Read nande Abanya Roma 5 Bible Online

Abanya Roma 5 - nande bible

Abanya Roma 5

¹Neryo kusangwa twabiriyirwa mo batunganene busana nʼerĩkĩrĩrya, tunawite Obuholo uku Nyamuhanga, nʼobuholo obo mobwahĩka busana nʼomukama wetu Yesu Kristo.

²Iye abĩrĩtũhĩra omwisi wʼolukogo olo lwa Nyamuhanga busana nʼerĩkĩrĩrya, aho twimene ndeke. Kandi tukatsema omo maha wʼerisangira olukengerwa lwa Nyamuhanga.

³Nĩkwa tukatsema omo malĩge wetu, kusangwa tũnasĩ obũlĩge bukaleta erĩyĩyĩnĩa.

⁴Nʼerĩyĩyĩnĩa likaleta erĩsĩmwa na Nyamuhanga, nʼerĩsĩmwa likaleta amaha.

⁵Kandi amaha sialituteba, kusangwa Omũlĩmũ Abũyĩrĩre ogo Nyamuhanga atuha, abĩrĩũtũlĩra olwanzo lwa Nyamuhanga omo mitima yetu.

⁶Kusangwa omugulu twabya butsira maka, Kristo mwaholera abakola-nabi, oko mugulu Nyamuhanga ayisoga.

⁷Lĩkalĩre busana nʼomundu eriholera omundu oyutunganene, nĩkwa, kwamũhwa omundu anganahanda omutima eriholera omundu mubuya.

⁸Nĩkwa Nyamuhanga akakangaya olwanzo luwe busana netu, kusangwa omugulu twabya tukine bakola-nabi, Kristo mwatuholera.

⁹Neryo twamabya twabiriyirwa mo batunganene busana nʼomusasi wuwe, neryo kwilaba aho, Kristo asyatũlamya okwʼihitana lya Nyamuhanga.

¹⁰Nĩkwa twabya nzĩgũ sya Nyamuhanga, neryo mwatũsanganĩa omo luholo lwa Mugala wuwe; nĩkwa kwilaba aho, kusangwa twabĩrĩsanganĩbwa, twasyalamĩbwa omo ngebe ya Kristo!

¹¹Neryo kandi kwilaba aho, tukatsema uku Nyamuhanga busana nʼomukama wetu Yesu Kristo, oyo wabĩrĩtũsanganĩa na Nyamuhanga.

¹²Neryo ebibi mobyahĩka munakihugo busana nʼomundu muguma, nʼoluholo molwingira busana nʼekibi kiwe, neryo litya oluholo molwahĩka oko bandu bosĩ, kusangwa abosĩ mobakola ebibi.

¹³Ebibi mobyabya omo kihugo embere wʼerihuluka lyʼEmigambo; nĩkwa ebibi mobitaganzwa ahate Migambo.

¹⁴Nĩkwa oluholo molwatabala oko bandu erĩtsũka uku Adamu nʼerĩhĩka uku Musa; nibya molwatabala oko batakola ekibi ekiringene ngʼerĩlolo lya Adamu.

¹⁵Adamu ali ngʼekĩsosekanĩo kyʼoyukandisyasa. Nĩkwa olũsũnzo lwa Nyamuhanga silulingene nʼerĩhalya lya Adamu. Kusangwa erĩhalya lyʼomundu muguma molyaleta oluholo lʼoko bandu bangi. Nĩkwa olukogo lwa Nyamuhanga ni lunene kwʼaho, nʼolũsũnzo busana nʼolukogo lwʼomundu muguma, ye Yesu Kristo lwasyakanyirira oko bandu bangi.

¹⁶Nʼakandi olũsũnzo lwa Nyamuhanga silulingene nʼekibi kyʼomundu muguma; kusangwa olubanza lwʼerĩhalya liguma lo lwaleta omusango, nĩkwa olũsũnzo lwʼolukogo lũkalũsaya omusango wʼamalolo mangi.

¹⁷Kusangwa erĩhalya lyʼomundu muguma molyaleka oluholo ilwatabala busana nʼomundu oyo; kwilaba aho, omundu muguma ye Yesu Kristo akaleka abandu abakangirira olukogo lunene nʼolũsũnzo lwʼeritunganene, ibatabala omo ngebe busana na Yesu Kristo.

¹⁸Neryo ngoko erĩhalya liguma molyahĩra abandu bosĩ kwʼomusango; litya erikola eritunganene liguma likabohola abandu bosĩ, nʼerihabo engebe.

¹⁹Kusangwa busana nʼerĩtendĩowa lyʼomundu muguma, abandu bangi mobayirwa mo bakola-nabi, neryo litya busana nʼerĩowa lyʼomundu muguma, abandu banene basyayirwa mo batunganene embere sya Nyamuhanga.

²⁰Emigambo moyahĩka erireka erĩhalya iryakanyirira. Nĩkwa aho ebibi byakanyirira, olukogo lwa Nyamuhanga molwakanyirira kutsibu.

²¹Neryo ngoko ebibi byatabala omo luholo, litya olukogo lwa Nyamuhanga lukatabala omo litunganene, nʼerireta engebe yʼerikota busana nʼomukama wetu Yesu Kristo.