Read nande 2 Abanya Korĩnto 1 Bible Online

2 Abanya Korĩnto 1 - nande bible

2 Abanya Korĩnto 1

¹Ingye Paũlo, omukwenda wa Kristo Yesu, omwʼisonda lya Nyamuhanga, haguma nʼomũlĩkyetu Tĩmoteo, tukabasakira ĩnywe kanĩsa ya Nyamuhanga eyiri eKorĩnto haguma nʼabandu bosĩ ba Nyamuhanga abali ehosĩ eAkaya.

²Nyamuhanga Tata wetu nʼomukama Yesu Kristo babahe olukogo nʼobuholo.

³Nyamuhanga apipawe, ye Tata wʼOmukama wetu Yesu Kristo, ye Tata wʼeriganyira, na Nyamuhanga wʼerĩkĩranĩa lyosĩ.

⁴Ni iye yũkatũkĩranaya omo malĩge wetu gosĩ, netu tutoke erĩkĩranĩa abali omo malĩge wʼemĩsĩndo yosĩ. Kusangwa tũkakĩranayabo omwʼĩsĩkĩbwa eryo Nyamuhanga akatũkĩranayamo netu.

⁵Kusangwa ngoko tukasangira amalĩge mangi wa Kristo, litya tukasangira omwisi wa Kristo erĩkĩranĩa liwe lĩnene.

⁶Nĩkwa twamagalwa ni busana nʼerĩbakĩranĩa nʼerĩbalamya. Kandi twamakĩranĩbwa nenyũ mũkakĩranĩbawa, nʼerihabwa amaka erĩyĩyĩnĩa nʼeriyibombeka omo malĩge ago tukagalawamo netu.

⁷Neryo amaha wetu busana nenyũ asĩkĩre, ĩtũnasĩ ngoko mukasangira amalĩge wetu, ko mukasangira mutya erĩkĩranĩa lyetu.

⁸Kusangwa balĩkyetu, sĩtwanzĩre mukabya butaminya amalĩge wetu ago twabana eAsĩa. Nĩkwa motwagalwa kutsibu kwilaba obũtokĩ bwetu, kyaleka itwabula amaha wʼeribyaho, tuti tukandihola.

⁹Nĩkwa twabya nga tukandihola, itwatoka eritindayiketera twe ĩtwebene-bene, nĩkwa eriyiketera Nyamuhanga oyũkalũbũkaya abaholĩ.

¹⁰Kandi mwatũlamya oko bwĩko bosĩ bwʼoluholo, kandi asyatũlamya kubo; kandi tuli nʼamaha kwʼakandĩsyatũlamya kandi,

¹¹omugulu mukatũwatĩkaya omwʼisaba lyenyũ. Neryo abandu bangi abakasaba busana netu batoke eriha Nyamuhanga ewasĩngya busana nʼerĩwatĩkya liwe.

¹²Kusangwa tukayihalamba omo mwatsi oyũ: tuti Obunya-mutima bwetu bũkatũlago buti, tukayitwala omo kihugo, kandi omo katĩkatĩ kenyũ, omo myatsi mibuya nʼeyʼekwenene embere sya Nyamuhanga, kandi tukayitwala omo lukogo lwa Nyamuhanga butsira omo menge wʼabandu.

¹³Kusangwa ebyo tukabasakira bye nʼebyo mukatoka erisoma nʼeriminya, kandi tuli nʼamaha ko mwasyaminya ndeke-ndeke.

¹⁴Emyatsi eyo mwabiriminya hake-hake lino, imwatoka eriyihalamba busana netu, netu itwayihalamba busana nenyũ oko Kiro kyʼomukama wetu Yesu.

¹⁵Busana nʼeriyiketera omwatsi oyũ, nabya nyanzĩre erĩbahĩkako erĩmbere, imwatoka eribana omũyĩsa go kabiri.

¹⁶Kusangwa nyiti nabya nyanzĩre erilaba ewenyũ omo lugendo lwage lwʼeriya eMakedonĩa, kandi eriswalaba ewenyũ omugulu ngalũa eMakedonĩa, imwatoka erĩnyĩwatĩkya omo lugendo lwage lwʼeriya eYũdea.

¹⁷Neryo omugulu nasonda erikola litya, nabya mundu oyukakola litya-litya kwehĩ? Kutse ekyo ngasonda erikola ngakolakyo ngʼomundu nyiti ega ega, kandi iyihi, iyihi, oko saa nguma kwehĩ?

¹⁸Nĩkwa ngoko Nyamuhanga sialiregula, ekĩnywa kyetu busana nenyũ mokitetabya ega, kandi iyihi.

¹⁹Kusangwa Kristo Yesu Omugala wa Nyamuhanga, oyo twabatũlĩra omo katĩkatĩ kenyũ, ĩngye, na Sĩlvano, na Tĩmoteo, iye si inga, kandi iyihi, nĩkwa iye ni Ega.

²⁰Kusangwa ni iye oyuli Ega busana nʼerilaga lyosĩ lya Nyamuhanga. Neryo busana na Yesu Kristo tukaha eAmina yetu, oko lukengerwa lwa Nyamuhanga.

²¹Kusangwa ni Nyamuhanga oyũkatũhanganaya haguma nenyũ omo ngebe yetu, erimatikana na Kristo, kandi Nyamuhanga yukatuhigula.

²²Naye abĩrĩtũhĩra kwʼekĩmĩnyĩsyo kiwe, nʼerituha Omũlĩmũ wuwe omo mitima yetu ngʼomuwato.

²³Nĩkwa ngabirikira Nyamuhanga ngʼomũlangĩrĩ wage, iye anasĩ omutima wage, nyiti, busana nʼerĩbabalya kyaleka ĩndahĩka eKorĩnto.

²⁴Sĩtwanzĩre eritabala okwʼĩkĩrĩrya lyenyũ. Nĩkwa twanzĩre erikola haguma nenyũ, nʼeribaha obutseme; kusangwa mukahangana ndeke omwʼĩkĩrĩrya lyenyũ.