Read nande 2 Abanya Korĩnto 12 Bible Online

2 Abanya Korĩnto 12 - nande bible

2 Abanya Korĩnto 12

¹Litolere inayihalamba, nomo lite lyangagasakĩ. Nĩkwa lino ngandĩkanĩa busana nʼerilota nʼerĩbĩsũlĩrwa ebĩkalũa oko Mukama.

²Nyasĩ Omukristo muguma, hamatalaba lino emyaka erĩkũmĩ nʼeyĩnĩ, oyo watwalawa oko lubula lwʼakasatu. (Sĩnyasĩ nga mwayayo omo mubiri, kutse nga siabya omo mubiri, Nyamuhanga anasĩ ekyo.)

³Kandi nyĩnasĩ omundu oyo mwatwalwa omo Paradĩso (kandi Sĩnyasĩ nga mwaya omo mubiri, kutse nga siabya omo mubiri, Nyamuhanga anasĩ ekyo).

⁴Neryo omundu oyo mowa ebĩnywa ebitetoka erĩbũgwa, kandi ebĩnywa ebyo sibitolere erĩbũgwa nʼomundu.

⁵Neryo ngandiyihalamba busana nʼomundu oyo; nĩkwa sindiendiyihalamba busana nage, mo nʼomo myatsi yʼobolo bwage.

⁶Kumbe nyanzĩre eriyihalamba, sinangabya mũkĩrũ, kusangwa nangabũga ebyʼekwenene. Nĩkwa sindiendisyayihalamba, Sihabye omundu Oyukanyiganza nga mundu mubuya kwilaba ebyo akalangira nʼerĩowa omo migendere yage.

⁷Nĩkwa isinangayiheka nʼerĩyĩhamya busana nʼerĩbĩsũlĩrwa lĩnene erĩlabĩre, monahabwa endwala yʼomubiri eyabya ngʼomukwenda wʼeSatanĩ wʼerĩnyĩhũnza, erĩnyĩkakĩrya okwʼiyiheka.

⁸Monasaba Omukama esyongendo ĩsatu busana nʼomwatsi oyũ nʼerĩmũbũlya nyiti anyĩlũsaye yoko.

⁹Naye mwanyĩsũbĩrya ati, Olukogo lwage lukakutoka, kusangwa obũtokĩ bwage bũkahĩkana omo bolo bwawe. Neryo nasyayihalamba omo butseme busana nʼemyatsi yʼobolo bwage, obũtokĩ bwa Kristo bunyibyeko.

¹⁰Neryo ngatsemera obolo, bwʼeritsumwa, nʼamalĩge, nʼerĩendererĩbwa, nʼemyatsi eyĩkalĩre, busana na Kristo. Kusangwa omugulu indi molo, indi mbangĩ.

¹¹Nabiribya ngʼomũkĩrũ, nĩkwa ĩnywe mwaleka, kusangwa nabya nyitolere erĩsĩmwa nenyũ. Nomo nangabya isindi mundu, kwenene Sindi muke nʼahake oko bakwenda abo mukahula mo bakulu.

¹²Ebĩmĩnyĩsyo byʼobukwenda bwage mobyakanganĩbwa omo katĩkatĩ kenyũ Omwʼiyibombeka lyosĩ. Mohabya ebĩmĩnyĩsyo, nʼebyʼeriswekera nʼebitikotiko.

¹³Kandi momwaganzwa ngʼabake oko wandi makanĩsa kwehĩ? Omo kiguma kisa ekyʼeritindabanũbya busana nʼobwaga bwage. Mondakola ndeke, munyibuyire.

¹⁴Eyĩ ni ngendo yʼakasatu nyĩsĩkĩre erĩbahĩkako, kandi sĩndĩendĩsyabanũbya busana nʼekindu; kusangwa sindisondasonda ebindu byenyũ, nʼĩnywe ngasonda-sonda. Kusangwa si ba bana abatolere eribikira ababũtĩ babo, nĩkwa ababũtĩ bo batolere eribikira abana babo.

¹⁵Nage ngandĩhĩtya nʼobutseme nʼerĩyĩnũbya busana nʼerĩbawatĩkya. Namabanza kutsibu, ekyo kyangaleka imwanyanza hake kwehĩ?

¹⁶Neryo mwanganalĩga ngoko ĩngye mondabanũbya, nĩkwa ogundi anganabũga ati, monabahamba omo menge omo kitego.

¹⁷Monabanyega kwʼekindu omo bandu abo nabatumira kwehĩ?

¹⁸Monasaba Tĩto nyiti agende, kandi monatuma Omũlĩkyetu haguma naye. Ko Tĩto mwabanyega ko kindu kwehĩ? Netu situlirendera nʼomutima muguma kwehĩ? Kandi situlikwama olugobe luguma kwehĩ?

¹⁹Mbino mwabere mũkaganĩrya muti tukayilwira embere syenyũ. Iyihi! Nĩkwa embere sya Nyamuhanga, tũkabũga ebyo Kristo anzĩre ĩtwabũga. Kandi abanze betu, ebyosĩ ebyo tukakola ni busana nʼeabahĩmba.

²⁰Kusangwa ngubaha nyiti, omugulu ngabahĩkako, nasyabeya isimuli nʼomutima ogo nanganza, kandi nasyaminyikala ũkwʼĩnywe nga singwite omutima ogo mwanganza. Kandi mbino hasyabya malwa, obũha, erihitana, kutse obuhaka, nʼeritsuma, eritonga bandu, kutse emiyiheko, kutse omwaga.

²¹Kandi ngubaha nyiti omugulu nasyaswahĩka, Nyamuhanga wage asyanyihemulira embere syenyũ. Neryo nasyalira busana nʼabandu bangi ababĩrĩhalya, nʼerĩsĩngĩra, nʼerikwama esyongumbu nyibi, isibetabindula emitima yabo nʼerireka ebibi ebyo.