Read nande Abanya Roma 13 Bible Online

Abanya Roma 13 - nande bible

Abanya Roma 13

¹Obuli mundu akenge abatabalĩ bʼekihugo. Kusangwa sihali ehamũlĩ eyĩtalũa uku Nyamuhanga, nʼabʼehamũlĩ baliho, bahĩrĩrweho na Nyamuhanga.

²Neryo oyukalwa nʼabenye ehamũlĩ akalwa nʼekilayiro kya Nyamuhanga, nʼabakalwa nʼabatabalĩ basyayiretera erĩsĩngwa.

³Kusangwa abatabalĩ sibaliho busana nʼerĩũbahya oyukakola ndeke, nĩkwa busana nʼerĩũbahya oyukakola nabi. Ũnanzĩre eritindiubaha omundu wʼehamũlĩ kwehĩ? Ego, Ukole ndeke neryo basyakupipa.

⁴Kusangwa abatabalĩ ni bagombe ba Nyamuhanga busana nʼerikukola ndeke. Nĩkwa Wamakola ekibi, wubahe; kusangwa sialiheka omũyalĩ go busa; kandi ni mugombe wa Nyamuhanga oyũkakĩsaya busana nʼerireta erihitana oko yukakola ekibi.

⁵Neryo litolere iwakengabo, butsira busana nʼerihitana lya Nyamuhanga lisa, nĩkwa busana nʼobunya-mutima bwawe.

⁶Kandi busana nʼekĩ mukasola nibya, kusangwa abatabalĩ ni bagombe ba Nyamuhanga omugulu bakakola omũbĩrĩ wabo.

⁷Mulihe abosĩ bʼemĩnda yabo, omusolo oko yutolere omusolo, engemu oko mwenye ngemu, erikenga ukwʼoyo wangakengwa, erĩsĩkya ukwʼoyo wangasĩkĩbwa.

⁸Subye nʼomwĩnda wʼomundu nʼomuguma, lye nʼerianzana lisa; kusangwa Oyukanza mũlĩkyabo abĩrĩberererya Emigambo.

⁹Kusangwa ebihano biti, Isiwasĩngĩra, Ĩsĩwĩta, Ĩsĩwĩba, isiwarumawa. Kandi hamabya ekindi kihano, ebyosĩ bĩkahĩkana omo kihano kiguma kiti, Wanze mũlĩkyenyũ ngoko ukayanza.

¹⁰Olwanzo silulikola mũlĩkyabo yo kibi. Neryo olwanzo lũkaberereraya Emigambo yosĩ.

¹¹Neryo ĩmũnasĩ omugulu oyũ, nĩ ndambĩ yenyũ yʼeribuka omo tũgotserĩ; kusangwa erilama liri hakũhĩ netu, kwilaba ekiro twĩkĩrĩraya.

¹²Obũtũkũ bũkĩsĩya ibwakya, eritungi iryasa. Neryo tuleke emĩbĩrĩ yʼomwĩrĩmya, twambale ebindu byʼamalwa byʼekyakakala.

¹³Tulendere ngoko litolere omugulu bukere, situtamire nʼerĩkũnda, situbye nʼoburagane nʼesyongumbu nyibi, situlwe, situbye nʼobũha.

¹⁴Nĩkwa muleke Yesu Kristo abye oyukabalwira nʼebindu biwe byʼamalwa; Simubye nʼobũlengekanĩa bwʼomubiri erikwama esyongumbu syago.