Read nande 2 Abanya Korĩnto 3 Bible Online

2 Abanya Korĩnto 3 - nande bible

2 Abanya Korĩnto 3

¹Tũkatsũka kandi erĩyĩmĩnyĩsya ũkwʼĩnywe ngʼabandu babuya kwehĩ? Kutse litolere, ngʼabandi, tukabana esyobarua syʼerĩtũsĩma embere syenyũ, kutse esyobarua esĩkalũa ewenyũ kwehĩ?

²Ĩnywe muli barua yetu, eyĩsakĩre omo mitima yetu, abandu bosĩ batoke eriminyayo nʼerisomayo.

³Kandi mukaminyikala ko muli barua eyo Kristo asaka, netu tukatwalayo. Kandi ebarua eyĩ sĩsakĩre omo bwĩno, nĩkwa ĩsakĩre nʼOmũlĩmũ wa Nyamuhanga oyuliho. Kandi sĩyĩsakĩre oko bisayi byʼamabwe, nĩkwa ĩsakĩre oko mitima yʼabandu.

⁴Tũkabũga tutya kusangwa Kristo akatuha eriyiketera Nyamuhanga.

⁵Ĩtwe bene situliyiganza nga twangatoka erikola kindu, nĩkwa eritoka lyetu lĩkalũa uku Nyamuhanga,

⁶oyukaleka itwatoka omũbĩrĩ wʼendagane nyihya-nyihya. Endagane nyihya-nyihya eyĩ si yʼemigambo eyĩsakĩre, nĩkwa nĩ yʼOmũlĩmũ, kusangwa emigambo eyĩsakĩre ĩkĩta, nʼOmũlĩmũ akaha engebe.

⁷Emigambo yabya ĩbatsĩre oko bisayi byʼamabwe, kandi yahabawa omo lukengerwa lwa Nyamuhanga. Neryo abana ba Ĩsraelĩ mobataluka erisamalira obũsũ bwa Musa busana nʼolukengerwa lyʼobũsũ buwe, olwabya lukakeha. Neryo omwatsi wʼemigambo eyikaleta oluholo mwahĩka omo lukengerwa lungaha,

⁸nĩkwa omwatsi wʼOmũlĩmũ sialireta olukengerwa lunene kwilaba aho kwehĩ?

⁹Kusangwa omwatsi wʼomũbĩrĩ wʼemigambo owakasĩnga omundu abya nʼolukengerwa, neryo omũbĩrĩ wʼomwatsi owakayira omundu mo mutunganene alabĩre kutsibu omo lukengerwa.

¹⁰Kusangwa omwatsi owabya nʼolukengerwa erĩmbere, lino ali nga siawite olukengerwa, wamalĩngĩrĩranĩalo nʼolukengerwa olũlabĩre lino.

¹¹Kusangwa ekikakeha kyamabya nʼolukengerwa, ekĩkasĩgala kiwite olukengerwa kwilaba aho.

¹²Neryo kusangwa tuwite amaha aya, tuwite obulume-lume ndeke.

¹³Situli nga Musa oyo wahĩra akakimba oko bũsũ buwe, abana ba Ĩsraelĩ sibalangire erĩkangabasanĩa eryabya likakeha, nʼerihwa.

¹⁴Nĩkwa amalengekanĩa wabo abya akalĩre; nʼerĩhĩka mũnabwĩre ekitambara ekyo kikinaswika amalengekanĩa wabo omugulu bakasoma erilagana lya kera. Kusangwa ekitambara ekyo kĩkalũsĩbawa omugulu omundu akamatikana na Kristo.

¹⁵Kandi mũnabwĩre omugulu bakasoma ekitabu kya Musa, ekitambara ekyo kikaswika amalengekanĩa wabo.

¹⁶Nĩkwa kĩsakĩre kiti, Akakimba ka Musa mokalũsĩbwaho omugulu abya akabindukira Omukama.

¹⁷Nĩkwa Omukama oyo nĩ Mũlĩmũ; kandi aho Mũlĩmũ wʼOmukama ali, ho hali obwĩranda.

¹⁸Neryo kusangwa situwite ekitambara oko bũsũ bwetu, tũkakanganaya ngʼomo kiyo olukengerwa lwʼOmukama. Kandi busana nʼolukengerwa luwe tũkahĩndũkĩbawa omo kĩsosekanĩo kiwe omo lukengerwa luwe, kusangwa lũkalũa oko Mukama oyuli Mũlĩmũ.