Read nande 1 Abanya Korĩnto 7 Bible Online

1 Abanya Korĩnto 7 - nande bible

1 Abanya Korĩnto 7

¹Busana nʼemyatsi eyo mwahula omo barua yenyũ, Lyowene kumbe omundu sĩangatũla oko mũkalĩ.

²Nĩkwa kusangwa hali obũsĩngĩrĩ bungi, obuli mundu abye nʼomũkalĩ wuwe, nʼobuli mũkalĩ abye nʼĩba wuwe.

³Omulume ahe mũkalĩwe ebimutolere, kandi nibya omũkalĩ ahe ĩba wuwe ebimutolere.

⁴Omũkalĩ siawite hamũlĩ oko mubiri wuwe, nĩkwa ĩba wuwe yuli nʼehamũlĩ eyo. Kandi omulume siawite ehamũlĩ oko mubiri wuwe, nĩkwa omũkalĩwe yuwite ehamũlĩ eyo.

⁵Sĩmwĩmane mutalialagana erikola mutya, imwatoka erĩyĩhĩra okwʼisaba, neryo ĩmwaswahĩndana haguma, Satanĩ akasyabalengako busana nʼeritindatũlera lyenyũ.

⁶Nĩkwa ngababwira ebĩ, sindibahamula.

⁷Neryo nyiti kumbe abandu bosĩ babye nga ngye. Nĩkwa obuli mundu awite olũsũnzo luwe olũkalũa uku Nyamuhanga omuguma awite olũsũnzo lʼomũsĩndo oyũ, nʼogundi omũsĩndo olya.

⁸Nĩkwa ngabwira abatahĩkenĩe, nʼabakwakalĩ nyiti, lyowene kumbe bali nga ngye.

⁹Kandi bamataluka erĩyĩtũlerya, ĩbahĩkanĩa; kusangwa lyowene erĩhĩkanĩa kwilaba eriaka omo ngumbu.

¹⁰Nĩkwa ngategeka abahĩkenĩe, nĩkwa yo Mukama, sĩ ĩngye, ati, Omũkalĩ sĩalũe ũkwʼĩba wuwe.

¹¹Nĩkwa omũkalĩ amalũamo, ĩsĩaswahĩkĩbawa, kutse aswesangana nʼĩba wuwe. Kandi omulume siahige omũkalĩ wuwe.

¹²Nĩkwa oko bandi ĩngye nabwirabo, nĩkwa si yo Mukama, nyiti, Omũlĩkyetu amabya awite omũkalĩ oyũtĩkĩrĩrye, nʼomũkalĩ oyo akalĩga erĩĩkala naye, omulume oyo siamuhige.

¹³Kandi omũkalĩ oyuwite ĩba oyũtĩkĩrĩrye, nʼĩba akalĩga erĩĩkala naye omũkalĩ oyo sĩalũemo.

¹⁴Kusangwa ĩba oyũtĩkĩrĩrye akalĩgawa na Nyamuhanga busana nʼomũkalĩ wuwe, kandi omũkalĩ oyũtĩkĩrĩrye, akalĩgawa na Nyamuhanga busana nʼĩba wuwe. Bite bitya, abana benyũ bangabya hali uku Nyamuhanga, nĩkwa lino bali hakũhĩ na Nyamuhanga.

¹⁵Nĩkwa oyũtĩkĩrĩrye amanza erigenda, agende. Omo mwatsi oyũ, omulume kutse omũkalĩ abali Bakristo bayisoge ekyo bakandikola, kusangwa Nyamuhanga abiritubirikira erĩĩkala omo buholo.

¹⁶Nĩkwa uwe mũkalĩ, wasĩ uti nga sĩwendĩsyalamya ĩbawe kwehĩ? Nawe uwe mulume, wasĩ uti nga sĩwendĩsyalamya omũkalĩ wawe kwehĩ?

¹⁷Nĩkwa obuli mundu alendere ngoko Mukama amutegeka, kandi alendere umwʼebyo Nyamuhanga amubirikiramo. Ko ngategeka nyitya omo syokanĩsa syosĩ.

¹⁸Kandi omundu amabirikirwa na Nyamuhanga iniabwene, sialenge eribya ngʼoyutabwene. Omundu amabirikirwa na Nyamuhanga isiabwene, sialenge erĩbanĩbwa.

¹⁹Eribana si mwatsi, kandi eritendibana si mwatsi. Nĩkwa enzumwa nene nĩ ʼteya ebihano bya Nyamuhanga.

²⁰Obuli mundu akwame umwʼebyo Nyamuhanga amubirikiramo.

²¹Wabya mukobe omugulu Nyamuhanga akubirikira kwehĩ? Oyo si mwatsi, nĩkwa wamatoka eribya bwĩranda, Ukole utya.

²²Kusangwa omukobe oyo wabirikirawa nʼomukama nĩ mwĩranda wʼOmukama. Nibya, omwĩranda oyo wabirikirawa na Nyamuhanga, ni mukobe wʼOmukama.

²³Nyamuhanga mwabagula nʼobũgũlĩ; neryo Simubye bakobe bʼabandu.

²⁴Balĩkyetu, obuli mundu akwame Nyamuhanga omo mwatsi ogo abyamo ekiro Nyamuhanga amubirikira.

²⁵Neryo busana nʼomwatsi wʼabatahĩkenĩe, singwite kihano kyʼomukama, nĩkwa ngabũga ekyage ngʼoyuteregula busana nʼeribana eriganyira lyʼomukama.

²⁶Ngaganĩraya busana nʼamalĩge wa sesene, nyiti lyowene omundu ĩkale ngoko ane lino.

²⁷Ũhĩkĩrye omũkalĩ kwehĩ? Susonde erimuhiga. Sũhĩkĩrye kwehĩ? Susonde erĩhĩkya omũkalĩ.

²⁸Nĩkwa wamahĩkya omũkalĩ, sulitakola ekibi. Kandi omumbesa amaheruka isiatakola kibi. Nĩkwa abakaherũkanaya basyabana amalĩge omo mubiri, neryo nyanzĩre erĩbabalya oko malĩge ayo.

²⁹Nĩkwa balĩkyetu, ngababwira nyiti, omugulu amabya muke, neryo erĩtsũka lino, abawite abakalĩ bangabya nga sibawitebo.

³⁰Kandi abakalira babye nga siberira, nʼabakatsema, babye nga sibetsema, nʼabakagula, babye ngʼabatawite bindu.

³¹Abakatunda ebindu byʼekihugo babye nga sibetunda ndeke; kusangwa ekihugo kyetu sikyendisyabyaho ebiro binene.

³²Nĩkwa sĩnyanzĩre mukagalwa nʼamaganĩryo. Oyũtahĩkĩrye akatsomana omũbĩrĩ wʼOmukama, kusangwa anzĩre erĩtsemesya Omukama.

³³Nĩkwa oyũhĩkĩrye akatsomana emyatsi yʼekihugo, kusangwa anzĩre erĩtsemesya omũkalĩ wuwe.

³⁴Neryo erisonda liwe ligabene, omutima wuwe ali ko myatsi ĩbĩrĩ. Kandi omũkalĩ oyũtahĩkĩbwe, kutse omumbesa, bakatsomana omũbĩrĩ wʼOmukama, iniatoka eribya mũbũyĩrĩre omo mubiri nʼomo kĩrĩmũ; nĩkwa omũkalĩ oyũhĩkĩbwe akatsomana emyatsi yʼekihugo, kusangwa anzĩre erĩtsemesya ĩba wuwe.

³⁵Ngabũga ebĩ kusangwa nyanzĩre erĩbawatĩkya. Sĩnyanzĩre erĩbakakĩrya, nĩkwa nyanzĩre imwakola, ebitolere. Kandi nyanzĩre imwayiha oko mũbĩrĩ wʼOmukama, butsira awandi maganĩrya.

³⁶Nĩkwa omundu amaganĩrya ati syĩkere ndeke busana nʼoyo asĩmolaya, amabya ane kigungutsya. Kandi amabya akaganĩraya ati litolere ĩbahĩkanĩa, amabya anzĩre, sihali kibi, bahĩkanaye.

³⁷Nĩkwa oyũsĩkĩre omo mutima wuwe, ĩsialihatikanawa, kandi ĩnĩasĩ ekyo anzĩre ndeke, amasoha kwenene omo mutima wuwe ati sĩendĩsyahĩkya omumbesa oyo, akakola ndeke.

³⁸Neryo oyũkaherũkayaoyo asĩmolaya akakola ndeke, kandi oyũtemũherũkaya akakola ndeke kwilaba.

³⁹Omũkalĩ oyũhĩkĩbwe siali nʼehamũlĩ yʼerĩlũamo, omugulu ĩba wuwe akineho. Nĩkwa ĩba wuwe amahola, ali nʼobwĩranda bwʼeriherukira okwʼoyo anzĩre, omulume amabya ini Mukristo kwenene.

⁴⁰Nĩkwa ĩngye nyiti, asyabana obutseme ndeke amatendiheruka. Nage ngaganĩraya nyiti Omũlĩmũ wa Nyamuhanga akanyisondola.