Read nande 2 Abanya Korĩnto 4 Bible Online

2 Abanya Korĩnto 4 - nande bible

2 Abanya Korĩnto 4

¹Neryo kusangwa Nyamuhanga abirituganyira nʼerituha omũbĩrĩ oyũ, sitweremerawa.

²Nĩkwa tukagana emyatsi eyo bũbĩso-bĩso eyʼesĩsonĩ, isitwalendera omo matebo. Kandi sĩtũlĩhengemaya ekĩnywa kya Nyamuhanga, nĩkwa tũkamĩnyĩkalaya ekyʼekwenene, ĩtũkayĩmĩnyĩsaya busana nʼerĩsĩmwa embere syʼobunyamutima bʼobuli mundu, embere sya Nyamuhanga.

³Kandi Engulu Yowene yetu yamabya ĩbĩsamĩre, ĩkabĩsama busana nʼabandu abakatogota.

⁴Sĩbalĩkĩrĩraya kusangwa nyamuhanga mubi wʼekihugo kino abĩrĩrĩba ameso wʼobũlengekanĩa bwabo ati sibalangire ekyakakala kyʼEngulu Yowene eyʼolukengerwa lwa Kristo, oyuli kĩsosekanĩo kya Nyamuhanga.

⁵Kundi sĩtweyĩtũla goko, nĩkwa tũkatũlago ngoko Kristo Yesu ni Mukama, netu tuli bagombe benyũ busana na Yesu.

⁶Kusangwa Nyamuhanga oyo wabũga ati, Ekyakakala kĩkoleraye omo mwĩrĩmya, ni iye abĩrĩkolerya omo mitima yetu nʼerituha ekyakakala kyʼeriminya olukengerwa lwa Nyamuhanga oluli omo bũsũ bwa Kristo.

⁷Nĩkwa ĩtwe tuwite obuteke obũ omo mubiri wʼekitaka, neryo obũtokĩ bunene obo bubye bwa Nyamuhanga butsira bwetu.

⁸Tukagalawa ngendo nyingi, nĩkwa sĩtwebũnĩka; tukatika-tika, nĩkwa sĩtũlĩsĩganĩraya.

⁹Tũkendererĩbawa, nĩkwa sĩtwesĩganĩbawa ĩtwebene; tũkahũnzawa, nĩkwa sĩtũlĩtogotĩbawa.

¹⁰Ebiro byosĩ tuli ngʼabandu abakaheka omo mibiri yabo oluholo lwa Kristo, neryo engebe ya Yesu iyatoka eriminyikala omo mibiri yetu.

¹¹Kusangwa emigulu yosĩ tuli omo bwĩko bwʼoluholo busana na Yesu, neryo engebe ya Yesu iyatoka eriminyikala omo mibiri yetu eyikahola.

¹²Neryo oluholo luli hakũhĩ netu, nĩkwa engebe ikakola omwisi wenyũ.

¹³Netu tuwite ekĩrĩmũ kyʼerĩkĩrĩrya, ngoko kĩsakĩre kiti, Monabũga kusangwa monĩkĩrĩrya. Ko litya netu tũkabũga kusangwa twabĩrĩkĩrĩrya;

¹⁴kusangwa tũnasĩ ko Nyamuhanga oyo walũbũkaya Omukama Yesu, asyatũlũbũkya haguma na Yesu, nʼerituleta embere siwe haguma nenyũ.

¹⁵Kandi emyatsi yosĩ eyĩ ni busana nenyũ, neryo olukogo lwa Nyamuhanga lũkahĩka oko bandu banene. Neryo abandu bangi bahe ewasĩngya nʼeriha olukengerwa uku Nyamuhanga.

¹⁶Neryo busana nʼemyatsi eyĩ sitweremerawa. Nĩkwa nomo mibiri yetu ikakula, nĩkwa ebĩrĩmũ byetu bikayirawa mo bihya-bihya obuli kiro.

¹⁷Kusangwa obũlĩge obũ bwangũhĩre, nĩ bwʼakatambĩ kake, bwasyatuletera olukengerwa lwʼerikota, olũlabĩre olulengo.

¹⁸Kusangwa tukakwama emyatsi itelolawako. Situlikwama emyatsi eyikalolawako. Kandi emyatsi eyikalolawako nĩ yʼakatambĩ kake, nĩkwa emyatsi eyitelolawako ni yʼerikota.