼEbihanda, Kusangwa indi mukwenda wʼEbihanda, ngayihalamba omo mũbĩrĩ wage.

¹⁴Kumbe nangatoka erireka abʼekihanda kyage ibabya nʼobũha, nʼerĩlamya abandi ba kubo.

¹⁵Kusangwa kumbe eriganwa lyabo likabya erĩsanganĩa lyʼabandu bʼekihugo neryo erĩrĩgwa lyabo likabya liti kwehĩ? Lyasyabya nogebe busana nʼabaholĩ.

¹⁶Omukanyo amabya abũyĩrĩre, neryo obundu nabo bũbũyĩrĩrĩre. Kandi omũlĩhĩ amabya abũyĩrĩre, neryo emitahi nayo yĩbũyĩrĩre.

¹⁷Nĩkwa eyindi mitahi yʼomuti wʼomũzeĩtũnĩ yamatahulwa, nawe Omutahi wʼomũzeĩtũnĩ wʼomolĩ ũkahĩrawa omo muti oyo ukasangira mo muboga wʼamatsitsi awakalũa omo mũlĩhĩ.

¹⁸Subye ukayiheka embere wʼemitahi; kusangwa wamayiheka, si iwe Ukaheka omũlĩhĩ nĩkwa omũlĩhĩ akakuheka.

¹⁹Ũkandĩbũga uti, Emitahi yatahulawa inatoka erĩhĩrwamo.

²⁰Kwenene, nĩkwa moyatahulwa busana nʼerĩtendĩkĩrĩrya lyabo, nawe ukabyamo busana nʼerĩkĩrĩrya lyawe. Subye ukayiheka, nĩkwa ubahe.

²¹Kusangwa Nyamuhanga amabya ĩsĩalĩtabalya emitahi yʼomuti gowene, ĩsĩendĩsyakũbalya nawe.

²²Lebaya obubuya nʼobukali bya Nyamuhanga. Akalĩre busana nʼabandu abawa, nĩkwa ni mubuya ukʼuwe, wamakwamirira omo bubuya buwe. Bite bitya, nawe, wasyatũbwa nibya.

²³Nabo Abayũda, bamaleka erikwamirira erĩtendĩkĩrĩrya lyabo, basyahĩrwa aho babya. Kusangwa Nyamuhanga akatoka erĩswahĩrabomo.

²⁴Nawe owʼEbihanda watũbawa oko muti wʼomũzeĩtũnĩ wʼomũsĩndo wʼomolĩ, mowahĩrwa omo muti wʼomũzeĩtũnĩ wʼomũsĩndo wʼeka. Kwilaba aho emitahi eyo yʼomũsĩndo wʼeka yasyahĩrwa omo muti wʼomũzeĩtũnĩ wabo wʼeka.

²⁵Balĩkyetu, nyanzĩre imwaminya ndeke erĩkũmbo erĩ, mukasyabya nʼamenge omo malengekanĩa wenyũ. Erĩkũmbo lyerĩ liti, erikala hake lyʼomutima lyabirihamba Ĩsraelĩ erĩhĩka aho eriganza NʼEbihanda lyamahĩka uku Nyamuhanga.

²⁶Neryo Abaĩsraelĩ bosĩ basyalamĩbwa, ngoko kĩsakĩre kiti, Omũlamya asyalũa eSĩonĩ, Asyalũsya amalolo oko bana ba Yakobo.

²⁷Kandi eyĩ ni ndagane yage haguma nabo, Omugulu ngalũsaya ebibi byabo.

²⁸Kusangwa omo mwatsi wʼEngulu Yowene Abayũda, nĩ nzĩgũ busana nenyũ, nĩkwa omwʼiyisoga lya Nyamuhanga, ni banze busana nʼabotata-kulu wabo.

²⁹Kusangwa olũsũnzo lubuya nʼeribirikira lya Nyamuhanga sibyebinduka.

³⁰Nenyũ abʼEbihanda mwabya ĩsĩmũlĩowa Nyamuhanga, nĩkwa lino mwabiribana eriganyira kusangwa Abayũda mobatowa.

³¹Neryo kusangwa ĩnywe bʼEbihanda mwabiribana eriganyira, litya Abayũda lino ni bandu batyowa, ibatoka nabo eribana eriganyira lya Nyamuhanga.

³²Kusangwa Nyamuhanga abĩrĩhĩra abosĩ okwʼĩtendĩowa, iniatoka eriganyira abosĩ.

³³Kwenene obukulu bwa Nyamuhanga ni bunene! Kwenene Nyamuhanga awite amenge gosĩ nʼeriminya lyosĩ! Sihali mundu wangaminya erisoha liwe! Sihali mundu wangaminyerera esyonzira siwe!

³⁴Ngoko kĩsakĩre kiti, Nindi wabiriminya obũlengekanĩa bwʼomukama kwehĩ? Nindi wangabya mũhanĩ wuwe kwehĩ?

³⁵Nindi wabirimuha kindu, atũhawe kandi kwehĩ?

³⁶Kusangwa iye mwahangika emyatsi yosĩ, kandi emyatsi yosĩ iye yo wabumbayo, kandi emyatsi yosĩ iri busana naye. Olukengerwa lubye uku Nyamuhanga kera na kera. Amina.