Read nande 2 Abanya Korĩnto 11 Bible Online

2 Abanya Korĩnto 11 - nande bible

2 Abanya Korĩnto 11

¹Nyiti kumbe mwanganyihulikirira omo bũkĩrũ bwage buke, nyiti, kĩsĩ-kĩsĩ munyihulikirire.

²Kusangwa nyĩbanzĩre kutsibu ngoko Nyamuhanga naye abanzĩre. Kandi nabĩrĩbasĩmolya ngʼomumbesa mubuya oko mundu muguma ye Kristo.

³Nĩkwa ngubaha nyiti, Ngoko Eva atebĩbawa nʼamenge mabi wʼenzoka, kwʼamalengekanĩa wenyũ asyatsandĩbwa atya, imwaleka erikwama Kristo nʼolwanzo lwenyũ losĩ, nʼomutima wenyũ gosĩ.

⁴Kusangwa mũkahũlĩkĩrĩraya lũba omundu oyukasa nʼerĩtũla omwatsi wʼogundi Yesu, butsira Yesu oyo twabakangĩrĩraya. Kandi mukangirira ekindi kĩrĩmũ ekite Omũlĩmũ ogo mwangirira erĩmbere, kandi mũkalĩga eyindi ngulu eyite Engulu Yowene eyo mwalĩga erĩmbere.

⁵Kusangwa ngaganĩraya nga Sindi muke nʼahake oko bakwenda abo mukahula mo bakulu.

⁶Nomo nangabya Ĩsĩnyasĩ erĩbũga ndeke-ndeke, nĩkwa sindibula menge; ngoko twabĩrĩbakangya ehosĩ engendo nyingi.

⁷Omugulu nabatũlĩra Engulu Yowene ya Nyamuhanga mondabalĩhĩsya kindu, kandi monayĩkehya, imomwatoka erĩhamĩbwa. Monakola nabi kwehĩ?

⁸Omugulu nabya ngabakolera, awandi makanĩsa mobanyihemba. Nabya nga ngĩba ebyʼawandi makanĩsa busana nʼeribakolera.

⁹Kandi omugulu nabya omo katĩkatĩ kenyũ inyine nʼobwaga, mondanũbya mundu; nĩkwa abalĩkyetu abalũa eMakedonĩa mobanyiretera ebyosĩ ebyo nabya ngabula. Neryo omo myatsi yosĩ mondabanũbya, kandi sindiendĩsyabanũbya nibya.

¹⁰Ngoko mwatsi wʼekwenene wa Kristo ali omwisi wage, ngabũga kwenene, sindiendĩsyũmbya eriyihalamba busana nʼomwatsi oyũ omo bihugo byosĩ byʼAbagĩrĩkĩ.

¹¹Ngabũga nyitya busana nakĩ kwehĩ? Kusangwa sĩnyĩbanzĩre kwehĩ? Iyihi, Nyamuhanga anasĩ ko nyĩbanzĩre.

¹²Nĩkwa ebyo ngakola, byo ngandisyakola, inatoka erĩkakĩrya abandi bakwenda abo eribana omwanya wʼeriyihalamba, nʼerĩbũga bati, bakakola ngoko ĩtwe tukakola.

¹³Abandu abo ni bakwenda bʼamabehĩ abakateba, bakayĩsosekanaya ngʼabakwenda ba Kristo.

¹⁴Oyũ si mwatsi wʼeriswekera, kusangwa Satanĩ nayo ĩkayĩsosekanaya ngʼomũlaĩka wʼekyakakala.

¹⁵Neryo si mwatsi akalĩre busana nʼabagombe bayo, bamayĩsosekanĩa ngʼabagombe bʼeritunganene. Nĩkwa oko ndũlĩ basyahembwa ngʼemĩbĩrĩ yabo ko yiri.

¹⁶Kandi ngabũga nyiti, Sihabye mundu Oyukanyiganza ngʼomũkĩrũ. Nĩkwa wamanyiganza utya, neryo ũnyĩkokaye ngʼomũkĩrũ, inatoka eriyihalamba hake.

¹⁷Ebyo ngabũga lino sĩndĩbũgabyo ngʼebyʼOmukama, nĩkwa omo mwatsi wʼeriyihalamba ngabũga ngʼomũkĩrũ.

¹⁸Nĩkwa kusangwa hali bangi abakayihalamba ngʼabandu bʼekihugo, nage ngandiyihalamba nibya.

¹⁹Kusangwa ĩnywe muli bandu bʼamenge, mũkahũlĩkĩrĩraya abakĩrũ nʼobutseme.

²⁰Ĩnywe mũkahũlĩkĩrĩraya omundu oyũkabanũbaya, kutse eribanyega, kutse erĩyĩhamya, kutse abakabaswĩraya omo bũsũ.

²¹Ngakwa esĩsonĩ kusangwa twabya bandu bolo abatetoka erikola batya. Nĩkwa omundu amasonda eriyihalamba, ngabũga ngʼomũkĩrũ, nage ngasonda eriyihalamba.

²²Nabo ni Baebrania kwehĩ? Nage ko nyine nyitya. Nabo nĩ Baĩsraelĩ kwehĩ? Nage ko nyine nyitya. Nabo ni bana ba Abrahamũ kwehĩ? Nage ko nyine nyitya.

²³Nabo ni bagombe ba Kristo kwehĩ? (ngabũga ngʼomũsĩre), Nage ko nyine nyitya kutsibu! Nabirikola kwilababo kutsibu, nabĩrĩhĩrwa omo mũlĩkĩ esyongendo nyingi kwilababo, nabĩrĩswĩrĩbwa ngendo nyingi kwilaba, nabiribya hakũhĩ nʼoluholo ngendo nyingi kwilababo.

²⁴Esyongendo ĩtanu monaswĩrĩbwa esyonyambĩ makũmĩ asatu nʼomwenda.

²⁵Esyongendo ĩsatu monahũnzwa omo myũtso, engendo nguma monaswĩrĩbwa. Esyongendo ĩsatu monasonda erisenda omo bwato, nʼengendo nguma monasiba omo magetsi esyosaa makũmĩ abiri nʼesĩnĩ.

²⁶Nabiribya oko lugendo esyongendo nyingi, omo bwĩko bwʼesyonyũsĩ, omo bwĩko bwʼabarahĩ, omo bwĩko bʼAbayũda bʼewetu, omo bwĩko bwʼEbihanda, omo bwĩko omo mũyĩ, omo bwĩko omo mbwarara, omo bwĩko bwʼengetsi, omo bwĩko bwʼabalĩkyetu bʼamabehĩ.

²⁷Nabya ngakola nʼeribana obũlĩge; ngendo nyingi ĩnĩngakũbato, ĩnĩngakwa enzala nʼenyota, esyongendo nyingi iningabula akalyo, ĩnĩngakwa embeho, nʼeribula esyongimba.

²⁸Kandi butsira eriahula emyatsi eyo misa, ngwite omũbĩrĩ owakalĩre wʼerĩteya amakanĩsa gosĩ.

²⁹Omugulu omundu akabya molo, nage sindibya molo kwehĩ? Omundu amakola ebibi, nage sindiagalĩbawa kwehĩ?

³⁰Lyamabya litolere inayihalamba, ngandiyihalamba omo myatsi eyĩkakangaya obolo bwage.

³¹Nyamuhanga na Tata wʼOmukama Yesu, erĩna liwe lipipawe kera na kera, iye anasĩ ko ndebiha.

³²Omugulu nabya eDamasĩkĩ, omũtabalĩ wʼOmwami Areta mwabya akateya esyongyo syʼomũyĩ, ati akanyihamba.

³³Nĩkwa mobanyandagalya omo kitiri omo mwanya wʼolũhĩmbo, neryo monabala ebyala biwe.