Read nande Abanya Roma 9 Bible Online

Abanya Roma 9 - nande bible

Abanya Roma 9

¹Ekyo ngabũga ni kwenene; indi wa Kristo, sindibiha. Obunya-mutima bwage, obukasondolawa nʼOmũlĩmũ Abũyĩrĩre bũkatũlago nibya ko ndebiha.

²Ngwite obũlĩge bunene nʼeriagalwa omo mutima wage busana nʼabagala betu oko mubiri.

³Kwenene nanganza eritakirwa, nʼerigabulwa uku Kristo busana nʼabagala betu oko mubiri!

⁴Ibo nĩ Baĩsraelĩ, abo Nyamuhanga ayira mo bagala buwe nʼerisangira nabo olukengerwa luwe. Kandi mwalagana nabo, nʼerihabo Emigambo. Kandi bawite erĩramya lyʼeHekalũ, bawite nibya esyondagane sya Nyamuhanga.

⁵Ni bana bʼabotata-kulu betu Abrahamũ, Ĩsaka, na Yakobo. Na Kristo oko mubiri ni wʼekihanda kyabo. Iye ni Nyamuhanga ali endata oko bosĩ, apipawe kera na kera. Amina.

⁶Sĩkyangabũgwa kiti, ekĩnywa kya Nyamuhanga kyamatalukana. Kusangwa abosĩ abakabutawa omo kihanda kya Ĩsraelĩ sĩ Baĩsraelĩ kwenene.

⁷Kandi abʼolubuto lwa Abrahamũ abosĩ sibehulawa mo bana buwe. Nĩkwa Nyamuhanga mwabwira Abrahamũ ati, Abana ba Ĩsaka bo basyahulwa mo lubuto lwawe.

⁸Ekĩ kĩkakangaya ngoko abana bakabulawa omo mubiri si bana ba Nyamuhanga, nĩkwa abana bʼendagane, bo bakaganzawa mo lubuto lwʼekwenene.

⁹Kusangwa ekĩnywa kyʼendagane ya Nyamuhanga kiti, oko mugulu owatolere nasyasa, neryo Sara asyabana omugala.

¹⁰Butsira ekĩ kisa, nĩkwa Rebeka mwaheka obukule bwʼabahasa, uku Ĩsaka ye tata-kulu wetu.

¹¹Nĩkwa abahasa bate babutwa, isibebakola kibuya kutse kibi,

¹²Nyamuhanga mwabwira Rebeka ati, Omukulu asyakolera Omulere; Nyamuhanga mwahanganĩa erisonda liwe ngoko ayisoga, mwatabirikira Omulere busana nʼemĩbĩrĩ yiwe, nĩkwa kusangwa mwayi soga erimubirikira.

¹³Ngoko kĩsakĩre kiti: Nabirianza Yakobo, nĩkwa nabĩrĩkwa Esaũ yʼobusu.

¹⁴Neryo tũbũgekĩ kwehĩ? Tuti Nyamuhanga siali kwʼerĩbanza kwehĩ? Iyihi nʼahake!

¹⁵Kusangwa mwabwira Musa ati, Kandi, nasyamũkwĩra obũlĩge oyo nasyakwĩra obũlĩge.

¹⁶Neryo si busana nʼerisonda lyʼomundu kutse erikola liwe, nĩkwa ni busana nʼeriganyira lya Nyamuhanga.

¹⁷Kusangwa Amasako akabwira Farao ati, Nabĩrĩkũhĩra oko ngoma busana nʼomwatsi oyũ, inatoka erĩkangya obũtokĩ bwage ewawe, kandi erĩna lyage lĩtũlaganĩbawe omo kihugo kyosĩ.

¹⁸Neryo Nyamuhanga akaganyira oyo anzĩre eriganyira, Kandi akakalaya oyo anzĩre erĩkalya.

¹⁹Neryo wasyambwira uti, Busana nakĩ Nyamuhanga akinabana erĩlolo kwehi? Kusangwa nindi yo wangalwa nʼerisonda liwe kwehĩ?

²⁰Nĩkwa uwendi kwehĩ, uti ũkakũbĩsanaya Nyamuhanga yʼobuhaka kwehĩ? Kwʼekikabumbawa kĩkanabũga nʼomũbũmbĩ kiti, Busana nakĩ ukanyibumba utya kwehĩ?

²¹Omũbũmbĩ siawite ehamũlĩ oko libumba erikola ngoko anzĩre kwehĩ? Kutse eribumba enyungu busana nʼomũbĩrĩ mubuya, kutse omũbĩrĩ mutya-mutya kwehĩ?

²²Nyamuhanga abya anzĩre erĩkangya erihitana liwe, nʼerĩmĩnyĩsya obũtokĩ buwe. Neryo mwayibombeka kutsibu mwayitsingirira busana nʼabo angahitanako, ababya bakandĩsyaherĩbwa.

²³Nʼakandi abya anzĩre erĩmĩnyĩsya olukengerwa lunene luwe busana nʼabo angaganyira, abo ahĩra kera erisangira olukengerwa luwe.

²⁴Kusangwa nĩ ĩtwe abirikira, butsira omo katĩkatĩ kʼAbayũda basa, nĩkwa omo katĩkatĩ kʼEbihanda nibya.

²⁵Ngoko abũga omo kitabu kya Hosea ati, Abatabya bandu bage, nasyahulabo mo bandu bage. Nʼoyo wabya aponĩrwe, nasyamwahula mo mwanze wage.

²⁶Nʼabo babwirawa ambu, Simuli bandu bage, Abo basyahulwa mo bagala ba Nyamuhanga oyuliho.

²⁷Kandi Ĩsaya akabirikira busana na Ĩsraelĩ ati, Nomo eriganza lyʼabandu ba Ĩsmaelĩ lyangabya ngʼemisege yʼomo ngetsi, abake bo basyalamĩbwa.

²⁸Kusangwa Omukama asyabũga lũba omwatsi wuwe busana nʼekihugo.

²⁹Kandi ngoko Ĩsaya abũga erĩmbere ati, Kumbe Omukama wʼAmaka Gosĩ atatũsĩgĩra olubuto, Kumbe twabiribya ngʼeSodomo, itwabirisosa ngʼeGomora.

³⁰Neryo tũbũgekĩ kwehĩ? Abʼebihanda abatekwama eritunganene, mobatũngananĩbwa na Nyamuhanga omo kitunganene ekikabanika busana nʼerĩkĩrĩrya.

³¹Nĩkwa Ĩsraelĩ ibakakwama omugambo wʼerĩtũngananĩabo, mobabula omugambo oyo.

³²Busana nakĩ kwehĩ? Kusangwa mobatakwamakyo omo nzira yʼerĩkĩrĩrya, nĩkwa omwʼikola emĩbĩrĩ. Mobatwĩkala okwʼĩbwe erĩkatwĩkalaya abandu.

³³Ngoko kĩsakĩre kiti, Lebaya, ngahĩra eSĩonĩ yʼerĩbwe erĩkatwĩkalaya abandu, Nʼerĩbwe erikaleterabo erĩtwĩkala. Nʼoyũkamwĩkĩrĩraya sĩendĩsyakwa esĩsonĩ.