Read nande Abanya Roma 6 Bible Online

Abanya Roma 6 - nande bible

Abanya Roma 6

¹Tũbũge tũtĩkĩ kwehĩ? Tukwamirire ebibi, olukogo lwa Nyamuhanga ilwatoka erikanyirira kwehĩ?

²Iyihi nʼahake. Ĩtwe twamahola oko bibi, twanganatoka eriswabya omo bibi kwehĩ?

³Sĩmwasĩ kwehĩ? ĩtwe bosĩ ngoko twabatĩsĩbawa erimatikana na Kristo ĩtwabĩrĩbatĩsĩbwa erimatana nʼoluholo luwe kwehĩ?

⁴Neryo omo lũbatĩso lwetu twabiritabwa haguma na Kristo omo luholo luwe, neryo ngoko Kristo alũbũkĩbawa oko baholĩ omo lukengerwa lwa Tata, litya netu itwatoka erirendera omo mibere yʼengebe nyihyanyihya.

⁵Kusangwa twamabohana naye omo luholo luwe, kwenene litya twasyabya buguma naye omwʼĩlũbũka liwe,

⁶kusangwa tũnasĩ ngoko mundu wetu wa kera abiribambwa oko musalaba haguma na Kristo, neryo amalengekanĩa wʼebibi atoke erĩherĩbwa, situbye kandi abakobe bʼebibi.

⁷Kusangwa oyo wabirihola, abiriboholwa oko maka wʼebibi.

⁸Neryo twamabya twabirihola haguma na Kristo, tũkĩkĩrĩraya ko twasyabyaho haguma naye.

⁹Tũnasĩ Kristo abĩrĩlũbũkĩbwa oko baholĩ, isiendisyaswahola na kera; oluholo silukimuwite ko hamũlĩ.

¹⁰Kusangwa omo luholo luwe, mwahola busana nʼebibi engendo nguma nyisa; na lino engebe yiwe ikabyaho busana na Nyamuhanga.

¹¹Nenyũ nibya muyiganze ngʼabaholĩ oko bibi, nĩkwa ngʼabaliho uku Nyamuhanga busana nʼerimatikana na Kristo Yesu.

¹²Simuleke ebibi bikabatabalako omo mibiri yenyũ yʼerihola, ebikaleka mwowa esyongumbu syʼomubiri.

¹³Kandi simuhe ebĩtsũko byʼemibiri yenyũ busana nʼebibi, erikola ebitatunganene; nĩkwa muyihe uku Nyamuhanga ngʼabandu ababĩrĩlũbũka oko baholĩ, kandi muhe ebĩtsũko byenyũ uku Nyamuhanga, bikole ebitunganene.

¹⁴Kusangwa ebibi sibikibawite ko hamũlĩ, kusangwa Simuli oko Migambo nĩkwa oko lukogo lwa Nyamuhanga.

¹⁵Neryo, tũkolekĩ kwehĩ? Tukole ebibi kusangwa Situli omo Migambo, nĩkwa omo lukogo lwa Nyamuhanga kwehĩ? Iyihi, nʼahake!

¹⁶Sĩmwasĩ ngoko mugulu mukayiha oko mundu erĩmowa ngʼomukobe, kwenene muli bakobe bʼoyo mũkowa, amabya wʼebibi, akaleta oluholo, amabya wʼerĩowa, akabayira mo batunganene.

¹⁷Nĩkwa wasĩngya uku Nyamuhanga, kusangwa nomo mwanabya bakobe bʼebibi erĩmbere, lino mũkowa nʼomutima gosĩ erĩkangĩrĩrya lyʼekwenene eryo mwahabawa.

¹⁸Kandi momwaboholwa oko bibi, nʼeribya bakobe bʼeritunganene.

¹⁹Ngabũga omo bĩnywa byʼabandu busana nʼobolo-bolo bwʼomubiri wenyũ. Ngoko mwabya mukaha ebĩtsũko byenyũ ngʼabakobe bʼebĩtĩsĩrĩre nʼebibi, ebikaleta emigendere mibi, neryo lino muhe ebĩtsũko byenyũ ngʼabakobe bʼeritunganene erikaleta emigendere mĩbũyĩrĩre.

²⁰Omugulu mwabya bakobe bʼebibi, mwabya bwĩranda oko litunganene.

²¹Neryo momwabana endũndĩ yahi omo myatsi eyo eyikabahemula lino kwehĩ? Kusangwa endũlĩ yʼemyatsi eyo ni luholo.

²²Nĩkwa lino mwabiriboholwa oko bibi, mwabiribya bakobe ba Nyamuhanga, mukabana endũndĩ yʼeribya nʼemigendere mĩbũyĩrĩre, nʼendũlĩ ni ngebe yʼerikota.

²³Kusangwa obũhĩngĩ bwʼerikola ebibi ni luholo, nĩkwa olũsũnzo olũkalũa uku Nyamuhanga ni ngebe yʼerikota busana nʼerimatikana na Kristo Yesu, Omukama wetu.