Read nande 1 Abanya Korĩnto 4 Bible Online

1 Abanya Korĩnto 4 - nande bible

1 Abanya Korĩnto 4

¹Abandu bangatuganza ngʼabagombe ba Kristo, kandi ngʼabateya bʼamakũmbo wa Nyamuhanga.

²Nĩkwa omwatsi muguma atolere omũteya, ambu abanike ngʼoyuteregula oko mukama wuwe.

³Nĩkwa ĩngye sinditsomana nga mukanzwera kutse eritswerwa nʼabandu ba muna-kihugo. Kutse sindiyitswera.

⁴Kandi sinditabana omwatsi wʼeriyihandikirira. Nĩkwa ekyo sikirinyiyira mo mundu ute ko lubanza. Omukama yukanyitswera.

⁵Neryo Simubye mukatswera omundu embere wʼomugulu owatolere, omugulu Omukama asyasa, iye asyahũlũkya omo kyakakala emyatsi eyĩbĩsamĩre omo mwĩrĩmya, kandi asyamĩnyĩkalya erĩyĩsũnza lyʼemitima yʼabandu. Neryo obuli mundu asyabana eripipwa na Nyamuhanga.

⁶Balĩkyetu, nabĩrĩbũga emyatsi eyĩ mo mũsyo busana nage na busana na Apolo, imwatoka eriiga eritendisoha nabi. Sihabye mundu oyukayiheka, ati akimira omukwenda muguma, nʼeripona ogundi.

⁷Nindi wakũhĩra mo mukulu oko bandu kwehĩ? Ebyosĩ ebyo uwite, Nyamuhanga mwatakuhabyo kwehĩ? Neryo byamabya ĩnĩ lũsũnzo, busana nakĩ ukayihalamba nga sulitahabwalo kwehĩ?

⁸Mwabiribana ebyosĩ; kandi mwabiribya bateke, kandi muli bami, ĩtwe nomo tutane bami; kumbe muli bami, netu itwatoka eribya bami haguma nenyũ.

⁹Kusangwa ngaganĩraya nyiti, Nyamuhanga abĩrĩtũhĩra ĩtwe bakwenda, omo mwanya wʼendũlĩ, ngʼabandu ababiritswerwa okwʼihola, kusangwa twabiribya ekyʼerisamalirwa busana nʼekihugo kyosĩ, oko bamalaĩka, nʼoko bandu.

¹⁰Ĩtwe tuli bakĩrũ busana na Kristo, nĩkwa ĩnywe muli bʼamenge omwisi wa Kristo; ĩtwe tuli bolo-bolo, nĩkwa ĩnywe muli bʼamaka; ĩnywe mũkasĩkĩbawa, nĩkwa ĩtwe tukaponawa.

¹¹Kandi erĩhĩka na lino-lino tukawira nʼerĩkwa enyota, situwite esyongimba syowene, kandi tũkahũnzawa, isituwite enyũmba.

¹²Kandi tukaluha, itunemukola omũbĩrĩ omo byala byetu. Omugulu tukatsumawa, tukatsumula; omugulu abandu bakatwendereraya, tũkayĩyĩnaya.

¹³Omugulu bakatulega, tukalenga erisangana nabo. Twabiribya ngʼabaleretĩre oko kihugo, tuli ngʼekyabũ kyʼebindu byosĩ, erĩhĩka na lino.

¹⁴Sindisaka emyatsi eyĩ busana nʼeribahemula, nĩkwa ngasaka busana nʼeribahana ngʼabana bage banze.

¹⁵Kusangwa nomo mwangabya nʼabakangĩrĩrya bʼolũhũnda-hũnda umu Kristo, nĩkwa simwangabya nʼabotata bangi. Kusangwa ĩngye omo Ngulu Yowene nabiribya tata wenyũ omwisi wa Kristo Yesu.

¹⁶Neryo ngabalemba-lemba nyiti mubye mukanyĩgerererya.

¹⁷Busana nʼomwatsi oyũ, nabiribatumira Tĩmoteo. Iye ni mwana wage mwanze omwisi wʼOmukama oyuteregula. Asyabĩbũkya emigendere yage eyo ngakwama omwisi wa Kristo, kandi eyo ngakangĩrĩraya ehosĩ omo makanĩsa gosĩ.

¹⁸Nĩkwa abandi omo katĩkatĩ kenyũ bakayihagata, bati Sindiendisyaya ewenyũ eKorĩnto.

¹⁹Nĩkwa nyinemwendĩsyabahĩkako lũba, Omukama amanza atya, neryo nasyaminya ndeke obũtokĩ bwʼabakayiheka, butsira ebĩnywa byabo bisa.

²⁰Kusangwa obwami bwa Nyamuhanga buliho omo bũtokĩ butsira omo bĩnywa bisa.

²¹Mwanzĩre kyahi kwehĩ? Nyĩbahĩkeko omo lũnyambĩ, kutse omo lwanzo nʼomutima owahehere kwehĩ?