Read nande 1 Abanya Korĩnto 9 Bible Online

1 Abanya Korĩnto 9 - nande bible

1 Abanya Korĩnto 9

¹Sindi bwĩranda kwehĩ? Sindi mukwenda kwehĩ? Sinditalangira Yesu Omukama wetu kwehĩ? Ĩnywe Simuli kiminyikalo kyʼomũbĩrĩ wage busana nʼomukama wage kwehĩ?

²Nomo nyitane mukwenda oko bandi, nĩkwa ũkwʼĩnywe nyiri mukwenda; kusangwa ĩnywe muli kĩmĩnyĩsyo kyʼobukwenda bwage busana nʼomukama.

³Omugulu abandu bakanyĩbũlĩrĩraya, ngabasũbĩraya nyiti,

⁴Situwite ehamũlĩ yʼerirya nʼerĩpũlya kwehĩ?

⁵Situwite ehamũlĩ yʼeritwala haguma netu omũkalĩ oyuli Mukristo, ngʼabandi bakwenda ko bakakola, nʼabagala babo Mukama, na Petero kwehĩ?

⁶Kutse ye Barnaba nage, ĩtwebene, tutolere eriyikumbirira kwehĩ?

⁷Ko mũsĩrĩkanĩ ni wahi oyukayalwa nʼeriyiriha kwehĩ? Nindi yukahera eririma lyʼebĩnyũ iniatalya oko bĩgũma byalyo kwehĩ? Kutse nindi yũkalĩsaya esyombũlĩ isiendirya oko masabũ wasyo kwehĩ?

⁸Ngabũga emyatsi eyĩ ngʼeyage kwehĩ? Emigambo yo yʼĩkabũga emyatsi eyĩ.

⁹Kusangwa ĩsakĩre omo migambo ya Musa iti, Susyeboha obuno bwʼenume yʼende omugulu ĩkahũmba engano. Ni mwatsi wʼesyonde go Nyamuhanga akahula kwehĩ?

¹⁰Kutse sĩalĩbũga ebĩ busana netu kwehĩ? Inga, byasakawa busana netu, kusangwa Omũlĩmĩ akalima nʼomũgesĩ akagesa, ababiri bosĩ bali nʼamaha wʼerisangira embuto eyo.

¹¹Ĩtwe twamahera emyatsi yʼekĩrĩmũ omo katĩkatĩ kenyũ, siritolere tukagesa omo katĩkatĩ kenyũ ebĩkatũwatĩkaya oko mubiri kwehĩ?

¹²Abandi bamabya nʼehamũlĩ yʼerĩwatĩkĩbwa batya, netu situwite ehamũlĩ eyo kwilababo kwehĩ? Nĩkwa ĩtwe motutakola omo hamũlĩ eyĩ, kandi tũkayĩyĩnaya omo myatsi yosĩ, tũkasyakakĩrya Engulu Yowene ya Kristo.

¹³Mũnasĩ ngoko abakakola omũbĩrĩ omo hekalũ bakalya oko byalya byʼomo hekalũ, nʼabakahera amahere oko kiherero bakahabawa ukwʼebyo ebikaherawa.

¹⁴Ko biri bitya. Omukama abiritegeka ati, Abakatũla Engulu Yowene bangabana ebyangawatĩkyabo omo Ngulu Yowene.

¹⁵Nĩkwa sinditakola omo hamũlĩ yage omo myatsi eyĩ. Kandi sinditasaka emyatsi eyĩ nyiti nyibane erĩwatĩkĩbwa. Kitsiga inahola kwilaba eriyira eriyipipa lyage mo buyira.

¹⁶Kusangwa namatũla Engulu Yowene, singwite ekyʼeriyihalambira. Kusangwa ngwite ekĩkanyĩkũna. Kusangwa obũlĩge kwĩngye namatindatũla Engulu Yowene.

¹⁷Namakola omũbĩrĩ oyũ busana nʼeriyisogago neryo nangahembwa; nĩkwa namakola nʼerĩkũnwa, nĩ mũbĩrĩ ngahabawa.

¹⁸Neryo oluhembo lwage ni lwahi kwehĩ? Oluhembo lwage nĩ ndũndĩ yʼerĩtũla Engulu Yowene butsira eririhwa, isindikola omo hamũlĩ yage yʼesriyikumbirira omo Ngulu Yowene.

¹⁹Ingye indi bwĩranda, Sindi mukobe wʼomundu; nabiriyiyira mo mukobe wʼabandu bosĩ, inatoka eribana abandu bangi busana na Kristo.

²⁰Neryo oko Bayũda ngabya ngʼOmũyũda, inatoka erisunga Abayũda. Ukwʼabo bakakwama Emigambo ngabya nga ngakwama Emigambo haguma nabo, nomo nyite omo mũlĩkĩ wʼEmigambo, inatoka erisunga abakakwama Emigambo.

²¹Neryo oko bandu bʼEbihanda abatekwama Emigambo, ngabya ngʼomundu wʼEbihanda inatoka erisunga abʼEbihanda. Nĩkwa sindigana Emigambo ya Nyamuhanga, kusangwa ngakwama Emigambo ya Kristo.

²²Oko bandu bolo-bolo, monabya molomolo. Omo myatsi yosĩ, nabirirenga eribya hakũhĩ nʼabandu bʼemĩsĩndo yosĩ, inatoka omo syonzira syosĩ erisunga abandu ba kubo.

²³Kandi ngakola emyatsi yosĩ busana nʼEngulu Yowene, inatoka erisangira omo mũyĩsa wayo.

²⁴Mũnasĩ ngoko abandu bosĩ bakatibita omo matangwa, nĩkwa omuguma musa akahabawa oluhembo. Neryo mutibite imwatoka eritangirira, nʼeribana oluhembo.

²⁵Neryo obuli mundu oyukakwama amatangwa, akayĩtegaya kutsibu omo myatsi yosĩ. Bakakola batya bati babane embĩta yʼebiti ebikalagala, nĩkwa ĩtwe tũkayĩtegaya busana nʼembĩta eyitelagala na kera.

²⁶Neryo ngatibita ngʼoyo wasĩ eyo akaya; sĩndĩlabaya esyongũmbe syʼomo kyanya mo buyira.

²⁷Nĩkwa ngagalaya omubiri wage, nʼerĩgondyago, neryo namabĩtũlago oko bandi, sinyibye ngʼoyukaganawa.