Read nande 1 Abanya Korĩnto 10 Bible Online

1 Abanya Korĩnto 10 - nande bible

1 Abanya Korĩnto 10

¹Balĩkyetu, nyanzĩre imwaminya, ngoko abotata-kulu betu abosĩ mobasondolwa nʼekĩtũ, nʼabosĩ mobasoka Engetsi yʼOmunyama.

²Kandi abosĩ mobabatĩsĩbwa omo kĩtũ nʼomo ngetsi ngʼendeko ya Musa.

³Nʼabosĩ mobalya akalyo kaguma kʼekĩrĩmũ.

⁴Kandi abosĩ mobapũlya ebyʼerĩpũlya ebyʼekĩrĩmũ, kusangwa babya bakapũlya oko lĩbwe eryʼekĩrĩmũ, eryakwamabo. Erĩbwe eryo lyabya Kristo.

⁵Nĩkwa Nyamuhanga mwatatsemesĩbwa nʼabangi ba kubo; kusangwa ebĩnda byabo mobyapanzapanzwa omo mbwarara.

⁶Neryo, emyatsi yosĩ eyĩ yabiribya ebĩmĩnyĩsyo busana netu, situbye tũkakwa esyongumbu syʼemyatsi mibi ngoko abo nabo bakwa esyongumbu esyo.

⁷Kandi Simubye abasabĩ bʼesyosanamu, ngoko abandi ba kubo babya, ngoko kĩsakĩre kiti. Abandu mobĩkala ahisi busana nʼerirya nʼerĩpũlya, kandi mobahangana nʼerisata.

⁸Kandi sĩtũsĩngĩre ngʼabandi ba kubo ko basĩngĩra, neryo mobahola omo kiro kiguma, abandu elfu makũmĩ abiri nʼĩsatu 23,000.

⁹Kutse situlenge oko Mukama ngoko abandi ba kubo ko bamulengako, neryo mobĩtwa nʼesyonzoka.

¹⁰Simuyitonge ngʼabandi ba kubo ko bayitonga, neryo mobĩtwa omũtĩngĩtya.

¹¹Neryo emyatsi eyĩ moyahĩka kubo ngʼekĩmĩnyĩsyo busana nʼabandi bandu, kandi moyasakwa busana nʼeritukunga. Kusangwa twĩkere hakũhĩ nʼendũlĩ yʼomugulu ono.

¹²Neryo oyũkaganĩraya ati imene ndeke, ayĩtegaye akasyayĩhĩnda.

¹³Erirengwako eryo lĩkabahĩkako lye nʼeryo lyo lĩkanahĩka oko bandi bandu; Nyamuhanga sialiregula, siendĩsyalĩga mukalengwako kwilaba amaka wenyũ; nĩkwa omwʼirengwako eryo asyabaha amaka wʼerĩyĩyĩnĩa, nʼenzira yʼeribala.

¹⁴Neryo abanze betu, musage erisaba esyosanamu.

¹⁵Ngababwira ngʼabandu bʼamenge; neryo musohe ebyo ngabũga.

¹⁶Olũtehĩ olo lwʼomũyĩsa, tukaha ewasĩngya busana nalo. Olũtehĩ olo si lwʼerisangira omo musasi wa Kristo kwehĩ? Kandi obundu obo tũkatsũtsanga, si bwʼerisangira omo mubiri wa Kristo kwehĩ?

¹⁷Neryo kusangwa obundu ni buguma, ĩtwe nomo tune bangi, tuli mubiri muguma. Kusangwa ĩtwe bosĩ tukasangira obundu buguma.

¹⁸Mũlebaye ekihanda kya Ĩsraelĩ; abakalya oko mahere sibesangira omo mwatsi wʼekiherero kwehĩ?

¹⁹Nyĩtĩkĩ kwehĩ? Nyiti ebyo ebikaherawa oko sanamu ni kindu kwehĩ? Kutse esanamu nayo ni kindu kwehĩ?

²⁰Iyihi; nĩkwa nyiti, ebyo abʼEbihanda bakahera, bakahererabyo esyombĩnga, butsira uku Nyamuhanga; kandi sĩnyanzĩre mukasangira esyombĩnga.

²¹Simwangatoka erĩpũlya oko lũtehĩ lwʼOmukama nʼoko lũtehĩ lwʼesyombĩnga; Simwangatoka erisangira ebyʼemesa yʼomukama nʼebyʼemesa yʼesyombĩnga.

²²Tukasonda erĩhĩtanĩa Omukama kwehĩ? Ko tũmũlengĩrye maka kwehĩ?

²³Emyatsi yosĩ yanganakolwa, nĩkwa emyatsi yosĩ sirigasakĩ. Emyatsi yosĩ yanganakolwa, nĩkwa emyatsi yosĩ sĩrĩhĩmba.

²⁴Omundu sĩasondaye endũndĩ yiwe ĩyowene-wene, nĩkwa asondaye endũndĩ busana nʼomũlĩkyabo.

²⁵Wanganalya ebyosĩ ebĩkagũlĩbawa omo katale kʼesĩswĩ, ĩsũlĩtabũlyakĩ busana nʼobunya-mutima bwawe.

²⁶Kusangwa kĩsakĩre kiti, Ekihugo nʼebyosĩ ebiri mukyo ni byʼOmwami Mukulu.

²⁷Omundu oyũtĩkĩrĩrye amakubirikira okwʼirya, nawe wamanza eriyayo, ulye ebyo bakahĩra oko mesa, ĩsũlĩtabũlyakĩ busana nʼobunya-mutima bwawe.

²⁸Nĩkwa omundu amakubwira ati, Esĩswĩ esĩ syaherawa oko sanamu, sulyesyo busana nʼoyo wakũtũlĩrago, kandi busana nʼobunya-mutima.

²⁹Nĩkwa sindiahula Obunya-mutima bwawe, nĩkwa obunya-mutima bwʼoyo wababwira. Kusangwa busana nakĩ obwĩranda bwage bukatswerawa busana nʼobunya-mutima bwʼogundi mundu kwehĩ?

³⁰Namalya akalyo iningaha ewasĩngya uku Nyamuhanga, busana nakĩ ngatongawa nabi busana nʼakalyo ako ngalya nʼewasĩngya kwehĩ?

³¹Neryo wamalya akalyo kutse ũkapũlya, kutse Wamakola ekĩndũkĩ, Ukole ebyosĩ busana nʼeriha olukengerwa uku Nyamuhanga.

³²Simukole ekyangaleta omwaga oko Bayũda, kutse oko bʼEbihanda, kutse oko kanĩsa ya Nyamuhanga.

³³Ngoko ĩngye ngalenga erĩtsemesya abandu bosĩ omo myatsi yosĩ, ĩsĩndĩsondaya endũndĩ yage, nĩkwa ngasondaya endũndĩ yʼabandu bangi, batoke erĩlamĩbwa.