Read nande 2 Abanya Korĩnto 10 Bible Online

2 Abanya Korĩnto 10 - nande bible

2 Abanya Korĩnto 10

¹Neryo ĩngye Paũlo, oyuli molo embere syenyũ, nĩkwa oyũkalĩre omugulu nde haguma nenyũ, ngabalemba-lemba busana nʼobolo nʼobubuya bwa Kristo,

²Nyiti, Simuleke ngasyakala omugulu ngabahĩkako, kusangwa nyasĩ nangakala ukwʼabo bakaganĩraya bati tukakola ngʼabandu bʼekihugo.

³Ni kwenene twĩkere omo kihugo, nĩkwa situlilwa ngʼabandu bʼekihugo.

⁴Ebindu byetu byʼamalwa si byʼekihugo, nĩkwa ni bindu byʼamaka bya Nyamuhanga busana nʼerĩherya ahakongotere,

⁵Tũkaheraya obuhaka bwʼamabehĩ, nʼobuli mwatsi wʼeriyiheka owakapona eriminya lya Nyamuhanga. Kandi tukahamba obuli bũlengekanĩa erĩhĩrabo erĩowa Kristo.

⁶Kandi omugulu mwamabĩkangya erikenga lyenyũ, ĩtwe netu tũsĩkĩre erisuyira Obũtowa bosĩ.

⁷Ĩnywe mulangire emyatsi ngoko iri kwenene. Omundu amayiganza kwʼali mundu wa Kristo, aganĩraye kandi omwatsi wuwe, kusangwa ngoko iye ni wa Kristo, netu ko tuli ba Kristo nibya.

⁸Kandi nomo nangayihalamba busana nʼehamũlĩ yage kwilaba eritolere, sĩndĩkwa esĩsonĩ. Kusangwa Omukama mwamba ehamũlĩ eyo busana nʼerĩbahĩmba, si busana nʼerĩbaherya.

⁹Neryo sĩnyanzĩre eribya nga ngabũbahaya omo syobarua syage.

¹⁰Kusangwa bati, Esyobarua sya Paũlo sĩkalĩre kandi sikalamene, nĩkwa omugulu ali netu, ni mundu wʼomubiri molo, nʼebĩnywa biwe ni buyira!

¹¹Omundu ngʼoyũ aminye, ngoko tũkabũga omo syobarua syetu omugulu tuteho, ko tukakola tutya omugulu tuli haguma nenyũ.

¹²Sĩtũlĩyĩhanaya eriyiganza kutse erĩyĩrĩngĩrĩranĩa nʼabandi abakayipipa; nĩkwa omugulu bakayibanira olulengo olo bakayirengeramo, nʼerĩyĩrĩngĩrĩranĩa ĩbobene, isibali nʼamenge.

¹³Nĩkwa ĩtwe sitwendisyayihalamba kwilaba olulengo lutolere. Kusangwa tukakwama olulengo lwʼomũbĩrĩ ogo Nyamuhanga abirituha, nenyũ muli omo mũbĩrĩ oyo.

¹⁴Neryo kusangwa muli omo mũbĩrĩ oyo, motutalaba olulengo olo lwʼomũbĩrĩ wetu omugulu twabahĩkako nʼeribaletera Engulu Yowene ya Kristo.

¹⁵Neryo Sitwendisyalaba olulengo lwʼomũbĩrĩ olo Nyamuhanga abirituha, nʼeriyihalamba omo mĩbĩrĩ yʼabandi. Nĩkwa tuli nʼamaha, tuti erĩkĩrĩrya lyenyũ lyasyakula, itwatoka erikola omũbĩrĩ munene kwilaba omo katĩkatĩ kenyũ omo lulengo olo Nyamuhanga abirituha.

¹⁶Neryo twasyatoka erĩtũla Engulu Yowene omo bindi bihugo eyisirya kwĩnywe. Isitwendisyayihalamba omo mĩbĩrĩ eyabirikolwa nʼogundi mundu.

¹⁷Nĩkwa ngoko kĩsakĩre kiti, Oyukayihalamba, ayihalambe busana nʼomukama.

¹⁸Kusangwa, si yo yukayipipa yũkasĩmawa, nĩkwa omundu oyo Mukama akapipa.