Read nande 1 Abanya Korĩnto 12 Bible Online

1 Abanya Korĩnto 12 - nande bible

1 Abanya Korĩnto 12

¹Neryo busana nʼolũsũnzo lwʼOmũlĩmũ Abũyĩrĩre, balĩkyetu, nyanzĩre imwaminya ndeke emyatsi yalo.

²Mũnasĩ ngoko mugulu mwabya mukine abʼEbihanda momwakwama esyosanamu esĩtebũga, esyabatalaya ebiro byosĩ.

³Neryo ngabamĩnyĩsaya nyiti, sihali mundu oyuli nʼOmũlĩmũ wa Nyamuhanga, oyũkabũga ati, Yesu atakirawe; kandi sihali mundu oyukatoka erĩbũga ati, Yesu ni Mukama, atesondolawa nʼOmũlĩmũ Abũyĩrĩre.

⁴Nĩkwa hali mĩsĩndo-mĩsĩndo yʼolũsũnzo, nĩkwa nĩ Mũlĩmũ muguma oyukahalo.

⁵Kandi hali mĩsĩndo-mĩsĩndo yʼemĩbĩrĩ, nĩkwa bakakolera Omukama muguma.

⁶Neryo hali mĩsĩndo-mĩsĩndo yʼamenge wʼerikola, nĩkwa ni Nyamuhanga muguma oyukaha oko bandu bosĩ amenge wʼerikola emĩbĩrĩ yosĩ.

⁷Nĩkwa Omũlĩmũ Abũyĩrĩre akaha obuli mundu olũsũnzo busana nʼerĩwatĩkya abosĩ.

⁸Kusangwa Omũlĩmũ akaha omundu muguma erĩbũga ebĩnywa byʼamenge, kandi akaha ogundi erĩbũga ebĩnywa byʼeriminya.

⁹Kandi Omũlĩmũ muguma oyũ wakaha oko mundu muguma erĩkĩrĩrya, nʼoko gundi olũsũnzo lwʼerĩlamya esyondwala.

¹⁰Kandi Omũlĩmũ akaha ogundi mundu obũtokĩ bwʼerikola ebitikotiko; nʼoko gundi akaha olũsũnzo lwʼerĩbũga engulu ya Nyamuhanga; kandi oko gundi akaha amenge wʼerisombola omo lũsũnzo olũkalũa oko Mũlĩmũ nʼolũtelũa oko Mũlĩmũ. Nʼoko gundi, akamuha erĩbũga emĩsĩndo-mĩsĩndo yʼebĩnywa, nʼogundi akamuha erĩkũmbũla ebĩnywa ebyo.

¹¹Nĩkwa nĩ Mũlĩmũ muguma oyukakola omo lũsũnzo olũ, iniakagabira oko buli mundu olũsũnzo, ngoko anzĩre.

¹²Kusangwa ngoko mubiri ni muguma nĩkwa awite ebĩtsũko bingi; nʼebĩtsũko byosĩ byʼomubiri nomo byangabya bingi, ni mubiri muguma, neryo Kristo kwʼali atya.

¹³Kusangwa omo Mũlĩmũ muguma ĩtwe bosĩ twabĩrĩbatĩsĩbwa, nʼomo mubiri muguma, ĩtwe Bayũda kutse abʼEbihanda, kutse abakobe, kutse abʼobwĩranda; ĩtwe bosĩ twabirihabwa erĩpũlya oko Mũlĩmũ muguma.

¹⁴Kusangwa omubiri sĩ kĩtsũko kiguma, nĩkwa awite ebĩtsũko bingi.

¹⁵Ekisando kyamabũga kiti, ĩngye kusangwa Sindi byala, neryo Sindi wʼomubiri, ekyo sikyangaleka kikatindabya ekĩtsũko kyʼomubiri.

¹⁶Kandi okũtũ kwamabũga kuti, Kusangwa Sindi rĩso, neryo Sindi wʼoko mubiri, ekyo sikyangaleka okũtũ ikutabya kĩtsũko kyʼomubiri.

¹⁷Ko mubiri gosĩ amabya lĩso, angowa ati kwehĩ? Kandi kumbe omubiri gosĩ amabya kũtũ, angatoka erĩowa ekikumbo kyʼati kwehĩ?

¹⁸Nĩkwa lino Nyamuhanga abĩrĩhĩra ebĩtsũko omo mubiri, obuli kĩtsũko aho anzĩre.

¹⁹Kusangwa ebyosĩ byamabya ĩnĩ kĩtsũko kiguma, neryo omubiri angabya hayi kwehĩ

²⁰Nĩkwa lino hali ebĩtsũko bingi, nʼomubiri muguma.

²¹Neryo erĩso siryangatoka eribwira ebyala liti, Ukangubira kyahi kwehĩ? Kandi omutwe siangatoka eribwira ebisando, ati, Ukangubira kyahi kwehĩ?

²²Nĩkwa ni kwenene ebĩtsũko byʼomubiri ebikabya nga byolo-byolo kwilaba ebindi, nĩkwa bitolere kutsibu.

²³Kandi ebĩtsũko byʼomubiri ebyo tũkaganĩraya nga sibyegasakĩ, byo tũkasĩkaya kwilaba ebindi. Kandi ebĩtsũko ebyo ebite bibuya byo tũkasũga.

²⁴Nĩkwa ebĩtsũko bibuya ebyo Sibiri nʼobwaga bwʼerĩsũgwa. Nĩkwa Nyamuhanga mwahangika omubiri, ĩnĩakasĩkaya ekĩtsũko ekyo ekikabula erĩsĩkya.

²⁵Nyamuhanga mwakola atya ati Sihabye erikatulana omo mubiri, nĩkwa ebĩtsũko bĩwatĩkanaye.

²⁶Neryo ekĩtsũko kiguma kyamagalwa, ebĩtsũko byosĩ bikagalawa haguma nakyo; kandi ekĩtsũko kiguma kyamasĩkĩbwa, ebĩtsũko byosĩ bikatsema haguma nakyo.

²⁷Neryo nenyũ muli mubiri wa Kristo, kandi ĩnywe bosĩ muli bĩtsũko byago.

²⁸Neryo omo kanĩsa, Nyamuhanga abĩrĩhĩra ebyosĩ omo mianya yabyo; omo mwanya wʼerĩmbere mwahĩra abakwenda, nʼomo mwanya wʼakabiri mwahĩra abatũlĩ bʼomwatsi, nʼowʼakasatu, abakangĩrĩrya, neryo abakakola ebitiko-tiko, neryo olũsũnzo lwʼerĩlamya esyondwala, neryo abakawatĩkaya abandi, neryo abakasondola omũbĩrĩ, neryo abakabũga emĩsĩndo-mĩsĩndo yʼebĩnywa.

²⁹Abosĩ ni bakwenda kwehĩ? Nʼabosĩ nĩ batũlĩ bʼomwatsi kwehĩ? Kandi abosĩ nĩ bakangĩrĩrya kwehĩ? Abosĩ sibawite obũtokĩ bwʼerikola ebito-tiko kwehĩ?

³⁰Abosĩ bawite olũsũnzo lwʼerĩlamya esyondwala kwehĩ? Abosĩ bakabũga emĩsindomĩsĩndo yʼebĩnywa kwehĩ? Kandi abosĩ bakakũmbũla ebĩnywa ebyo kwehĩ?

³¹Nĩkwa mũkwe omũhwa wʼerĩsondya olũsũnzo olũlengĩre olundi. Nĩkwa ĩngye ngabakangaya enzira nyibuya-buya kwʼaho.