Read nande 1 Abanya Korĩnto 3 Bible Online

1 Abanya Korĩnto 3 - nande bible

1 Abanya Korĩnto 3

¹Nĩkwa balĩkyetu, ĩngye mondatoka erĩbũga nenyũ nga muli bandu bakwamĩre Omũlĩmũ, nĩkwa nabũga nenyũ nga muli bandu abakwamĩre omubiri, nga muli Bakristo balere-balere.

²Monabalĩsya amasabũ, butsira akalyo akakala-kalĩre, kusangwa Simwabya mukatoka eriryako. Na lino simulimwatokako.

³Kusangwa lino mukine bandu abakwamĩre omubiri. Kusangwa omugulu hakine eritsuro nʼamanegeno omo katĩkatĩ kenyũ, sĩmũkwamĩre omubiri kwehĩ? Kandi simwelendera ngʼabandu bʼekihugo kwehĩ?

⁴Kusangwa omugulu omundu akabũga ati, Ĩngye indi wa Paũlo; nʼogundi ati, Ĩngye indi wa Apolo; isimuli bandu bʼekihugo kwehĩ?

⁵Ko Apolo nindi kwehĩ? Kandi Paũlo nindi kwehĩ? Tuli bagombe abaleka ĩmwĩkĩrĩrya. Obuli muguma wʼũkwʼĩtwe tukakola omũbĩrĩ ogo Mukama akatuha erikolago.

⁶Ĩngye nahera embuto, Apolo mũtũlĩra kuyo kwʼamagetsi, nĩkwa Nyamuhanga yo waleka embuto iyalasa.

⁷Neryo omũherĩ wʼembuto, nʼoyũkũtũlĩra kuyo kwʼamagetsi sibegasakĩ. Ni Nyamuhanga yũkalasayayo.

⁸Neryo omũherĩ wʼembuto, nʼoyũkũtũlĩra kuyo kwʼamagetsi balingene, kandi obuli mundu asyahembwa na Nyamuhanga ngoko mũbĩrĩ wuwe ali.

⁹Kusangwa Nyamuhanga yo tukakola haguma naye, kandi ĩnywe muli irima lya Nyamuhanga. Kandi muli nyũmba ya Nyamuhanga.

¹⁰Neryo Nyamuhanga mwamba olũsũnzo luwe, lwʼomũbĩrĩ. Neryo ngʼomũhĩmbĩ munyima-nyima wʼamenge monahula ekibanza, nĩkwa ogundi akahĩmba kukyo. Neryo obuli mundu ayĩtegaye ngʼakahĩmba ati.

¹¹Kusangwa Nyamuhanga abĩrĩhĩra Yesu Kristo mo kibanza ĩkyokyene, neryo sihali ekindi kibanza ekyangahĩrwaho.

¹²Neryo omundu akahĩmba oko kibanza omo syamagetsi, kutse esyʼebĩtsĩpa, kutse amabwe wʼobũgũlĩ bunene, kutse miti, kutse biti, kutse esyombuba.

¹³Kandi omũbĩrĩ wʼobuli mundu asyaminyikala, kusangwa ekiro kya Kristo kyasyakanganĩago. Kandi omuliro asyabĩsũlago, ni muliro asyalenga omũbĩrĩ wʼobuli mundu nga nĩ wa mũsĩndo wahi.

¹⁴Obũhĩmbe bwʼomundu bwamabyaho enyũma wʼomuliro, asyahembwa obũhĩngĩ.

¹⁵Nĩkwa Obũhĩmbe bwʼomundu bwamahĩsĩbwa omo muliro asyaherya; nĩkwa iye asyalamĩbwa ngʼoyo wabala omo muliro.

¹⁶Sĩmwasĩ ko muli hekalũ ya Nyamuhanga kwehĩ, kandi kʼOmũlĩmũ wa Nyamuhanga ĩkere omwisi wenyũ kwehĩ?

¹⁷Neryo omundu amaherya ehekalũ ya Nyamuhanga, Nyamuhanga asyamũherya. Kusangwa ehekalũ ya Nyamuhanga ĩbũyĩrĩre, nenyũ muli ehekalũ eyo.

¹⁸Sihabye mundu oyũkayĩtebaya. Omundu omo katĩkatĩ kenyũ amaganĩrya nga ni wʼamenge wʼekihugo kino, abye mũkĩrũ, iniatoka eribya wʼamenge kũndũ.

¹⁹Kusangwa amenge wʼekihugo kino nĩ bũkĩrũ embere sya Nyamuhanga. Ngoko kĩsakĩre kiti, Nyamuhanga akahamba abʼamenge omo menge wabo mabi.

²⁰Nʼawandi Masako ati, Omukama anasĩ kwʼamalengekanĩa wʼabʼamenge kwʼategasakĩ.

²¹Neryo Sihabye mundu oyukayihalamba busana nʼabandu. Kusangwa emyatsi yosĩ nĩ yenyũ.

²²Amabya ini Paũlo, kutse Apolo, kutse Petero, kutse ekihugo, kutse engebe, kutse oluholo, kutse emyatsi ya lino, kutse emyatsi ikandisyasa, emyatsi yosĩ nĩ yenyũ.

²³Nenyũ muli aba Kristo, kandi Kristo ni wa Nyamuhanga.