Read nande 1 Abanya Korĩnto 16 Bible Online

1 Abanya Korĩnto 16 - nande bible

1 Abanya Korĩnto 16

¹Neryo busana nʼomwatsi wʼerĩwatĩkya balĩkyetu abandu ba Nyamuhanga. Mukole ngoko nategeka esyokanĩsa syʼeGalatĩa.

²Oko buli kiro kyʼeyenga, obuli mundu abike ekihande kyʼendũndĩ akabana, butsira erĩlabya ekĩbo ekiro nasyahĩka.

³Neryo omugulu nasyahĩka, nasyatuma abandu abo mũkasĩma nʼebarua busana nʼeriheka olũsũnzo lwenyũ eYerũsalema.

⁴Kandi lyamabya lyowene busana nage eriyayo, ibagenda haguma nage.

⁵Nasyabya nabilaba eMakedonĩa nasyabahĩkako, kusangwa ngalabira eMakedonĩa.

⁶Kandi mbino nasyĩkala nenyũ ndambĩ, kutse erisiba nenyũ oko mugulu wʼeritsuku, imwatoka erĩnyĩtsĩndĩkĩsya omo nzira eyo nasyaya.

⁷Kusangwa sĩnyanzĩre eribalolako nʼeritwangana buyira. Nyiri nʼamaha wʼerisiba nenyũ ebiro binene, Omukama amanza.

⁸Nĩkwa nasyabya eno eEfeso erĩhĩka oko Pentekote.

⁹Kandi hano hali omwanya wʼerikola omũbĩrĩ munene, nomo hane esyonzĩgũ nyingi.

¹⁰Neryo Tĩmoteo asyabya ahĩka, mũlebaye mũmũkokaye ndeke siabane ekyʼerĩmũbahya. Kusangwa akakola haguma nage omũbĩrĩ wʼOmukama.

¹¹Sihabye omundu oyukamupona. Nĩkwa mumutsindike omo buholo, atoke erĩhĩka aho nyiri, kusangwa ngamulindirira haguma nʼabandi balĩkyetu.

¹²Nĩkwa busana nʼomũlĩkyetu Apolo, monamuhatikana nyiti, abahĩkeko haguma nʼabandi balĩkyetu; nĩkwa siabya anzĩre eriyayo lino, nĩkwa asyahĩka ekiro asyabana omugulu owene.

¹³Mũyĩtegaye, mũsĩke omwʼĩkĩrĩrya, mukole ngʼabalume, mubye nʼamaka.

¹⁴Mukole emyatsi yosĩ omo lwanzo.

¹⁵Balĩkyetu, mũnasĩ, ekĩtũnga kya Setefano, ngoko babya Abakristo bʼerĩmbere omo kihugo kyʼeAkaya, kandi mũnasĩ ngoko babya bakayiha oko mũbĩrĩ wʼerĩwatĩkya abandu ba Nyamuhanga. Neryo ngabalemba-lemba nyiti,

¹⁶Mowe abandu ngʼaba, kandi mowe obuli mundu oyukakola nʼerĩwatĩkya haguma nabo.

¹⁷Kandi ngatsema busana nʼerĩhĩka lya Setefano na Fortũnato, na Akaĩko; kusangwa bamabya omo mwanya wenyũ wʼerĩnyĩwatĩkya.

¹⁸Babĩrĩsĩkya omutima wage nʼowenyũ nibya. Neryo mubye mũkasĩma abandu ngʼaba.

¹⁹Amakanĩsa awali eAsĩa bakababũkaya. Kandi Akwĩla na Pĩrĩsĩla nʼekanĩsa eyĩkahĩndana omo nyũmba yabo bakababũkaya ndeke, omwisi wʼOmukama,

²⁰Nʼabalĩkyetu bosĩ eno bakababũkaya. Mũkeranaye nʼeriwanako erĩbũyĩrĩre.

²¹Ĩngye Paũlo ngasaka, omo byala byage erĩbabũkya.

²²Omundu amatindanza Omukama, abye mutakirwa. Maranatha, liti, Omukama ase!

²³Olukogo lwʼOmukama Yesu lubye haguma nenyũ.

²⁴Kandi olwanzo lwage lubye nʼĩnywe bosĩ omwisi wa Kristo Yesu. Amina.