Read nande Abanya Roma 2 Bible Online

Abanya Roma 2 - nande bible

Abanya Roma 2

¹Neryo uwe mundu ukatswera omwatsi, suwite ekyʼerĩyĩhambũlyamo. Omugulu ukatswera ogundi, ũkayĩsĩnga. Kusangwa uwe ukatswera, nawe ukakola emyatsi eyo.

²Tũnasĩ ko Nyamuhanga akatswera omo kwenene omugulu akatswera abandu abakakola emyatsi eyĩ.

³Nawe ũtĩkĩ? Uwe ukatswera abakakola emyatsi eyĩ, nawe unemukolayo! Uti wasyabala eritswera lya Nyamuhanga kwehĩ?

⁴Kutse ukapona obubuya buwe bunene, nʼerisasira liwe, nʼeririndirira liwe kwehĩ? Sĩwasĩ ngoko bubuya bwa Nyamuhanga bũkakũkolaya okwʼibindula omutima nʼerireka ebibi kwehĩ?

⁵Nĩkwa busana nʼobutsibu bʼomutima wawe owatebinduka, ukayibikira erihitana oko kiro ekyo kyʼerihitana lya Nyamuhanga nʼeritswera litunganene riwe lyasyabĩsũlwa.

⁶Nyamuhanga asyaliha obuli mundu ngʼemĩbĩrĩ yiwe ko yiri.

⁷Nyamuhanga asyaha engebe yʼerikota oko bakayitsingirira omo mikolere yowene, ibakasonda olukengerwa, nʼerĩsĩkya nʼebitehola.

⁸Nĩkwa erihitana nʼerikarama lya Nyamuhanga lyasyabya oko bakayanza, nʼerigana erĩowa ebyʼekwenene, nĩkwa bakakwama ebitatunganene.

⁹Hasyabya eriagalwa nʼobũlĩge oko buli mundu oyukakola ebibi, erĩtsũka oko Bayũda, nʼakandi oko mundu wʼebindi Bihanda.

¹⁰Nĩkwa hasyabya olukengerwa, nʼerĩsĩkĩbwa, nʼobuholo oko buli mundu oyukakola ebibuya, erĩtsũka oko Bayũda, nʼakandi oko bandu bʼebindi Bihanda.

¹¹Kusangwa Nyamuhanga sialisombola ebitaga.

¹²Nĩkwa abosĩ abakakola nabi, isibawite Emigambo, basyahera butsira Migambo. Kandi abosĩ abakakola nabi, ibanawite Emigambo, basyatswerwa omo Migambo.

¹³Kusangwa Nyamuhanga Sĩalĩtũngananaya abakowa Emigambo omo matwĩ masa. Nĩkwa abakakola ebyo Migambo ikahana, bo basyatũngananĩbwa.

¹⁴Kusangwa Ebihanda sibiwite Migambo nĩkwa omugulu bakakola ebyo Migambo ikategeka nʼomutima owene, bakahĩra emigambo yabo, nomo batanawite Emigambo.

¹⁵Kusangwa bakakangaya emikolere yʼEmigambo ngʼĩsakĩre omo mitima yabo. Obunya-mutima bwabo bũkakangaya ko biri bitya. Amalengekanĩa wabo akahandikirirabo kutse erihanganirabo.

¹⁶Engulu Yowene eyo ngatũlaganaya iti, Ko kyasyabya kitya oko kiro Nyamuhanga asyatswera, omwisi wa Kristo Yesu, emyatsi nʼamalengekanĩa wʼabandu ebĩbĩsamĩre.

¹⁷Nawe, wamayahula mo Mũyũda, ukayiketera Emigambo, kandi ukayihalamba umu Nyamuhanga.

¹⁸Kandi uti ũnasĩ erisonda lya Nyamuhanga, kandi uti ũnasĩ eriyisoga emyatsi itolere, kusangwa wabiriyga Emigambo.

¹⁹Kandi uti wabiriminya kʼuli mũsondolĩ wʼesyondĩmatĩme, ekyakakala busana nʼabandu abali omo mwĩrĩmya,

²⁰kandi uli mũkangĩrĩrya wʼabakĩrũ, nʼomwĩgĩsya wʼabana. Uti uwite omo Migambo amenge gosĩ nʼekwenene.

²¹Neryo uwe ũkakangĩrĩraya abandi, sũlĩyĩkangĩrĩraya kwehĩ? Uwe ũkatũlago uti, omundu syĩbe, nawe ũkĩba kwehĩ?

²²Ũkabũga uti omundu ĩsyasĩngĩra, nawe ũkasĩngĩra kwehĩ? Uwe ukagana esyosanamu syo kutsibu, ũkahũnga ebindu omo syohekalũ kwehĩ?

²³Ukayihalamba omo Migambo, sulihemula Nyamuhanga omugulu ũkahalaya oko Migambo kwehĩ?

²⁴Kusangwa kĩsakĩre kiti, Erĩna lya Nyamuhanga likatsumawa omo katĩkatĩ kʼEbihanda, busana nenyũ Abayũda.

²⁵Kusangwa eribana liwite endũndĩ ndeke, wamabya ukakola Emigambo. Nĩkwa wamahalya oko Migambo, eribana lyawe likabya ngʼeritendibana.

²⁶Neryo omundu oyutabwene amakwama ebikahamulawa nʼEmigambo, Nyamuhanga siendisyamuganza ngʼoyubwene kwehĩ?

²⁷Neryo omundu oyutabwene, kusangwa akakwama ndeke emyatsi yʼEmigambo, siendisyabatswera kwehĩ? nĩkwa, nomo munawite ebĩnywa byʼEmigambo nʼakandi mũkabanĩbawa, nĩkwa mũkahalaya oko Migambo.

²⁸Kusangwa omundu sĩ Mũyũda busana nʼomubiri, kutse erĩbanĩbwa si ryʼomubiri.

²⁹Nĩkwa omundu nĩ Mũyũda oyuli Mũyũda omo mutima wuwe, ĩnĩabĩrĩbanĩbwa omo mutima busana nʼomũbĩrĩ wʼOmũlĩmũ Abũyĩrĩre, butsira nʼebĩnywa byʼEmigambo. Omundu oyo akapipawa na Nyamuhanga, butsira bandu.