Read nande Abanya Roma 8 Bible Online

Abanya Roma 8 - nande bible

Abanya Roma 8

¹Neryo sihali eritswerwa oko bawatene na Kristo Yesu.

²Kusangwa omugambo wʼOmũlĩmũ oyukatuha engebe busana nʼerimatikana na Kristo Yesu, abirinyibohola oko mugambo wʼebibi nʼowʼoluholo.

³Kusangwa ekyo Migambo yataluka erikola, busana nʼobolo bwʼobũlengekanĩa bwʼomubiri, Nyamuhanga mwatokakyo. Nyamuhanga mwatuma Omugala wuwe omo kĩsosekanĩo kyʼomubiri wʼebibi, kandi busana nʼeririha ebibi. Neryo mwatswera ebibi byʼobũlengekanĩa bwʼomubiri.

⁴Nyamuhanga mwakola atya, ebilayiro byʼEmigambo bibererere omwisi wetu, ĩtwe tukalendera omo mibere yʼOmũlĩmũ, butsira omo mibere yʼomubiri.

⁵Kusangwa abo bakakwama omubiri bakaganĩraya emyatsi yʼomubiri. Nĩkwa abakakwama Omũlĩmũ bakaganĩraya emyatsi yʼOmũlĩmũ.

⁶Kusangwa obũlengekanĩa obukakwama omubiri bukaleta oluholo; nĩkwa obũlengekanĩa obukakwama Omũlĩmũ bukaleta engebe nʼobuholo.

⁷Kusangwa omundu oyukakwama obũlangekanĩa bwʼomubiri nĩ nzĩgũ uku Nyamuhanga. Sialĩowa Emigambo ya Nyamuhanga, kandi sialitoka erĩowayo.

⁸Kandi abandu abakakwama obũlengekanĩa bwʼomubiri sibetoka erĩtsemesya Nyamuhanga.

⁹Nĩkwa simwekwama obũlengekanĩa bwʼomubiri, nĩkwa obwʼOmũlimũ, Omũlĩmũ wa Nyamuhanga amabya ĩkere omwisi wenyũ. Oyutawite Omũlĩmũ wa Kristo si mundu wuwe.

¹⁰Nĩkwa Kristo amabya ali omwisi wenyũ, nomo mubiri wenyũ aholĩre busana nʼebibi, nĩkwa ekĩrĩmũ kiwite engebe kusangwa kyabĩrĩtũngananĩbwa na Nyamuhanga.

¹¹Omũlĩmũ wa Nyamuhanga oyo walũbũkaya Yesu oko baholĩ, amabya ĩkere omwisi wenyũ, neryo oyo walũbũkaya Yesu oko baholĩ asyaha engebe oko mibiri yenyũ eyikahola, busana nʼOmũlĩmũ wuwe oyo wĩkere omwisi wenyũ.

¹²Neryo busana nʼomwatsi oyũ, balĩkyetu, siritolere ũkwʼĩnywe erikwama obũlengekanĩa bwʼomubiri.

¹³Kusangwa mwamakwama obũlengekanĩa bwʼomubiri mwasyahola; nĩkwa omo maka wʼOmũlĩmũ mwamĩta emikolere yʼomubiri, mwasyabyaho.

¹⁴Kusangwa abosĩ abakasondolawa nʼOmũlĩmũ wa Nyamuhanga bo bagala ba Nyamuhanga.

¹⁵Kusangwa Omũlĩmũ ogo Nyamuhanga abaha, sialibayira mo bakobe, Sialireka mukubaha kandi. Nĩkwa Omũlĩmũ akabayira mo bagala ba Nyamuhanga; kandi omo bũtokĩ bwʼOmũlĩmũ tukabirikira tuti, Tata! Tata!

¹⁶Omũlĩmũ oyũ wa Nyamuhanga akatũlago haguma nʼekĩrĩmũ kyetu ko tuli bana ba Nyamuhanga.

¹⁷Twamabya tuli bana, tuli balĩ bʼomwandu nʼebindu ebyo Nyamuhanga akatubikira omo bwami buwe. Kandi twasyasangira omwandu haguma na Kristo; kusangwa twamagalwa haguma na Kristo, twasyasangira olukengerwa luwe.

¹⁸Ngaganza amalĩge wa sesene nga si kindu busana nʼolukengerwa olo tũkandĩsyabĩsũlĩrwa.

¹⁹Kusangwa ebihangikwa byosĩ bikalindirira nʼolukando lunene erĩbĩsũlĩrwa lyʼabagala ba Nyamuhanga.

²⁰Kusangwa ebihangikwa mobyatswerwa eribya buyira, butsira omwʼisonda lyabo, nĩkwa kusangwa Nyamuhanga mwatswerabyo atya. Nĩkwa habya amaha,

²¹kusangwa ebihangikwa ebĩ byasyaboholwa omo bukobe bwʼemyatsi yʼerihonda, eriingira omo bwĩranda nʼolukengerwa lwʼabana ba Nyamuhanga.

²²Kusangwa tũnasĩ erĩhĩka lino ebihangikwa byosĩ bĩkasĩmba nʼerikunda haguma.

²³Kandi butsira ebihangikwa bisa, netu nibya, tuwite Omũlĩmũ mo bĩgũma byʼerĩmbere byolũsũnzo lwa Nyamuhanga, tũkasĩmba omo mitima yetu, tukalindirira Nyamuhanga erituyira mo bagala, nʼerĩtongolya emibiri yetu.

²⁴Kusangwa twalamĩbawa omo maha, nĩkwa omundu siali nʼamaha busana nʼekyo abirilangira, kusangwa amalangira kindu, siangaswakwa amaha wakyo.

²⁵Nĩkwa twamahĩra amaha oko ekyo tutelolako, tukayitsingirira nʼeririndirirakyo.

²⁶Kandi nibya Omũlĩmũ akatũwatĩkaya omo bolo bwetu. Kusangwa Sĩtwasĩ erisaba ngoko litutolere, nĩkwa Omũlĩmũ ĩyowene akatusabira, akatwimira omwʼĩsĩmba erite ryangabũwa.

²⁷Neryo Nyamuhanga oyukalangira emitima yʼabandu anasĩ obũlengekanĩa bwʼOmũlĩmũ, kusangwa Omũlĩmũ akasabira abandu ba Nyamuhanga ngʼerisonda lya Nyamuhanga ngoko liri.

²⁸Tũnasĩ ngoko Nyamuhanga akaleka emyatsi yosĩ ĩyowana busana nʼabakamwanza, kandi busana nʼabo abirikira ngʼerĩyĩsũnza liwe.

²⁹Kusangwa abo ayisoga erĩmbere, mwasombolabo kera basose Mugala wuwe, neryo Omugala iniatoka eribya akambere omo bagala babo bangi.

³⁰Nʼabo ayisoga kera mwabirikirabo. Nʼabo abirikira mwayirabo mo batunganene, nʼabo ayira mo batunganene, ba nʼabo ahabo erisangira omo lukengerwa luwe.

³¹Neryo tũbũgekĩ busana nʼemyatsi eyĩ kwehĩ? Nyamuhanga amabya ali oko luhande lwetu, nindi yo wangaswalwa netu kwehĩ?

³²Nyamuhanga mwatabalya Omugala wuwe-wuwe, nĩkwa mwamusiga busana nʼĩtwe bosĩ! Oyo watuha Omugala wuwe, siendisyatuha ebindu byosĩ busana naye kwehĩ?

³³Nindi wasyahandĩkĩrĩrya abayisogawa na Nyamuhanga kwehĩ? Nyamuhanga yukahulabo mo batunganene.

³⁴Nindi yo Wasyahĩra kubo kwʼomusango kwehĩ? Kristo Yesu yoyo wahola, kandi mwalũbũka, na lino ĩkere oko luhande lwʼamali lwa Nyamuhanga, kandi yo yukatwimira embere sya Nyamuhanga.

³⁵Nindi wasyatugabula oko lwanzo lwa Kristo kwehĩ? Nĩ bũlĩge, kutse amagaliĩ, kutse erĩendererya, kutse enzala, kutse eribula ekyʼeriambala, kutse obwĩko, kutse omũyalĩ kwehĩ?

³⁶Ngoko kĩsakĩre kiti, Busana nawe tũkĩtawa omo musibo gosĩ. Tukaganzawa ngʼesyombũlĩ syʼerikerwa.

³⁷Nĩkwa omo myatsi yosĩ eyĩ tũkakĩnda ndeke busana nʼoyo watwanza!

³⁸Kusangwa nyĩnasĩ ndeke ngoko hate kindu ekyangatoka eritugabula oko lwanzo lwa Nyamuhanga oluli omwisi wa Kristo Omukama wetu. Sihali kindu, sihali oluholo, kutse engebe, sihali abamalaĩka, kutse abatabalĩ bʼomo kyanya, sihali emyatsi ya sesene, kutse emyatsi eyikandisyasa, sihali ebyʼamaka, kutse ekyʼendata, kutse ekyʼeyĩkwa, sihali nʼekindi ekyahangikawa, ekyangatoka eritugabula oko lwanzo olo lwa Nyamuhanga, oluli omwisi wa Kristo Yesu Omukama wetu.