Read nande 2 Abanya Korĩnto 13 Bible Online

2 Abanya Korĩnto 13 - nande bible

2 Abanya Korĩnto 13

¹Eyĩ ni ngendo yʼakasatu ngabahĩkako. Kĩsakĩre kiti, Obuli mwatsi asyaminyikala nga ni kwenene omwʼĩtũlago lyʼabalangĩrĩ babiri, kutse basatu.

²Nyanzĩre eribabwira ĩnywe mwahalaya erĩmbere, nʼabandi bosĩ. Monabũga oko lugendo lwage lwʼakabiri, nĩkwa lino ngabũgakyo kandi isinyiriho, nyiti, namaswahĩka eyo, sĩndĩendĩsyabalya mundu.

³Kusangwa mukasonda-sonda ekĩmĩnyĩsyo ko Kristo akabũga omo buno bwage. Naye si molo omo myatsi yenyũ, nĩkwa akakola nʼobũtokĩ omo katĩkatĩ kenyũ.

⁴Kusangwa kwenene mwahanikwa oko musalaba busana nʼobolo bwʼomubiri, nĩkwa aneho omo bũtokĩ bwa Nyamuhanga. Netu nibya tuli bolo nga ye, nĩkwa twasyabyaho haguma naye omo bũtokĩ bwa Nyamuhanga omo myatsi yenyũ.

⁵Muyirengeko nga mukakwama omwʼĩkĩrĩrya; muyitswere! Sĩmwasĩ kwenene ko Kristo Yesu amatikene nenyũ kwehĩ? Mutetatoka ekyo imwabiritaluka.

⁶Nĩkwa indi nʼamaha ko mwasyaminya ĩtwe sitwenditaluka omo mwatsi oyũ.

⁷Neryo tukasaba Nyamuhanga tuti Simukole ekibi, sĩʼbũga ambu tuminyikale nga twamataluka.

⁸Kundi Sitwangatoka erilwa nʼekwenene ya Nyamuhanga, nĩkwa tukimanira ekwenene eyo.

⁹Tukatsema omugulu tuli bolo, nĩkwa ĩnywe muli nʼamaka; kandi tukasaba tuti, mũhĩkane ndeke.

¹⁰Busana nʼemyatsi eyĩ, ngabasakira omugulu nyite haguma nenyũ, neryo omugulu nasyabahĩkako, isinangakala omo hamũlĩ eyo Mukama abirimba. Kusangwa amba ehamũlĩ eyo busana nʼerĩbahĩmba, si busana nʼerĩbahĩmbũla.

¹¹Neryo balĩkyetu, Obuholo! Mukwame erĩhĩkana, mowe ebyo ngabũga; mubye nʼobũlengekanĩa buguma, musibe buholo; na Nyamuhanga wʼolwanzo nʼowʼobuholo asyabya haguma nenyũ.

¹²Mũkeranaye omwʼiwanako lĩbũyĩrĩre.

¹³Abandu bosĩ ba Nyamuhanga bakabakeraya.

¹⁴Olukogo lwʼOmukama Yesu Kristo, nʼolwanzo lwa Nyamuhanga, nʼerĩsĩbĩkya lyʼOmũlĩmũ Abũyĩrĩre, bibye nʼĩnywe bosĩ.